मेडिकल सुपरिन्टेन्डेन्टका कारण असुरक्षित भएको भन्दै चिकित्सक आन्दोलनमा, मेसु भन्छन्– दुर्व्यवहार गरेको छैन

मेडिकल सुपरिन्टेन्डेन्टका कारण असुरक्षित भएको भन्दै चिकित्सक आन्दोलनमा, मेसु भन्छन्– दुर्व्यवहार गरेको छैन

A+ A A-

सप्तरीको राजविराजस्थित गजेन्द्रनारायण सिंह अस्पतालमा कार्यरत चिकित्सकहरूले सुरक्षाको माग गरेका छन् । आफूहरू असुरक्षित भएको भन्दै उनीहरूले बिहीबार सुरक्षाको सुनिश्चितता हुनुपर्ने माग राखी राजविराजमा प्रदर्शन गरे ।

गए राति अस्पतालका निमित्त मेडिकल सुपरिन्टेन्डेन्ट डा. रञ्जितकुमार झासहित २०-२२ जनाको समूहले निवासमै आएर ढोका छोडफोड गरी डा. अजय चौधरीमाथि दुर्व्यवहार गरेको उनीहरूले आरोप लगाएका छन् ।

डा. चौधरीसहितका चिकित्सकले बिहीबार पत्रकार सम्मेलन गरी निजी क्लिनिकलाई प्राथमिकतामा राखेर डा. झा अघि बढेको र त्यसलाई न्यूनिकरण गर्न खोज्दा आफूसहितका चिकित्सकलाई होच्याउँदै आएको बताएका छन् ।

‘मैले इर्मेजेन्सीमा आएका बिरामीलाई राम्रो उपचार सेवा दिँदै आएको छु, रिफरै गर्नुपर्दा सम्भव भएसम्म धरानस्थित सरकारी अस्पताल पठाउँदै आएको पनि छु’, इर्मेजेन्सी शाखाका इन्चार्ज चौधरीले भने, ‘तर मेसु साबलाई ती कुराहरू अपाच्य हुँदै आइरहेको छ ।’

आफूहरूको कार्यले निजी क्लिनिकमा बिरामी घट्न थालेपछि मेसुले आक्रमक शैली अपनाएको उनले आरोप लगाए । ‘राति ११ बजेतिर भएको घटनाले नै हामी न्यायको गुहार माग्न बाध्य भयौँ’, उनले भने, ‘यसअघि पनि मेसु साबले हामीसँग गर्ने व्यवहार होच्याउने खालकै रह्यो । बिरामीकै अगाडि हेपेर कुरा गर्नुहुन्छ ।’

मेसुले होच्याउँदा पनि अस्पतालको बदनामी हुने डरले आफूहरूले चुप लागेर काम गर्दै आएको उनले बताए । ‘तर अब कसरी सहन सकिन्छ ? राति सुतेकै बेला मदिरा सेवन गरेर समूह लिएरै आउनुहुन्छ र गालीगलौज गर्दै दुर्व्यवहार गर्नुहुन्छ’, उनले भने, ‘उहाँहरू समूहसहित आउँदा मैले ढोका नै नखोलेपछि जोगिएँ । नभए कुटपिटसम्म गर्नुहुन्थ्यो । पछि चिनजानका सबैलाई फोन गरेँ । उहाँहरू आएपछि म जोगिन पुगेँ ।’

पत्रकार सम्मेलनमा उपस्थित डा. राजीव मिश्र, डा. ज्ञानेन्द्रकुमार झा, डा. जितेन्द्रकुमार यादव, डा. सञ्जीव साहलगायतले चिकित्सकको सुरक्षाको सुनिश्चितता हुनेतर्फ पहल गरिदिन सबैमा आग्रह गरे । पत्रकार सम्मेलनपछि प्रदर्शन तथा र्‍यालीसहित जिल्ला प्रहरी कार्यालय पुगेर चिकित्सकले मेसु झाविरुद्ध जाहेरी दिएका छन् ।

के भन्छन् डा. झा ?

अस्पतालका मेसु डा. झाले पनि बिहीबारै पत्रकार सम्मेलन गरेर आफूमाथि दुर्व्यवहार भएको बताए । ‘राति १२ बजेको समयमा डा. चौधरीसहितका १ सय जनाको समूहमा आएका व्यक्तिहरूले आफ्नो निवासको ढोका तोडफोड गरेका छन्’, उनले भने, ‘उल्टै मैले नै दुर्व्यवहार गरेँ भनेर अनावश्यक प्रचारबाजी भइरहेको पाएपछि पत्रकार सम्मेलन राख्नुपर्‍यो ।’

डा. चौधरी वा अन्य कुनै चिकित्सकलाई आफूले होच्याउने खालको व्यवहार नगरेको उनले बताए । ‘इमर्जेन्सीमा अनावश्यक र मनोमानी ढंगले काम भइरहँदा मैले सुझाव दिन पाउने कि नपाउने ? अस्पताल सुधारका लागि मैले सुझाव दिँदा र केही चिकित्सकलाई स्पष्टीकरण माग गर्दा यो झमेला झिकेको छ’, उनले भने, ‘जसले जे भने पनि म अस्पतालमा उपचार सेवा सुधार गर्न प्रयास गर्छु र गरिरहनेछु ।’

अस्पतालमा केही चिकित्सककै कारण उपचार सेवामा समस्या भइरहेको उनले बताए । ‘कर्मचारी यहाँका हुन् तर उपचारचाहिँ निजी अस्पतालमा गएर गर्ने ?’ उनले भने, ‘त्यही काम यहाँ गर्न लगाउँदा गर्नै नमान्ने ? यही कुरामा कस्न खोज्दा मैमाथि आरोप लगाइएको छ ।’

चिकित्सकहरूले लगाएको आरोपहरू सावित भए राजीनामा दिने उनले बताए ।

प्रकाशित मिति: शुक्रबार, फागुन २८, २०७७ ०८:४५