राजस्व सचिवले भने, 'कोषले पुँजीबजारको विकास र बजारको स्थायित्वका लागि काम गर्नुपर्छ'

राजस्व सचिवले भने, 'कोषले पुँजीबजारको विकास र बजारको स्थायित्वका लागि काम गर्नुपर्छ'

A+ A A-

राजस्व सचिव रामशरण पुडासैनीले पूर्वाधार र उत्पादनशील क्षेत्रमा कोषले लगानी परिचालन गर्नुपर्ने बताएका छन् । उनले नागरिक लगानी कोषको ३१औँ वार्षिकोत्सवको अवसरमा त्यस्तो धारणा राखेका हुन् ।

पुँजीबजारको स्थायित्व, गतिशीलता र विकासका लागि कोषको तर्फबाट थप काम गर्नुपर्ने समय आएको राजस्व सचिव पुडासैनीको भनाइ थियो । उनले भने, 'कोषले पुँजीबजारको विकास, गतिशीलता र बजारको स्थायित्वको विषयमा काम गर्नुपर्छ ।'

उनले वित्तीय उत्तरदायित्व, पारदर्शिता, संस्थागत सुशासन र आकर्षक सामाजिक सुरक्षा योजना कार्यान्वयन नै कोषको प्रगतिको आधार स्तम्भ भएको बताए ।

१ खर्ब ६७ अर्ब ९९ करोड पुँजी संकलन

कार्यक्रममा कोष सञ्चालक समितिका अध्यक्ष प्रा.डा.रामचन्द्र भट्टराईले चालु आर्थिक वर्षको फागुन मसान्तसम्म कोषले सञ्चालनमा रहेका योजनाबाट १ खर्ब ६७ अर्ब ९९ करोड पुँजी संकलन गरी १ खर्ब ६३ अर्ब ३० करोड रुपैयाँ लगानी गरेको बताए । उनले उच्च आर्थिक विकासमार्फत समाजमा विद्यमान बेरोजगारीको अन्त्य गर्न नसेकसम्म दिगो विकास र स्थायित्व प्राप्त गर्न नसकिने बताए ।

यसका लागि कोषले आफूलाई अझ सुदृढ बनाउँदै ‘समृद्ध नेपाल र सुखी नेपाली’ को राष्ट्रिय आकांक्षा पूरा गर्नेतर्फ काम गर्नुपर्ने आवश्यकत औँल्याए । कोष स्थापनादेखि नै निरन्तर नाफामा सञ्चालन भइरहनु, प्रत्येक वर्ष सहभागी संख्या वृद्धि गर्न सफल हुनु र फरक–फरक किसिमका बचत योजना सफलतापूर्वक सञ्चालनमा ल्याउन सक्नु नै कोषको सफलताको आधार भएको उनको भनाइ थियो ।

अत्तरिया र बुटवलमा शाखा विस्तारको तयारी

कार्यक्रममा कोषका कार्यकारी निर्देशक रमण नेपालले सेवाग्राहीको सेवालाई ध्यानमा राख्दै उपत्यकाबाहिर विराटनगर र पोखरामा शाखा कार्यालय सञ्चालन गरिरहेकोमा अब सुदूरपश्चिम प्रदेशको अत्तरिया र लुम्बिनी प्रदेशको बुटवलमा शाखा विस्तारको काम सुरु गरिसकेको जानकारी दिए ।

उनले विद्यमान सूचना प्रविधि प्रणालीमा व्यापक सुधारको आवश्यकता महसुस गरी कोषले नयाँ सफ्टवेयर सञ्चालनमा ल्याइसकेको जानकारी दिए ।

कार्यक्रममा नेपाल धितोपत्र बोर्डका अध्यक्ष भीष्मराज ढुंगानाले कोषले कुल लगानीको ६/७ प्रतिशत मात्रै पुँजीबजारमा लगानी गरेको भन्दै उनले यो प्रतिशत १०/१२ प्रतिशत सम्म पुर्‍याउनुपर्नेमा जोड दिए ।

कोष कर्मचारी युनियनका अध्यक्ष सुरेश चालिसेले कोषले समग्र कर्मचारीको हकहितमा काम गर्नुपर्ने धारणा राखे ।

सो अवसरमा कोषले सञ्चालन कार्यक्रमहरूमा कर्मचारी बचत वृद्धि अवकाश कोष, उपदान तथा पेन्सन कोष, एकांक योजना, लगानीकर्ता हिसाब योजना, निजामती बीमा कोष, शिक्षक बीमा कोष, सैनिक बीमा कोष, नार्क बीमा कोष, नेपाल प्रहरी बीमा कोष, सशस्त्र प्रहरी बीमा कोष, राष्ट्रिय अनुसन्धान बीमा कोष तथा नागरिक पेन्सन योजनालगायतका बारेमा जानकारी दिइयो ।

कोषले वार्षिकोत्सवको अवसरमा प्रभातफेरी कार्यक्रम पनि आयोजना गरेको थियो भने कोष कर्मचारी युनियनले आयोजना गरेको खेलुकुदलगायतका कार्यक्रमका विजयीलाई पुरस्कृत गरेको थियो । कोषका कर्मचारी प्रविन राई, मनमोहन मिश्र र सिरिषा श्रेष्ठ उत्कृष्ट कर्मचारीको रूपमा पुरस्कृत भएका छन ।

प्रकाशित मिति: बिहीबार, चैत ५, २०७७ १८:४२