अझै खुलेन ताक्लाकोटको नेपाली बजार

नेपाल–चीनको व्यापारिक केन्द्र ताक्लाकोट बजार ।

A+ A A-

बझाङको साइपाल गाउँपालिका–६ का जगत तामाङ लामो समयदेखि नेपाल चीनको व्यापारिक केन्द्र ताक्लाकोटमा व्यवसाय गर्दै आएका छन् । पछिल्लो दुई वर्षयता ताक्लाकोटमा रहेको पसल बन्द गरेर उनी काठमाडौंमा छन् ।

कोरोना संक्रमण बढेपछि चीनमा सरकारले लकडाउन गरेपछि उनी पसल बन्द गरेर नेपाल फर्किए । उनी मात्र होइन, उनीसँगै हुम्लाका तासी लामा, दार्चुलाका योगेश बोहरा लगायत करिब दुई सय नेपाली व्यापारी नेपाल फर्के । उनीहरू नेपाल फर्किएका एक वर्ष पुगिसक्यो तर, नेपाल–चीनको व्यापारिक केन्द्र ताक्लाकोट बजार अझै खुल्न सकेको छैन ।

ताक्लाकोटमा मुगु, डोल्पा, हुम्ला, बझाङ र दार्चुलाका गरी करिब दुई सय नेपाली व्यवसायी छन् । लामो समयदेखि बजार बन्द हुँदा नेपाली व्यापारी मार्कामा परेको तामाङले बताए । नेपालबाट निर्यात हुने र चीनबाट आयात भएका सामान ताक्लाकोटको गोदाममै थन्किएका छन् । कोरोना कहरले लामो समयदेखि सामान बिक्री गर्न नपाँउदा व्यवसायीलाई ठूलो क्षति भएको उनको भनाइ छ ।

‘एक वर्षअघि पसल बन्द गरेर नेपाल फर्कियौं । तर अहिले चीन सरकारले नेपालीलाई ताक्लाकोटमा प्रवेश गर्न दिएको छैन,’ उनले भने । नेपाल सरकारले नाका सञ्चालनका लागि कूटनीतिक पहल नगर्दा आफूहरू मार्कामा परेको ताक्लाकोटमै व्यवसाय गर्दै आएका दार्चुलाका योगेश बोहरा बताउँछन् ।

‘ताक्लाकोटमा चीनतर्फका बजार खुलेका छन् । नेपालतर्फको बजार मात्र बन्द छ,’ उनले भने, ‘नेपालीलाई बजार खोल्न निषेध गरिएको छ ।’ व्यापारिक नाका सञ्चालनका लागि सरकारले तत्काल पहल गर्नुपर्ने उनले बताए ।

चीननको ताक्लाकोट बजारमा नेपालीले वर्षौंदेखि नेपाली गलैँचा, बाँस, निगालो, छाला र अन्य हस्तकलाका सामानको व्यापार गर्दै आएका छन् । यस्तै मह, घिउ, छुप्री, खुर्सानी लगायतका दैनिक उपभोग्य सामान चौरी, भेडा र खच्चरमार्फत ढुवानी गरी ताक्लाकोटमा बेच्ने गरेको गरेका छन् ।

ताक्लाकोट तिब्बतको विकट हिमाली क्षेत्रमा पर्ने एक मुख्य शहर हो । हिन्दू र बौद्ध धर्मावलम्बीको प्रसिद्ध तीर्थस्थल कैलाश मानसरोवर जान यही बाटो भएर जानु पर्ने हुन्छ ।

प्रकाशित मिति: बुधबार, चैत ११, २०७७ १२:४०