सिर्जनाको मृत्यु शंकास्पद, पोखरामा जग्गा किनेर घर बनाउने तर्खरमा थिइन्

A+ A A-

जनकपुरस्थित सर्लाही होटल एण्ड गेस्ट हाउसको पाँचौँ तलाबाट खसेको अवस्थामा भेटिएकी सिर्जना सुनार श्रीपालीको शव पोस्टमार्टमका लागि प्रादेशिक अस्पताल जनकपुरमा राखिएको छ । मृतककी आफन्तले बुधबार बेलुकी शव बुझेपछि पोस्टमार्टमका लागि अस्पताल पठाइएको थियो ।

श्रीमान् विश्वास श्रीपालसँगै सोमबारदेखि होटलमा बसेकी म्याग्दीको मालिका गाउँपालिका-७ की ३० वर्षीया सिर्जनाको बुधबार बिहान छतबाट खसेको अवस्थामा शव फेला परेको हो । होटेलको उत्तरपट्टी टाँसिएर रहेको खानेपानी संस्थानको कम्पाउण्डभित्र पानी जमेको ठाउँमा सिर्जनाको शव भेटिएको थियो ।

उनको शरीरको विभिन्न ठाउँमा चोटपटक लागेको देखिन्छ । तर, त्यो चोट कसरी लाग्यो भन्ने पोस्टमार्टम रिपोर्टपछि मात्र पत्ता लाग्ने धनुषाका प्रहरी उपरीक्षक प्रकाश रानाभाट बताउँछन् ।

‘खसेको छेउमै सुकेको आँपको बोटमा ठक्कर खाएर लागेको चोट हो कि पर्खालमा लागेको हो वा भुइँको चोट हो, त्यो पोस्टमार्टम रिपोर्टपछि डाक्टरले मात्र भन्न मिल्छ,’ उनले भने । शवको प्रकृति हेर्दा माथिल्लो तलाबाट हाम फालेको जस्तो नदेखिएको अनुसन्धानमा खटिएका प्रहरी अधिकृत बताउँछन् ।

शवछेउबाटै प्रहरीले सिर्जनाले प्रयोग गर्ने मोबाइलसमेत बरामद गरेको छ । सिर्जनाले होटलबाट हामफालेको वा भुलवश खसेको हुन सक्ने उनका श्रीमान् विश्वासले प्रहरीसमक्ष प्रारम्भिक बयान दिएका छन् । आफूहरूबीचको सम्बन्ध एकदमै सुमधुर रहेको उनको दाबी छ ।

‘दिउँसो पनि हामी सुतेका थियौँ । त्यसैले गफगाफ गर्दै सवा १२ बजेतिर म सुतेँ तर कोठामा नेटले काम गर्न छोडेपछि उनी बाहिर गएर मोबाइल चलाउन लागिन्,’ उनले भने, ‘बिहान करिब सवा ३ बजे ब्युँझिँदा उसलाई कतै देखिनँ । माथि चारैतिर खोज्दा पनि कतै नभेटिएपछि बाहिर निस्केर म चिच्याउन थालेँ ।’

सबैतिर खोज्दा नभेटेपछि करिब सवा ४ बजे होटल सञ्चालकलाई फोन गर्दा नउठेको र सवा ५ बजे मात्र होटलका स्टाफ आएर बाहिरको गेट खोलेको उनको भनाइ छ । ‘बाहिर खोज्दैगर्दा होटलअगाडि प्रहरीको गाडी देखेँ । उनीहरूलाई सबै कुरा बताएँ । अनि प्रहरीले पनि खोज्न सहयोग गर्न आयो,’ उनले भने, ‘ठ्याक्कै होटेलको गेटसामुन्ने तल पुग्दा मैले उसको लास देखेँ । म आत्तिएँ र मेरो धड्कन बढ्यो ।’

विश्वासका अनुसार सिर्जनाको स्कुटीको लाइसेन्स बनाउन र आफ्नो हलुका सवारी लाइसेन्समा हेभी थप्न भन्दै उनीहरू यातायात व्यवस्था कार्यालय जनकपुर आएका थिए । ‘पोखरामा फर्म खुलेको थिएन । भर्खरै उसको (सिर्जना) को मामाको छोराले यहीँबाट लाइसेन्स लगेका थिए । उसैले भनेर हामी पनि लाइसेन्स बनाउन यहाँ आएका थियौँ,’ उनले भने, ‘अलि अलि पैसा मिलाएर हुन्छ वा जसरी होस लाइसेन्स बनाएरै जाने हामीले ठानेका थियौँ ।’

विश्वासका अनुसार बुधबार सिर्जनाको लाइसेन्सको लिखित परीक्षाको समय तोकिएको थियो ।

जग्गा किनेर घर बनाउने तर्खरमा थिइन् सिर्जना

मृतक सिर्जनाको परिवारका अनुसार उनी गत वर्ष भदौदेखि छोराछोरीसहित पोखराको मालेपाटनमा बस्दै आएकी थिइन् । त्यहाँ उनी कृषि सहकारीमा काम गरी छोराछोरीलाई पढाउँथिन् । उनका श्रीमान् विश्वास करिब दश वर्षदेखि वैदेशिक रोजगार थिए ।

११ दिनअघि मात्र उनी साउदी अरबबाट ५० दिनको बिदामा घर फर्किएका थिए । आफू प्रत्येक वर्ष छुट्टीमा घर फर्किने र फेरि विदेश जाने गरेको विश्वासको भनाइ छ । उनका अनुसार सिर्जना पछिल्लो समय जग्गा किनबेचको कारोबारसमेत गर्दै आएकी थिइन् ।

वैदेशिक रोजगारीका क्रममा आफूले कमाएको पैसाबाट उनले केही वर्षअघि चितवनको टाँडीमा १० धुर जग्गा किनेको र पोखरामा समेत जग्गा किनेर बिक्री गरेको विश्वासले बताए । १ वर्षअघि पोखरामा २५ लाखमा किनेको तीन आना जग्गा २८ लाखमा बिक्री गरेको उनको भनाइ छ ।

‘फेरि हामी आफ्नै जग्गा किनेर घर बनाउने सोचेका थियौँ । २०/२२ लाखको जग्गा किन्ने र घर बनाउने हाम्रो योजना थियो । तर, बच्चालाई पनि छोडेर हामी सबैलाई धोका दिएर ऊ संसार छोडेर गइहाली,’ उनले थपे ।

सिर्जनाका बुबा जितमान सुनारले आफू गाउँमै बसिरहेकाले छोरी र ज्वाइँबीच विवाद भएको वा नभएको आफूहरूलाई कुनै जानकारी नरहेको सुनाए । उनका अनुसार सिर्जना पाँच दिनपछि माइती जानेवाला थिइन् । तर, उनको मृत्युको घटनाले उनको परिवारमा शोकमग्न भएको छ । शवको प्रकृति र घटना शंकास्पद देखिएको भन्दै प्रहरीले विभिन्न कोणबाट अनुसन्धान गरिरहेको प्रहरी उपरीक्षक रानाभाटको भनाइ छ ।

प्रकाशित मिति: बिहीबार, चैत १२, २०७७ १५:५१