मालवाहक गाडी ‘ओभरलोड’ भेटिए सामान सडकमै झारिने

A+ A A-

मालवाहक सवारीसाधन ओभरलोड भेटिए बढी भार भएको सामान सडकमै झारिने भएको छ।

आगामी १५ चैतदेखि यातायात व्यवस्था विभागले मालवाहक सवारीसाधनको भारबहन नियमनसम्बन्धी निर्देशिका, २०७४ लाई कडाइका साथ कार्यान्वयन गर्न लागिएको यातायात व्यवस्था विभागका प्रवक्ता डा. लोकनाथ भुसालले जानकारी दिए।

प्रत्येक मालवाहक गाडीको तौल पुलले दिने ‘लोड स्ल्पि’ चेक गरेर ओभरलोड भए कारबाही गर्ने योजना रहेको उनले बताए । ‘हामीले नयाँ काम गर्न लागेका होइनौं । पहिलेकै नियमलाई कडाइका साथ कार्यान्वयन मात्र गर्न लागेका हौं,’ भुसालले शिलापत्रसँग भने ।

सवारीसाधनको भारबहन नियमनसम्बन्धी निर्देशिका, २०७४ अनुसार तोकिएको भारबहन क्षमताभन्दा बढी भार बोकेर आएका मालवाहक सवारीसाधनले प्रचलित कानुन अनुसारको जरिवाना गर्नुका साथै बढी भएको सामान झारेर सवारी धनीले त्यस्तो सामान भण्डारणको व्यवस्था मिलाउनु पर्ने व्यवस्था छ।

त्यस्तै भार छुट्याउन नमिल्ने सामानको कुल तौल तोकिएको भन्दा बढी भई ढुवानी गर्नु परेको अवस्थामा नजिकको यातायात व्यवस्था कार्यालयबाट पूर्व स्वीकृति लिएर मात्र ढुवानी गर्नुपर्ने निर्देशिकामा उल्लेख छ ।

विभागको यो निर्णयले राम्रो भएपनि दण्ड-जरिवाना कम भएको महानगरीय ट्राफिक प्रहरी महाशाखाका प्रवक्ता श्यामकृष्ण अधिकारी बताउँछन् ।

‘धेरै भार भएका गाडी थानकोटमा बिग्रियो भने सडक जाम हुनबाट रोक्न हामीले क्रेनले तानेर ल्याउनु पर्छ,’ उनले भने, ‘त्यो सवारीसाधनलाई दुई हजारभन्दा धेरै जरिवाना तिराउनु मिल्दैन । यसले त नियम पालना नगर्ने सवारी धनीलाई भन्दा सरकारलाई घाटा भयो । नियामक निकायले दण्ड-जरिवाना बढाउनु पर्ने देखिन्छ ।’

विभागको यो निर्णयले धेरै पक्षलाई फाइदा पुग्ने यातायातविद् आशिष गजुरेल बताउँछन् । सडक निश्चित लोडका लागि डिजाइन गरेर बनाइएको हुँदा यसरी ठूला गाडी ओभरलोड गुड्दा चाँडै सडक बिग्रिने उनले बताए ।

त्यस्तै मालवाहक सवारीसाधन यसरी ओभरलोड गरेर चल्दा दुर्घटनाको सम्भावना पनि उच्च हुने गजुरेलको तर्क छ ।

‘क्षमताभन्दा धेरै तौल राख्दा गाडीले तान्नसक्ने क्षमता घट्छ र उकालोमा ब्याक जाने, पल्टिने घटना पनि धेरै भइरहेका छन्,’ उनले भने, ‘त्यस्तै घुम्ती सडकमा पनि गाडीको ब्यालेन्स बिग्रिएर पल्टिएका उदाहरण छन् ।’

निर्णय राम्रो भएपनि कार्यान्वयनको पाटो अझ महत्वपूर्ण भएको उनले बताए । ‘यस्ता राम्रा निणर्यहरू धेरै भएपनि केही समय नियमित कार्यान्वयन गरेपछि निरन्तरता पाउँदैनन् । निरन्तरता पाए धेरै दुर्घटना टर्न सक्छन्,’ गजुरेलले भने ।

प्रकाशित मिति: सोमबार, चैत २, २०७७ १८:१४