आइडिया स्टुडियोको छनोट राउण्ड सुरु, २५ प्रतिस्पर्धीले सुनाए प्रविधिमैत्री किसान बन्ने योजना

आइडिया स्टुडियोको छनोट राउण्ड सुरु, २५ प्रतिस्पर्धीले सुनाए प्रविधिमैत्री किसान बन्ने योजना

A+ A A-

व्यवसायको बीजलाई मलिलो माटो दिने अनि हुर्काउन सहयोग पुर्‍याउने कार्यक्रम आइडिया स्टुडियोको सिजन–५ को लाइभ अडिसन आजदेखि सुरु भएको छ । काठमाडौंको केएमसी कलेजमा भएको कार्यक्रममा व्यवसायका लागि नयाँ सोच बोकेर आउने नयाँ २५ जना आइडिएटरले आफ्नो बिजनेस आइडिया प्रस्तुत गरेका छन् ।

कृषिमा आधारित रहेर आएका २५ वटा आइडियालाई कार्यक्रममा प्रस्तुत गरिएको थियो । अडिसन राउण्डमा विभिन्न जिल्लाका प्रतिस्पर्धीको उपस्थिति थियो । किशोरकिशोरीदेखि ६६ वर्षका वृद्धसम्मका प्रतिस्पर्धीहरूका नयाँ आइडिया कार्यक्रममा प्रस्तुत भए ।

कार्यक्रमको आकर्षणको केन्द्र बनेका पर्वतका ६६ वर्षे टीकाराम भुसालको बिजनेस आइडियाले कार्यक्रमलाई थप रोचक बनाएको थियो । उनले युवावस्थाका आइडिएटरलाई चुनौती दिँदै कृषिअन्तर्गत अदुवा, बेसारलगायतका उत्पादन तथा बजारीकरणसँग सम्बन्धित योजना निर्णायक मण्डललाई सुनाए । उनीसँगै २४ जना प्रतिस्पर्धीले पनि कृषिलाई यन्त्रीकरण कसरी गर्न सकिन्छ भन्नेबारेका योजना सुनाएका थिए ।

यस्तै, कार्यक्रममा नयाँ व्यावसायिक सोच बोकेर आउने प्रतिस्पर्धीहरूलाई हौसला दिनकै लागि पनि अघिल्ला वर्षका आइडिएटरहरूको उत्पादन पनि राखिएको थियो । जहाँ यसअगाडि प्रतिस्पर्धी बनेर आएका आइडिएटरहरूले आइडियालाई व्यवसायीकरण गर्दै उत्पादनलाई कार्यक्रममा प्रस्तुतसमेत गरेका थिए ।

कार्यक्रममा सहभागी प्रतिस्पर्धीहरूले व्यावसायिक वातावरणको उत्खनन आइडिया स्टुडियोले गरेको धारणा व्यक्त गरे । कार्यक्रममा आइडिया स्टुडियोका संस्थापक डा.छिरिङ लामा, सहसंस्थापक रुपेश श्रेष्ठ, प्रभु बैंककी माइक्रोफाइनान्स प्रमुख निर्मला विष्टलगायत ४० भन्दा बढी व्यक्तित्वको उपस्थिति थियो ।

सिजन- ५ का लागि ५ सय जनाको आवेदन परेकोमा छनोट राउण्डमा १ सय जना मात्र छानिएका थिए । जसमा पहिलो दिन २५ जनाले आफ्नाे आइडिया प्रस्तुत गरेका छन् भने सोमबार, मंगलबार र बुधबार पनि सोही संख्याका आइडिएटरले आइडिया प्रस्तुत गर्नेन्छ ।

छनोट राउण्डबाट उत्कृष्ट ठहरिएका ३५ जना आइडिएटरलाई डिल राउण्डमा लगिने आयोजक संस्था आइडिया स्टुडियोले जनाएको छ । कार्यक्रम ४ चैतसम्म संचालन हुनेछ ।

प्रकाशित मिति: आइतबार, चैत १, २०७७ १८:५१