भारतमा संक्रमण बढ्दा प्रदेश २ मा जोखिम, नाकामा हेल्प डेस्क र परीक्षणदर बढाउन निर्देशन

भारतमा संक्रमण बढ्दा प्रदेश २ मा जोखिम, नाकामा हेल्प डेस्क र परीक्षणदर बढाउन निर्देशन

A+ A A-

केही दिनयता भारतमा कोरोना भाइरसको संक्रमण बढ्दै गएपछि सीमासँगै जोडिएको प्रदेश-२ मा पनि संक्रमणको जोखिम बढेको छ । खुला सीमानाकाका कारण संक्रमित सहजै प्रवेश गर्न सक्ने भएकाले प्रदेश २ मा पनि संक्रणमको जोखिम बढेको हो ।

सोही कुरालाई मध्यनजर गर्दै सतर्कता अपनाउन प्रदेश सरकारले पहल थालेको छ । प्रदेश २ स्वास्थ्य निर्देशनालयले कोरोना संक्रमणको जोखिमलाई मध्यनजर गर्दै नाकामा हेल्फ डेस्क राख्न र परीक्षणदर बढाउन जिल्ला स्वास्थ्य कार्यालयहरूलाई निर्देशन दिएको छ ।

‘प्रदेश २ का ८ वटै जिल्लाका सीमानाकामा सतर्कता अपनाउन समन्वय भएको छ,’ निर्देशनालयका प्रमुख डा. विजय कुमार झाले भने, ‘सबै जिल्लाका स्वास्थ्य कार्यलयका प्रमुखलाई कोभिड संकट व्यवस्थापन समिति र स्थानीय तहसँग समन्वय गरी सीमानाकामा हेल्प डेस्क राख्न निर्देशन दिइएको छ ।’

यसैगरी, प्रदेशका सबै जिल्लामा प्रयोगशाला रहेकाले भोलिदेखि नै परीक्षणदर बढाउन निर्देशन जारी भइसकेको उनले बताए ।

उता, सीमानाकामा पनि कडाइ गर्न निर्देशन दिइएको छ । सशस्त्र प्रहरी प्रवक्ता राजु अर्यालले भारतबाट आउने सबैलाई आवश्यक सोधपुछ गरेर मात्रै प्रवेश दिन निर्देशन दिइएको बताए । प्रदेश २ मा पूर्वको सप्तरीदेखि पश्चिमको पर्सासम्म ४६४ किलोमिटर दक्षिण सीमाक्षेत्र भारतसँग जोडिएको छ । सो नाकामा ७२ बीओपी र ९ एफओपी पोष्टमा रहेका सुरक्षाकर्मीलाई कार्य निगरानी बढाउन भनिएको हो ।

बारामा मास्क नलगाउनेलाई कारबाही

बारामा बुधबार बसेको डीसीसीएमसीको बैठकले संक्रमणको सम्भावनालाई मध्यनजर गर्दै मास्क प्रयोग नगर्नेलाई संक्रामक रोग ऐन बमोजिम कारबाही गर्ने निर्णय गरेको छ । जिल्ला प्रशासन कार्यालयले सूचना जारी गर्दै सोबारे जानकारी गराएको छ ।

आउँदै गरेको फागु पुर्णिमा (होली) पर्वको अवसरमा भीडभाड हुन नदिने, पहिले सञ्चालनमा आएका क्वारेन्टाइन र आइसोलेसन केन्द्रलाई तयारी अवस्थामा राखेर स्वास्थ्य केन्द्रहरुबाट प्रदान गरिने सेवालाई थप प्रभावकारी बनाउन आवश्यक तयार गर्न निर्णय गरिएको छ ।

यसैगरी संक्रमणबाट जोगिन विद्युतीय माध्यमबाट चेतनामूलक सन्देश प्रशारण गर्ने र प्रभावकारी बनाउन आवश्यक तयारी गर्ने, स्यानिटाइजर, मास्कको प्रयोग गर्ने र सामाजिक दूरी कायम गर्ने निर्णय भएको छ ।

यसैगरी, सीमानाकाबाट आउने यात्रुको आवतजावतलाई व्यवस्थित गरी सबैको अभिलेख राख्ने र नेपाल प्रवेश गर्नेको अनिवार्य रूपमा स्वास्थ्य परीक्षण गराएर प्रवेश गराउने निर्णय भएको सूचनामा उल्लेख छ ।

प्रकाशित मिति: बुधबार, चैत ११, २०७७ १९:२५