जनकपुरमा शंकास्पद रूपमा मृत भेटिएकी सिर्जनाका भाइ भन्छन्- दिदीभिनाजुबीच जग्गाको विवाद थियो

जनकपुरमा शंकास्पद रूपमा मृत भेटिएकी सिर्जनाका भाइ भन्छन्- दिदीभिनाजुबीच जग्गाको विवाद थियो

A+ A A-

जनकपुरस्थित सर्लाही होटेल एन्ड गेस्ट हाउसको पाँचौ तलाबाट खसेको अवस्थामा भेटिएकी म्याग्दीकी महिलाको हत्या भएको आशंका गरिएको छ ।

पछिल्लो समय श्रीमानसँग चिसिएको सम्बन्ध, शवको प्रकृति, होटेलको कोठामा शंकास्पद अवस्थामा भेटिएका तौलिया, चप्पल र मृतक सिर्जना सिर्पालीका श्रीमान् विश्वासले दिएको फरक-फरक बयानले उनको हत्याको आशंका गरिएको हो ।

श्रीमानसँगै गत सोमबारदेखि होटलमा बसेकी म्यागदीको मालिका गाउँपालिका- ७, की ३० वर्षीया सिर्जना सुनार सिर्पालीको बुधबार विहान होटलको पाँचौ तल्लाबाट खसेको अवस्थामा शव फेला परेको थियो । शव पोस्टमार्टमका लागि अहिले प्रादेशिक अस्पताल जनकपुरमा राखिएको छ ।

श्रीमानले नै उनको हत्या गरेको हुनसक्ने मृतक सिर्जनाका माइती पक्षसँगै अनुसन्धानमा खटिएका प्रहरीको समेत आशंका छ ।

प्रारम्भिक चरणको अनुसन्धानमा घटनाले हत्याकै संकेत गरेको एक प्रहरी अधिकृतले बताए । सिर्जनाका भाइ यामेश रसाइलीले श्रीमान् विश्वासले उनको हत्या गरेको हुनसक्ने भन्दै बिहीबार किटानी जाहेरी दिएका छन् ।

घटनाको निष्पक्ष छानबिन गरिपाउँ भनी जिल्ला प्रहरी कार्यालय धनुषामा किटानी जाहेरी दर्ता भएको प्रहरी उपरीक्षक प्रकाश रानाभाटले जानकारी दिए । एक महिनाअघि वैदेशिक रोजगारीको क्रममा साउदी पुगेका यामेश घटनाबारे थाहा पाएपछि बिहीबार घर फर्केका छन् ।

उनलाई पर्खेर मात्र बिहीबार शव पोस्टमार्टम हुन नसकेको र शुक्रबार बिहानै पोष्टमार्टमको तयारी रहेको प्रहरी उपरीक्षक रानाभाटले बताए ।

यामेशका अनुसार पछिल्लो केही समययता विश्वास र सिर्जनाबीच सम्बन्ध चिसिएको थियो । विश्वास रोजगारीको क्रममा साउदीमै हुँदा सिर्जनाले पोखरामा जग्गा किनेकी थिइन् । सो जग्गा जग्गा आफ्नो नाउँमा पास गर्न दबाब दिँदा सिर्जजना र विश्वासबीच पछिल्लो समय दिनहुँ झगडा पर्ने गरेको बुझिन आएको यामेशले बताए ।

‘सबै जग्गा तिम्रै नाउमा छ । मेरो नाउमा केही छैन । तिमी ठूल-ठूला कारोबार गर्छौ । कुनैदिन सबै डुबाउछौँ । त्यही भएर चुपचाप पोखराको जग्गा मेरो नाउमा गरिदेउ भनेर भिनाजुले दिदीलाई भन्दै आएको कुरा दिदीले आफ्नो साथीलाई केहीदिन अघि सुनाउनु भएको थियो,’ उनले भने ।

यद्दपी विश्वासले भने पोखराको जग्गा बेचिसकेको र पछिल्लो समय जग्गा खरिद गर्ने योजना बनाएको बताएका थिए । सृजनाकै नाउमा बैंकमा करिब २८ लाखभन्दा बढी रुपैँया जम्मा रहेको शिलापत्रसँग उनले भनेका थिए ।

पारिवारिक सदस्यहरूका अनुसार सृजनाले यसअघि चितवन र पोखरामा पटक-पटक जग्गा किनबेच गरेकी थिइन् । भान्जा भान्जीले समेत दिदी भिनाजुबीच जग्गाकै बारेमा फोनमै दिनहुँ झगडा पर्ने गरेको बताएको यामेशले सुनाए । सोही विवादका कारण विश्वासले सिर्जनालाई मारेको हुनसक्ने उनको भनाइ छ ।

उनका अनुसार पछिल्लो चार महिनादेखि विश्वासले सिर्जनालाई विदेशबाट पैसा पठाउन छोडेका थिए । करिब १२ दिन पहिले साउदीबाट कसैलाई पनि नबताइ घर फर्केको र त्यो क्रममा ४/५ दिन काठमाडौंमै बसेको यामेशले बताए ।

