‘स्पिड लेजर गन अभियान’ ट्राफिक प्रहरीको ‘पब्लिसिटी स्टन्ट’ मात्रै

A+ A A-

काठमाडौं उपत्यकामा सवारी दुर्घटनाको अवस्था भयावह छ । महानगरीय ट्राफिक प्रहरी महाशाखाको तथ्यांकअनुसार चालु आर्थिक वर्षको ७ महिनामा मात्रै ५ हजार ९ सय ८३ वटा दुर्घटना भए । जसमा एक सय ३ जनाले ज्यान गुमाएका छन् ।

महाशाखाका अनुसार सवारी दुर्घटनाको प्रमुख कारण तीब्र गति हो । तथ्यांकअनुसार यो ७ महिनाको अवधिमा तीब्र गतिका कारण मात्रै उपत्यकामा ३ सय ९२ वटा सवारीसाधन दुर्घटनामा परे ।

दुर्घटनाको मुख्य कारकमध्येको तीब्र गति नियन्त्रणमा ट्राफिक प्रहरी भने उदासीन देखिएको छ । मापसे, लेन क्रस, लाइसेन्स लगायतका चेकिङ नियमित रुपमा गरिएपनि गत वर्ष जेठमा निकै तामझामका साथ सुरु गरिएको स्पिड गन अभियानले निरन्तरता पाउन सकेको छैन ।

लकडाउन, राजनीतिक अस्थिरता, शिवरात्रि लगायतका कारणले तीब्र गति चेकिङ गर्न नसकिएको महाशाखाका प्रवक्ता तथा प्रहरी उपरीक्षक श्यामकृष्ण अधिकारीले बताए ।

‘चेकिङ गर्दै नगरेको त होइन तर यो बीचमा घटेका घटनाक्रमले यो अभियान केही ओझेलमा भने पक्कै परेको हो । हामी यसलाई फेरि कडाइका साथ पालना गर्छौं,’ अधिकारीले शिलापत्रसँग भने ।

१२ लाख सवारीलाई ११ वटा स्पिड गन

महाशाखाका अनुसार उपत्यकामा दैनिक १२ लाखभन्दा धेरै सवारीसाधन चल्छन् । यी सवारीसाधनको स्पिड जाँच्न भने महाशाखासँग जम्मा ११ वटा उपकरण छन् ।

यी उपकरणले उपत्यकाका सवारीसाधनको स्पिड जाँच्न नपुग्ने अधिकारीको तर्क छ । स्पिड गन नभएपनि चालकले तीब्र र उश्रृंखल तरिकाले चलाए तुरुन्तै कारबाही गरिने उनले बताए ।

‘उपत्यकामा स्पिड गुडाउने ठाउँ नै छैनन् । कलंकीदेखि भक्तपुरसम्मको बाटोका लागि ११ वटा मेसिनले पुग्छ । यद्यपि हामीले थप स्पिड गनका लागि ठेक्का प्रक्रिया अघि बढाइसकेका छौँ,’ उनले भने।

विज्ञ भन्छन्- ९० प्रतिशत दुर्घटनाको कारण तीब्र गति

सैद्धान्तिक रुपमा हेर्दा ९० प्रतिशत दुर्घटनाको कारण तीब्र गति भएको यातायात विज्ञ आशिष गजुरेलले बताए । नेपालमा स्पिड लिमिटको प्रावधान नै अवैज्ञानिक भएको गजुरेलको तर्क छ ।

‘पहिलो कुरा त हाम्रोमा स्पिड लिमिट निकै कम ठाउँमा लेखिएको छ तर त्यो पनि व्यवहारिक छैन,’ उनले शिलापत्रसँग भने ‘स्पिड लिमिट लेखिएको सडकमा १२ महिना, २४सैँ घण्टा एउटै हुन्छ तर त्यो बिहान झिसमिसे, दिउँसो, साझ, राति, झरी परेको लगायतको समयमा फरक-फरक हुनुपर्छ । त्यसका लागि स्पिड लिमिट आफैँ परिवर्तन हुने बोर्ड राख्नुपर्छ ।’

त्यसैगरी उपत्यकामा ११ वटा स्पिड गनले धान्न नसक्ने र स्पिड गन चेकिङ राम्रोसँग नभएको उनले स्पष्ट पारे । सडक सुरक्षाका लागि राज्यले कारबाहीमा मात्रै नभई सचेतना, उपकरण लगायतमा पनि लगानी गर्नुपर्ने उनी बताउँछन् । स्पिड लिमिट गर्नुपर्छ भनेर विभिन्न चरणमा छलफल भइरहेपनि व्यवहारमा उतार्न नसकिएको उनले बताए ।

‘यो सबैभन्दा महत्वपूर्ण कुरा हो। बोलीमा चाहिँ महत्व दिइएको छ तर व्यवहारमा उतार्न सकेका छैनौँ ।’

दिउँसोको समयमा धेरै दुर्घटना

महाशाखाको तथ्यांक अनुसार दिउँसोको समयमा धेरै दुर्घटना हुने गरेका छन् । पछिल्लो ७ महिनामा भएको ५ हजार ९ सय ८३ दुर्घटनामध्ये २ हजार ४ सय ४१ वटा दुर्घटना दिउँसो १२ देखि बेलुकी ६ बजेसम्म भएको तथ्यांकमा उल्लेख छ ।

यो समयमा सडकमा सवारीसाधनको चाप धेरै हुने भएकाले दुर्घटना पनि धेरै भएको अधिकारीले जानकारी दिए । त्यस्तै दुर्घटनामा दुईपांग्रे सवारीसाधन प्रयोगकर्ताको मृत्यु हुनेको दर उच्च छ ।

प्रकाशित मिति: आइतबार, चैत १, २०७७ १७:११