स्थानीय पाठ्यक्रम हस्तान्तरण

A+ A A-

दक्षिण ललितपुर ग्रामीण विद्युत् सहकारीले २५ वैशाखमा ललितपुरको गोटिखेलमा स्थानीय पाठ्यक्रम तथा पाठ्यपुस्तक हस्तान्तरण कार्यक्रम सम्पन्न गरेको छ । सहकारीले आधारभूत तह (कक्षा १–५)को सामाजिक विषयअन्तर्गत पाठ्यक्रम विकास केन्द्रले निर्देशित गरेको २० प्रतिशत स्थानीय पाठ्यांशलाई पूरा गर्न नवीकरणीय ऊर्जासम्बन्धी विषयवस्तु समेटेर तयार पारिएको पाठ्यक्रम तथा पाठ्यपुस्तक गोटिखेल गाउँपालिका अध्यक्ष रामचन्द्र दाहाललाई हस्तान्तरण गरेको हो ।

स्थानीय पाठ्यक्रम तथा पाठ्यपुस्तक तर्जुमा उपसमितिका संयोजक गोविन्दप्रसाद पराजुलीले २०७२ सालको भूकम्प र त्यसपछिको नाकाबन्दीका कारण ऊर्जा संकट बढेको परिवेशमा नवीकरणीय ऊर्जासम्बन्धी विषयवस्तुलाई विद्यालय शिक्षामा समेट्ने अवधारणा विकास भएको बताए ।

महांकाल गाउँपालिका शिक्षा शाखा प्रमुख सुरेन्द्रमणि पुरीले भने, ‘नवीकरणीय ऊर्जासम्बन्धी स्थानीय पाठ्यक्रम र पाठ्यपुस्तक अत्यन्त उपयोगी छ । यसलाई प्रभावकारी बनाउन शिक्षकको भूमिका महत्त्वपूर्ण हुन्छ । स्थानीय सरकारले कार्यान्वयन पक्षलाई व्यवस्थित बनाई अनुगमनसमेत गर्नुपर्छ ।’

त्यस्तै, प्रकाशन सहयोगी संस्था ग्रामीण प्रविधि केन्द्रका प्रमुख निर्देशक पुरुषोत्तम श्रेष्ठले स्थानीय पाठ्यक्रम लागू हुनुलाई ऐतिहासिक रुपमा महत्त्वपूर्ण कार्यको थालनी भएको बताए । आवश्यकता महसुस भएमा अरु गापा र नपाका विद्यालयमा पाठ्यपुस्तक लागू गराउन केन्द्रले सहयोग गर्न तत्पर रहेको बताए ।

‘स्थानीय विषयवस्तुले स्थानीय क्षेत्रको आवश्यकतालाई समेटेको र यसमा रहेका विषयवस्तु समसामयिक रहेको छ । यो पाठ्यक्रम र पाठ्यपुस्तकको गुणस्तर अब्बल छ,’ पाठ्यक्रम विकास केन्द्रका प्रतिनिधि खडोस सुनुवारले भने ।

शिक्षाविद् देवीराम आचार्यले शिक्षकले चाहेमा राम्रो उपलब्धि निकाल्न सक्ने बताउँदै भने, ‘यसको कार्यान्वयन पक्षलाई जोड दिए । शिक्षकले तयारीका साथ प्रयोगात्मक ढंगले पठनपाठन गराउनुपर्छ । गाउँपालिकाका सबै विद्यालयमा एकरुपताका साथ कार्यान्वयन गर्नुपर्छ । शिक्षण सिकाइका क्रममा देखापरेका समस्यालाई शिक्षकले आपसी छलफलबाट समाधान गर्नुपर्छ ।’

कार्यक्रम प्रमुख अतिथि तथा महांकाल गाउँपालिका अध्यक्ष रामचन्द्र दाहालले आजबाट नवीकरणीय ऊर्जासम्बन्धी स्थानीय पाठ्यक्रमको अपनत्व गापाले लिएको बताए । उनले विद्यार्थीले यस विषयमा ज्ञान लिने कार्य थालिने भएको बताए । त्यस्तै, उनले शिक्षक दक्ष भएकाले उत्कृष्ट नतिजा आउने दाबी गरे ।

दाहालले भने, ‘प्रभावकारी कार्यान्वयनका लागि विद्यालय, वडा र शिक्षाशाखालाई आजैबाट अनुरोध गर्छु । अर्को वर्ष (२०७७) देखि निःशुल्क पाठ्यपुस्तक वितरणको जिम्मा गाउँपालिकाले लिन्छ ।’

कार्यक्रमका सभापति गोविन्दप्रसाद बजगाईंले दक्षिण ललितपुर ग्रामीण विद्युत् सहकारी संस्थाले आगामी दिनमा गाउँपालिकासँग सहकार्य गरी विविध कार्यक्रम ल्याउने बताए । बजगाईंले विद्युत् र चट्याङ सुरक्षा तथा महिला उद्यमका विषयमा संस्थाले थप कार्यक्रम ल्याउने जानकारी दिए ।

कार्यक्रम सञ्चालन सचितानन्द घिमिरेले गरेका हुन् । घिमिरेले नवीकरणीय ऊर्जासम्बन्धी यस विषयवस्तुले स्थानीय पाठ्यक्रमको मर्मलाई उजागर गरेको बताए ।

कार्यक्रममा वडा अध्यक्ष, प्रअ, विषय शिक्षक, स्थानीय, पत्रकारलगायतको उपस्थिति थियो ।

प्रकाशित मिति: मंगलबार, वैशाख ३१, २०७६ २३:३८