‘विदेशबाट फर्केर भिनाजु काठमाडौं बसेको कुरा दिदीलाई पनि थाहा थिएन । मसँग कुरा हुँदा पनि ३/४ दिनपछि घर जान्छु भनेर भन्नुभएको थियो । तर उहाँले किन त्यसो गर्नुभयो त्यो मैले बुझ्न सकिन,’ उनले भने ।

यामेशमा अनुसार विदेशबाट फर्किँदा विश्वासले थोरै पैसा मात्र सिर्जनालाई दिएका थिए । विदेशबाट फर्किदा ४/५ दिन काठमाडौं बसेको कुरा विश्वासले स्वीकार गरेका छन् । तर, श्रमसम्बन्धी कामले आफू काठमाडौं बसेको उनले बताए ।

विश्वासले आफन्तहरूसँग कुरा गर्दा समेत फरक-फरक कुरा बताएकाले उनीमाथि शंका बढेको यामेशले बताए । होटेलमा तौलिया समेत शंकास्पद अवस्थामा भेटेकाले हत्याको शंका भएको उनको भनाइ छ । ‘होटेल मालिकसँग कुरा हुँदा उहाँले दुईवटा नयाँ गम्छा दिएको भन्नु भएको छ । तर दुबै गम्छा डस्टविनमा फोहोरले छोपिएको अवस्थामा भेटेको छ । गम्छा पनि पुरै फोहोर भएछ । दिदीको चप्पल पनि कोठमै छ । त्यसैले ८० प्रतिशत लाग्छ कि दिदीलाई मारेकै छ,’ उनले भने ।

शवको प्रकृति र विश्वासको बयानले घटना शंकास्पद देखिएको भन्दै विभिन्न कोणहरुबाट प्रहरीले अनुसन्धान जारी राखेको धनुषाका प्रहरी उपरीक्षक रानाभाटले बताए । पाँचौ तलाबाट खसेको अवस्थामा शव भेटिए पनि घर र शवबीचको दुरी एकदमै कम छ । शव र घरबीचको दुरीले समेत घटना शंकास्पद रहेको प्रहरीको भनाइ छ ।

‘आफैँले हाम फाल्दा घर र शवबीच हुने दुरी र कसैले त्यो वेटको मानिसालई धकेल्दा कतिसम्म पुग्न सक्छ त्यो एंगलबाट पनि अनुसन्धान गरिरहेका छौँ, प्रहरी उपरिक्षक रानाभाटले भने, ‘त्यहाँ रुख पनि छ । तल खस्दा रुखमा किन लागेन् ? रुखको हाँगा किन भाँचिएन् ? शव रुख कसरी क्रसिङ भयो ? ती सबै कुरा हेर्दै पनि अनुसन्धान गरिरहेका छौँ ।’

शव पोष्टमार्टम भएपछि थप कुरा खुल्ने उनले बताए । सिर्जनाको स्कुटीको लाइसेन्स बनाउन भन्दै गत सोमबार जनकपुर आएर होटेलमा बसेको विश्वासको भनाइ छ । मंगलबार राति करिब सावा १२ बजे आफू सुते पनि सिर्जना मोबाइल चलाएर कोठाबाहिरै बसेको उनको दाबी छ ।

बिहान सावा तीनबजे ब्यझिँएर होटेलभित्र चारैतीर खोज्दा कतै नभेटेको उनले प्रहरीसमक्ष बयान दिएका छन् । बुधबार बिहान उनीहरू बसेको रामानन्द चोकस्थित सर्लाही होटेल एन्ड गेस्ट हाउसको उत्तरपट्टी टाँसिएर रहेको खानेपानी संस्थानको कमपाउण्डभित्र पानी जमेको ठाउँमा सृजनाको शव भेटिएको थियो ।

उनको शरीरको विभिन्न ठाउँमा चोट देखिएको प्रहरीले जनाएको छ । शव छेउबाटै प्रहरीले सिर्जनाले प्रयोग गर्ने मोबाइल बरामद गरेको छ । मृतक सिर्जना गत वर्ष भदौदेखि छोराछोरीसहित पोखराको मालेपाटनमा बस्दै आएकी थिइन् ।

त्यहाँ उनी कृषि सहकारीमा काम गरी छोराछोरीलाई पढाउँदै आएकी थिइन् । उनका श्रीमान् विश्वास करिब १० वर्षदेखि वैदेशिक रोजगारमा थिए । सृजना पछिल्लो समय जग्गा किनबेचको कारोबार समेत गर्दै आएकी थिइन् ।

यो पनि :

सिर्जनाको मृत्यु शंकास्पद, पोखरामा जग्गा किनेर घर बनाउने तर्खरमा थिइन्

जनकपुरको सर्लाही होटलमा श्रीमान्‌सँगै सुतेकी महिला मृत फेला

प्रकाशित मिति: शुक्रबार, चैत १३, २०७७ ०६:५४