वीरगञ्ज तरकारी बजारमा माछापुच्छ्रे बैंकको क्यूआर भुक्तानी सेवा सुरु

A+ A A-

माछापुच्छ्रे बैंक, वीरगञ्ज शाखाले वीरगञ्जस्थित वीरगञ्ज तरकारी तथा फलफूल बजारका २२ जना व्यवसायीलाई क्यूआर कोड हस्तान्तरण गरेको छ ।

नेपाल राष्ट्र बैंकले विद्युतीय कारोबार र मोबाइल बैंकिङको प्रवर्द्धन र र पहुँच विस्तार गर्न क्यूआर कोडमार्फत हुने भुक्तानीलाई अभियानको रूपमा अगाडि बढाएसँगै बैंकहरूले पनि स्थानीय तहमा क्यूआर कोड वितरण गर्न थालेका हुन् ।

हस्तान्तरण कार्यक्रममा वीरगञ्ज महानगरपालिकाका प्रमुख विजयकुमार सरावगीले कोरोना महामारीको त्रास अझै केही वर्ष रहने हुनाले नगद कारोबारबाट हुन सक्ने संक्रमणको जोखिम न्यूनीकरण गर्न क्यूआर कोडमार्फत हुने भुक्तानीलाई प्राथमिकता दिनुपर्ने बताए ।

नेपाल राष्ट्र बैंकका निर्देशक डा. राजनकृष्ण पन्तले मुद्रा र भुक्तानी प्रणालीको ऐतिहासिक विकास क्रम, क्यूआर कोड भुक्तानी प्रणालीका अन्तर्राष्ट्रिय परिवेश र नेपालमा बढ्दो स्मार्ट फोनको प्रयोग, वित्तीय साक्षरता, विस्तारित वित्तीय पहुँचका कारणले भुक्तानी प्रणालीको राम्रो सम्भावना रहेको बताए ।

२०७७ पुससम्ममा मासिक ३ लाख ७२ हजार कारोबार संख्याबाट करिब १ अर्ब २५ करोड रुपैयाँको कारोबार भएको, मोबाइल बैंकिङ सेवा लिनेको संख्या २ लाख पुगेको र मौद्रिक नीतिको अर्धवार्षिक समीक्षामा उल्लेख भएअनुसार १९ फागुन २०७७ मा मोबाइल बैंकिङको दैनिक कारोबार सीमालाई दोब्बर बनाउँदै १ लाखबाट २ लाख बनाइएको पन्तले बताए ।

माछापुच्छ्रे बैंक प्रदेश २ का प्रमुख व्यावसायिक अधिकृत भरतकुमार लम्सालले व्यवसायीहरूलाई खाता खोल्नेदेखि लिएर अन्य कागजी प्रक्रियामा सहजता प्रदान गरिने बताए । उनले क्यूआर कोडमार्फत हुने भुक्तानीमा निःशुल्क सुविधा रहेको र यो सुविधा लिइग्राहकहरू लाभान्वित हुने र बैंकिङ कारोबार तथा भुक्तानी प्रक्रिया सहज हुने बताए ।

प्रकाशित मिति: बिहीबार, चैत १२, २०७७ १६:२९