फागुनमा ९ हजार युवा काम खोज्दै विदेशिए, धेरैकाे रोजाइमा कतार

A+ A A-

फागुनमा ९ हजार १ सय ४६ जना कामदारले श्रम स्वीकृति लिएर रोजगारीको खोजीमा विभिन्न देश पुगेको वैदेशिक रोजगार विभागले जनाएको छ । विभागका अनुसार फागुनमा ८ हजार ३ सय १६ जना पुरुष र ८ सय ३० जना महिलाले रोजगारीको लागि श्रम स्वीकृति लिएका हुन् ।

फागुनमा सबैभन्दा बढी कतारको लागि श्रमिकले स्वीकृति लिएका छन् । यस्तै संयुक्त अर्ब इमिरेट्स, साउदी अर्ब, ओमान, रोमानियालगायतका देश रोजगारीको लागि जाने श्रमिकको संख्या बढी रहेको वैदेशिक रोजगार विभागले जनाएको छ ।

सबैभन्दा धेरै कतारका लागि ४ हजार ७४ जनाले श्रम स्वीकृति लिएका छन् । त्यसपछि संयुक्त अर्ब इमिरेट्समा १३ सय १० पुरुष र १ सय ७४ महिला गरी १ हजार ४ सय ८५ जना श्रम स्वीकृति लिएका छन् । तेस्रोमा नेपाली श्रमिकका लागि साउदी अरब आकर्षक गन्तव्य बनेको छ । सो महिना १४ सय २४ जनाले साउदीको लागि श्रम स्वीकृति लिएको विभागको तथ्यांक छ ।

बहराइनमा ४ सय ४५, ओमानमा २ सय ८६, जोडनमा १ सय ९५, साइप्रसमा १ सय १७ र अफगानिस्तानमा जान १ सय ५३ जनाले श्रम स्वीकृति लिएका छन् । विशेष गरी नेपालीको रोजाइमा खाडी मुलुक परेका छन् ।

माघको तुलनमा फागुनमा वैदेशिक रोजगारीमा जानेको संख्या घटेको विभागको तथ्यांक छ । माघमा मात्रै पुरुष र महिला गरी १७ हजार ८ सय ८७ जनाले श्रम स्वीकृति लिएका थिए ।

माघमा पनि धेरै युवा खाडीका देशमा जानका लागि श्रम स्वीकृति निकालेको विभागको तथ्यांक छ । पछिल्लो समय कोरोना भाइरसविरुद्धको खोप प्रयोगमा आएसँगै खाडी मुलुकबाट पनि रोजगारदाता कम्पनीले श्रमिकको माग गरिरेहका छन् ।

कोरोना भाइरसपछि वैदेशिक रोजगारीमा जाने कामदार संख्या थपघट भइरहेको विभागका महानिर्देशक कुमार दाहालले जानकारी दिए । पछिल्लो समय कोरोनाका नयाँ सक्रमित थपिएपछि रोजगारदाता देशले अन्तर्राष्ट्रिय उडान स्थगित गर्दा नेपालको श्रम बजार प्रभावित भएको उनको भनाइ छ ।

प्रकाशित मिति: बिहीबार, चैत ५, २०७७ १४:५१