फारम भरेको आठ महिनापछि मात्रै लाइसेन्सको परीक्षा, छपाइको काम पनि रोकियो

A+ A A-

काठमाडौं‌ चक्रपथकी २१ वर्षीया उमा मगर २६ फागुनमा कामको सिलसिलामा स्कुटर लिएर घरबाट निस्किइन् ।

लैनचौर पुगेपछि उनलाई चेकिङमा रहेको ट्राफिक प्रहरीको टोलीले रोक्यो । उनीसँग सवारी चालक अनुमतिपत्र (लाइसेन्स) थिएन । ट्राफिक प्रहरीले उनलाई १ हजार रुपैयाँको चिट थमाइदियो ।

बाहिरबाट हेर्दा उमाको गल्ती देखिन्छ तर उनले लाइसेन्स बनाउन पहल भने नगरेकी होइनन् । गत माघमा लाइसेन्सका लागि आवेदन भरेकी उनलाई ‘बायोम्याट्रिक’ र परीक्षाका लागि साउनको दोस्रो साता मिति तोकियो ।

‘मैले फारम भर्दा छ महिनासम्म परीक्षा दिन नपाउने, लाइसेन्स नहुनुमा मेरो गल्ती कि यातायात व्यवस्था विभागको ?,’ उनले प्रश्न गरिन् ।

उमा त प्रतिनिधि पात्र मात्र हुन् । लाइसेन्स लिन चाहने हजारौँले यो समस्या भोगिरहेका छन् । लकडाउनको अवधिमा लाइसेन्सको परीक्षा रोकिएकाले एकैपटक धेरैले फारम भर्दा सेवाग्राहीले परीक्षा दिन ८-९ महिनासम्म पर्खनुपर्ने बाध्यता आइपरेको यातायात व्यवस्था विभागका प्रवक्ता डा. लोकनाथ भुसालले बताए ।

‘पहिले कोटा सिस्टम गर्दा फारम भर्न पाइएन भन्ने धेरैको गुनासो आयो । त्यहीँ भएर सबैलाई खुला गर्‍यौँ । धेरैले एकैपटक फारम भरेकाले पछि भर्नेको परीक्षा दिने पालो धकेलिँदै गयो,’ उनले भने ।

यस्तो अवस्थामा पर्खनुबाहेक अन्य विकल्प नभएको उनले बताए । उपत्यका बाहिर भने यो समस्या खासै नपरेको उनले बताए ।

लाइसेन्सको छपाइ पनि रोकियो

केही समयदेखि विभागले नियमित लाइसेन्स छपाइको काम पनि रोकेको छ । विभागमा थोरै मात्र लाइसेन्स बाँकी रहेकाले छपाइको काम पनि रोकिएको भुसालले जानकारी दिए । ‘हाल विभागमा ३०-४० हजार मात्रै कार्ड छन् । त्यसैले अत्यावश्यक, विदेश जान लागेका लगायतका मात्र लाइसेन्स छापेका छौँ,’ उनले भने ।

नयाँ कार्ड आएपछि पुन: लाइसेन्स छपाइको काम सुरु गरिने उनले बताए । १४ लाख लाइसेन्सका लागि फ्रान्सको सिल्प कम्पनीले सम्झौता गरिसकेको छ । विभागले आह्वान गरेको बोलपत्रमा मलेसियाको आइरिस बरह्याड कर्पोरेशन, फ्रान्सको सिल्प र भारतको मद्रास सेक्युरिटी प्रिन्टले ठेक्का हालेका थिए ।

प्राविधिक र आर्थिक प्रस्तावअनुसार प्रतिकार्ड ०.८६ डलरमा फ्रान्सको सिल्प कम्पनीले ठेक्का हात पारेको हो । हालसम्म विभागले २० लाख लाइसेन्स छापिसकेको छ।

प्रकाशित मिति: मंगलबार, चैत ३, २०७७ १४:५३