बालुवाटार बैठकपछि लेखराज भट्टसँग अन्तर्वार्ता : प्रधानमन्त्रीले असहज नमान्न भन्नुभयाे

बालुवाटार बैठकपछि लेखराज भट्टसँग अन्तर्वार्ता : प्रधानमन्त्रीले असहज नमान्न भन्नुभयाे

A+ A A-

प्रधानमन्त्री केपी ओलीले आज माओवादीतर्फका मन्त्रीहरूसँग छलफल गरेका छन् । सर्वोच्च अदालतको पछिल्लो फैसलापछि उत्पन्न परिस्थिबारे बालुवाटारमा प्रधानमन्त्रीसित करिब १ घण्टा छलफल भएको उद्योग, वाणिज्य तथा आपूर्तिमन्त्री लेखराज भट्टले शिलापत्रलाई जानकारी दिए । यसै सन्दर्भमा मन्त्री भट्टसँग शिलापत्रकर्मी नवराज कुँवरले गरेको संक्षिप्त कुराकानी ः

प्रधानमन्त्रीसँग बालुवाटारमा के विषयमा छलफल गर्नुभयो ?

समसामयिक राजनीतिक घटनाक्रममाथि छलफल भएको हो ।

सर्वोच्च अदालतको पछिल्लो फैसलापछि ओली समूहमा रहेका माओवादी धारका मन्त्रीहरू बढी अप्ठेरोमा परेको भनिँदै छ, प्रधानमन्त्रीबाट कुनै सान्त्वना/आश्वासन पाउनुभयो ?

हामी के अप्ठेरोमा पर्नु नि ! पदका लागि कित्ता परिवर्तन गरेका थिएनौँ/होइनौँ । र, प्रधानमन्त्रीले आश्वासन दिने कुरा पनि होइन । अब कसरी अघि बढ्दा राम्रो हुन्छ भन्ने विषयमा छलफल हो । यहाँ कसैले आश्वासन दिने, कसैले विश्वास दिलाउने कुरै छैन । पार्टीका कमिटीहरूबारे चाहिँ प्रधानमन्त्री स्वयम्‌ले कुरा निकालेर सामान्य छलफल भयाे । निचाेड यसै भन्ने निस्केकाे छैन ।

प्रधानमन्त्रीले केही त भन्नुभयो होला नि तपाईंहरूलाई ?

प्रधानमन्त्रीज्यूले हामीसँग केही राय माग्नुभयो । पछिल्लो परिस्थितिमा असहज महसुस नगर्न भन्नुभयो । त्यही हो ।

अनि तपाईंहरूले चाहिँ के भन्नुभयो ?

हामीले सकेसम्म कम्युनिस्ट एकतामा जोड दिनुपर्छ भन्ने कुरा गर्‍यौँ । अहिलेसम्म जे भयो, ती सबैलाई बिर्सेर अझै पनि एकताको पहल गरिराख्नुपर्छ भन्ने सुझाव दियौँ ।

भनेपछि एमाले र माओवादी मिल्नुपर्छ भन्ने तपाईंहरूको राय हो ?

यो पार्टी, त्यो पार्टी होइन । समग्र कम्युनिस्टहरू एक ठाउँमा उभिनुपर्छ र त्यो कामको नेतृत्व तपाईंले गर्नुहोस् भनेर हामीले सुझाव दिएका हौँ ।

तपाईंहरू पुरानो घर (माओवादी) मा नफर्किने निचोडमा पुग्नुभएको हो ?

पुरानो घर फर्किने, नफर्किने सवालै भएन । अब कसरी अघि बढ्ने भन्नेबारे साथीहरूसँग छलफल भइनै रहेको छ ।

गृहमन्त्री बादलले बैठकमा केही बोल्नुभयो ?

अँ, उहाँले पनि कम्युनिस्ट एकतामै बोल्नुभयो । जनताले कम्युनिस्ट एकता रुचाएकाले आगामी दिनमा एकताको प्रयासबाट पछि हट्न नहुनेमा उहाँको जोड थियो ।

नयाँ सरकार र सत्ता समीकरणबारे केही छलफल भयो ?

सरकारबारे केही छलफल भएन ।

अब तपाईंहरूचाहिँ कसरी अघि बढ्नुहुन्छ ?

यसबारे हामी छलफल गरिरहेका छौँ । एउटा कुरा के निश्चित हो भने, हामी मुलुकको समृद्धिको पक्षमा र कम्युनिस्ट एकताको पक्षमा रहनेछौँ र सोहीअनुसार अघि बढ्नेछौँ ।

प्रकाशित मिति: मंगलबार, फागुन २५, २०७७ १५:१४