सर्वोच्चको फैसला राजनीतिक आग्रहबाट प्ररित भएको प्रचण्ड–माधव समूहको निष्कर्ष

सर्वोच्चको फैसला राजनीतिक आग्रहबाट प्ररित भएको प्रचण्ड–माधव समूहको निष्कर्ष

A+ A A-

नेकपा प्रचण्ड–माधव समूहको स्थायी कमिटी बैठकले सर्वोच्च अदालतको फैसला राजनीतिक आग्रहले प्ररित भएको निष्कर्ष निकालेको छ । सोमबार पार्टी कार्यालय पेरिसडाँडामा बसेको बैठकले सर्वोच्च अदालतले नेकपा आधिकारिकताको सन्दर्भमा गरेको फैसलामा असहमति राखेको हो ।

पार्टीले फैसलाको न्यायिक पुनरावलोकनको प्रक्रियामा जाने पनि निर्णय गरेको छ । बैठकपछि निर्णय सुनाउँदै प्रवक्ता नारायणकाजी श्रेष्ठले सर्वोच्च अदालतको फैसला कार्यान्वयनको प्रक्रियामा जाने निर्णय गरेको बताए ।

‘फैसला कार्यान्वयनको प्रक्रियामा जाने क्रममा अदालतले भने अनुसार तत्कालिन माओवादी केन्द्र र नेकपा एमाले बन्ने नै भयो । यद्यपि हामी न्यायिक पुनरावलोकनको प्रक्रियामा पनि जादैँछौ,' उनले भने, 'राजनीति ढंगले त हामिले यसको असहमति र प्रतिवाद गरेकै छौँ । त्यस क्रममा हामीले पार्टी एकताको उद्देश्य सही भएको र पार्टी एकताको कार्य पनि सही भएको कारणले यस प्रक्रियामा अगाडि बढ्न जे सम्भव छ त्यो पहलकदमीलाई जारी राख्छौँ ।’

प्रवक्ता श्रेष्ठले सर्वोच्च अदालतले रिट निवेदकको मागदाबीभन्दा बाहिर गएर राजनीतिक फैसलाको रूपमा फैसला गर्ने निष्कर्ष निकालेको पनि जानकारी दिए । ‘बैठकले सर्वोच्च अदालतले गरेको फैसला रिट निवेदकको मागदाबीभन्दा बाहिर गएर गरिएको राजनीतिक फैसलाको रुपमा लिइएको छ । पार्टीको नाम सम्बन्धमा परेको रिट निवेदन हुँदाहुँदै नामको बारेमा निष्कर्ष निकाल्नुपर्ने आदेश गर्नुपर्ने यसको उत्तरदायित्व, जिम्मेवारी हुँदाहुँदै त्यो भन्दा बाहिर गएर फैसला गरिएको छ,' उनले भने, 'यस सन्दर्भमा हामीले राजनीतिक रूपमा आफ्नो दृष्टिकोण र विचार राख्ने र त्यसलाई अगाडी बढाउने, कानुनी ढंगले पनि उपयुक्त उपचार खोज्ने, संघर्ष गर्ने प्रक्रिया पनि अगाडि बढाउने छौँ ।’

प्रचण्ड–माधव समूहको रूपमा यो अन्तिम बैठक रहेको प्रवक्ता श्रेष्ठले बताए । अब सर्वोच्च अदालतको फैसलाअनुसार तत्कालीन नेकपा(एमाले) र नेकपा(माओवादी केन्द्र) ब्युतिने भएको छ । नेकपा केपी ओली समूहले सर्वोच्च अदालतको फैसला स्वीकार गर्ने यसअघि नै प्रतिक्रिया दिइसकेको छ ।