जसपामा ओलीसँग हच्चिएका नेता ज्यादा छन् (सांसद डा. सूर्यनारायण यादवको अन्तर्वार्ता)

जसपामा ओलीसँग हच्चिएका नेता ज्यादा छन् (सांसद डा. सूर्यनारायण यादवको अन्तर्वार्ता)

A+ A A-

जनता समाजावादी पार्टी (जसपा) भित्र एमालेसँग सत्ता साझेदारी गर्ने विषयमा नेताहरू विभाजित देखिएका छन् । पूर्व राष्ट्रिय जनता पार्टी (राजपा नेपाल)का नेता प्रधानमन्त्री एवं एमाले अध्यक्ष केपी ओलीसँग सहमति गरेर अघि बढ्न सकारात्मक देखिँदा पूर्व संघीय समाजवादी फोरम (ससफो)का नेता भने ओलीलाई विश्वास गर्ने पक्षमा देखिँदैनन् । तर, जसपा सांसद डा. सूर्यनारायण यादव संसदीय दलमा सरकारमा जान हतार गर्न नहुने पक्ष बलियो रहेकाे दाबी गर्छन् । शिलापत्रसँगको संवादमा सांसद यादवले ओली प्रवृत्तिसँग हच्किएका नेता जसपाभित्र ज्यादा रहेको बताएका हुन् । पूर्वससफो पक्षका सांसद यादवसँग शिलापत्रकर्मी नवराज कुँवरले गरेको संक्षिप्त कुराकानी :

एमाले नेतृत्वको सरकारलाई साथ दिने/नदिने विषयमा जसपाभित्र ठूलै रस्साकस्सी चलेको देखिन्छ, संसदीय दलभित्र अवस्था के छ ?

मान्यज्यूहरू पनि विभाजित देखिनुभएको छ । महन्थ ठाकुरजीले कार्यदल बनाएर सरकारसँग वार्ता गर्न पठाएको कुरा मिडियामा आएपछि मात्रै पार्टीका कतिपय साथीले थाहा पाउनुभयो । यसबारे बैठकमा कुरा उठेको थियो । तर, बैठकको मूल एजेन्डा विधान र संसदीय दलको नेता चयन थियो । त्यसैले सरकारमा जाने/नजाने, कसलाई सहयोग गर्ने भन्नेबारे गहन छलफलचाहिँ भएन ।

संसदीय दलमा कार्यदलबारे कसले के कुरा उठाए ?

पार्टीमा छलफल नै नगरी, पार्टीका अन्य शीर्ष नेतालाई थाहै नदिई किन कार्यदल बनाइयो भनेर नेताहरूले कुरा उठाउनुभयो । सबैलाई थाहै छ, अहिले जसपामा स्पष्ट दुईधार छ । प्रधानमन्त्री केपी ओलीलाई झट्टै विश्वास गर्न हुँदैन, आफ्ना मागहरू अक्षरशः पूरा गर्नेसँग गठबन्धन गर्नुपर्छ भन्ने एउटा पक्ष र ओलीले नै माग पूरा गरिदिन्छन् भने उनैसँग सहकार्य गर्न सकिन्छ भन्ने अर्को पक्ष । स्वाभाविक हो, अहिले ओलीतिर जान हतार गर्न हुँदैन भन्ने पक्षले महन्थजीलाई प्रश्न गरे ।

महन्थ ठाकुरले के जवाफ दिनुभयो त ?

पार्टीकै हितमा आफूले कार्यदल बनाएको भन्दै अध्यक्षले कहिलेकाहीँ बिना छलफल पनि निर्णय लिन सक्ने बताउनुभयो । अस्ति बैठकको सुरुमा उहाँले रेशम चौधरीसहित पक्राउ परेका आफ्ना नेता कार्यकर्ताको मुद्दाबारे छलफल गर्न प्रधानमन्त्रीले बोलाएकाले दुई जनालाई पठाएको बताउनुभएको थियो । तर, पछि सोही कार्यदलले सरकारी पक्षसँग वार्ता गर्ने भन्ने कुरा भयो । कार्यदलमा एकजना थप्ने कुरा पनि त्यहीँ भएको थियो ।

महन्थ ठाकुर, राजेन्द्र महतोलगायतका नेता एमालेसँग सहकार्य गर्न तयार देखिएका हुन् ?

बैठकमा उहाँहरूको प्रस्तुति हेर्दा त्यस्तै लाग्छ । विगतमा के भयो, त्यो भुलेर केपी ओलीसँग नयाँ सहमतिका आधारमा सहकार्य गर्नुपर्छ भन्ने उहाँहरूको मत छ ।

सरकारमा जाने/नजाने विषयमै जसपा फुट्ने आकलन पनि कतिपयल गरेका छन्, संसदीय दलमा देखिएको ध्रवीकरणले तपाईंलाई त्यस्तो महसुस गराउँदैन ?

संसदीय दलमा मान्यज्यूहहरू शीर्ष नेताहरूजस्तै विभाजित हुनुहुन्छ, यो सत्य हो । तर, पार्टी नै फुट्ला भन्ने त मलाई लाग्दैन ।

सरकारमा जाने र नजाने भन्नेमा कतातिर बढी मत छ ?

संसदीय दलको कुरा गर्ने हो भने धेरै साथी सरकारमा जान हतार गर्न हुँदैन भन्ने पक्षमै हुनुहुन्छ ।

बाहिरबाहिर सरकारमा जानु हुँदैन भने पनि भित्रीरूपमा पूर्वससफोका केही सांसदहरू नै सरकारमा जाने कुरामा सकारात्मक छन् भनिन्छ त !

मनको कुरा त मैले कसरी भन्नु र ! तर, विगतमा जस्तो उधारो सहमतिमा सरकारमा जान हुँदैन भन्ने पक्षमा धेरै साथीहरू एकमत हुनुहुन्छ ।

तपाईंलाई चाहिँ के लाग्छ, जसपा सरकारमा जान हुन्छ कि हुँदैन ?

हामीले लामो समय आफ्ना मागमुद्दाका लागि संघर्ष गरेका छौँ । अधिकार लागि भएका विभिन्न आन्दोलनका क्रममा पक्राउ परेका साथीहरू जेलमा हुनुहुन्छ । उहाँहरूलाई मुद्दा लगाइएको छ । हामीले विगतमा जेजस्ता माग राखेर आन्दोलन गर्‍यौँ, ती आन्दोलनलाई सम्मान र मागलाई सम्बोधन गर्न जसले दतारुकता देखाउँछ, उसैसँग सहकार्य गर्नुपर्छ । अहिले हतार गरेर भन्दा पनि छलफल गरेर विश्वासको वातावरण तयार गरेर अघि बढ्नुपर्छ भन्ने लाग्छ ।

कार्यदल बनेको छ । नेताहरू आफैं पनि अन्य पार्टीसँग छलफलमा हुनुहुन्छ । आजै मात्र कांग्रेस सभापति शेरबहादुर देउवासँग पनि छलफल गर्दै हुनुहुन्छ । आशा गरौँ, छिट्टै कुनै न कुनै निकास निस्किएला ।

प्रकाशित मिति: शुक्रबार, फागुन २८, २०७७ १५:५१