झा दम्पती हत्यामा प्रहरी निष्कर्ष : प्लटिङ पुग्ने जग्गा बेच्न नमान्दा मारिए

झा दम्पती हत्यामा प्रहरी निष्कर्ष : प्लटिङ पुग्ने जग्गा बेच्न नमान्दा मारिए

A+ A A-

महाेत्तरीमा आफ्नै घरबाट बेपत्ता भएका मुसाफिर झा र उनकी पत्नी गीतादेवी झाको शव महिना दिनपछि प्रहरीले फेला पारेको छ । दम्पतीकै शव एउटै खाल्डोमा पुरिएको अवस्थामा भेटिएको छ ।

घरजग्गा कारोबारमा संलग्न रामबाबु यादव र हरेन्द्र ठाकुरले झा दम्पतीको हत्या गरेर पुरेको प्रहरीले दाबी गरेको छ । यादव र ठाकुरले जग्गा प्लटिङपछि बेचविखन गर्दै आएका थिए । झा परिवारको जग्गा पछाडि यादव र ठाकुरले जग्गा प्लटिङ गरेपनि त्यहाँ पुग्न बाटो भने थिएन । झा परिवारको जग्गा किनेर बाटो खुलाउने योजना यादव र ठाकुरको थियो ।

‘झा परिवारले जग्गा बेच्न मानेको थिएन,’ २ नम्बर प्रदेश प्रहरी प्रमुख प्रहरी नायब महानिरीक्षक (डीआईजी) धिरजप्रताप सिंह भन्छन्, ‘जग्गा बेच्न व्यवसायीले फकाउनेदेखि धाकधम्कीसम्म दिएछन् । तर, जग्गा नबेचेपछि झा दम्पतीलाई नै मारिदिएको हाम्रो अनुसन्धानबाट खुलेको छ ।’

झा दम्पतीको १५ कठ्ठा जग्गा यादव र ठाकुरले किन्न चाहेका थिए । झा परिवारको यो जग्गाको पछाडि डेढ बिघा जमिनमा यादव र ठाकुरले प्लटिङ गरेका छन् । यादव महोत्तरीको पिपराकै हुन् भने ठाकुर भारतीय नागरिक हुन् ।

डीआईजी सिंहका अनुसार जति गर्दा पनि जग्गा नदिएपछि झा दम्पतीलाई मार्न उनीहरूले योजना बनाए । शव पुरिएको स्थान झा परिवारको घरदेखि ३ किलोमटिर दक्षिणमा पर्छ ।

शव चाँडो नष्ट होस् भनेर खाल्डोमा नुन समेत राखिएको सिंहले बताए । ‘शव व्यवस्थापन पनि योजनाबद्ध देखिन्छ,’ उनले भने ।

गत १० फागुनदेखि राति सुतेकै ठाउँबाट ओछ्यानसहित झा दम्पतीलाई बेपत्ता पारिएको थियो । झा परिवारको किटानी जाहेरीका आधारमा यसअघि प्रहरीले यादव र ठाकुरसहित चार जनालाई नियन्त्रणमा लिएको थियो । अन्य दुई जना यादवकै छोरा सुरेन्द्र र राजेन्द्र हुन् । आरोपितहरूले भने हत्याको आरोप अस्वीकार गर्दै आएका छन् ।

तर, आरोपितको पोलिग्राफ परीक्षण गर्दा ९९ सय प्रतिशत झुटो देखिएकाे डीआईजी सिंहले बताए । रामबाबु यादव यसअघि पनि हत्या अभियोगमा मुछिएको प्रहरीले दाबी गरेको छ । ०५४-५५ तिर एक महिलाको हत्यामा संलग्न भएको समेत प्रहरीको दाबी छ ।

प्रकाशित मिति: बिहीबार, चैत १२, २०७७ १५:५७