ओली ठीक ठाउँमा छन्, हामी एमालेमै हुन्छौं : मणि थापा, खानेपानी मन्त्री (अन्तर्वार्ता)

ओली ठीक ठाउँमा छन्, हामी एमालेमै हुन्छौं : मणि थापा, खानेपानी मन्त्री (अन्तर्वार्ता)

A+ A A-

२३ फागुनको सर्वोच्च अदालतको फैसलाले एमाले र माओवादी केन्द्रको एकीकरण बदर गरिदियो । नेकपाको दुई लाइन संघर्षको नेतृत्व केपी ओली र पुष्पकमल दाहाल प्रचण्डले गरेका थिए । ओलीतिर पूर्वमाओवादीका केही नेता र सांसद लागेका थिए भने पूर्वएमालेका सांसद र नेता प्रचण्डतिर लागेका थिए । सर्वोच्चको फैसलाले दुवै प्रभावित भए । मुलतः सांसदहरूले आफ्नो पद जोगाउने हो भने पूर्वएमालेका सांसद एमालेमै फर्किनुपर्ने र पूर्वमाओवादीका सांसद पूर्वमाओवादीमै फर्किनुपर्ने भयो । नत्र दल त्यागसम्बन्धी निर्णय गरेर जो जहाँ छन् त्यही बस्न सक्ने अवस्था पनि छ । तर, प्रचण्डसँग रहेका एमालेका सांसदहरू भने एमालेमै फर्किने भएका छन् । पूर्वमाओवादीबाट सांसद भएका नेताहरू जो अहिले ओलीसँग जोडिएका छन्,उनीहरू भने माओवादी केन्द्रमा नफर्किने भएका छन् । त्यही विषयमा केन्द्रीत भई माओवादी केन्द्रबाट एमालेमा रहने निर्णय गरेका खानेपानी मन्त्री मणिचन्द्र थापासँग गरिएको संक्षिप्त कुराकानी :

० तपाईंहरू पहिला माओवादी केन्द्रमा हुनुहुन्थ्यो सर्वोच्च अदालतको फैसलापछि कता लाग्नुहुन्छ ?

हामीले राजनीतिक निर्णय लिएर केपी ओलीलाई साथ दिएको हो । यो वैचारिक कुरा पनि हो । त्यसैले हामी जहाँ थियौं, त्यही रहन्छौं । सर्वोच्च अदालतको फैसलाले नेकपाको एकीकरणलाई बदर गर्‍यो र एमाले, माओवादी केन्द्रलाई पूर्वअवस्थामा पुर्‍यायो । यो फैसलालाई हामी सम्मान गछौं तर राजनीतिक निर्णयमा फरक पर्दैन ।

० नेकपा एकीकरण बदर भएपछि माओवादी केन्द्रबाट सांसद भएका नेताहरूको त सांसद पद नै नरहने अवस्था रहन्छ नि ?

हामीले लिएको निर्णय कानुनीभन्दा पनि राजनीतिक निर्णय भएकोले यसमा सांसद वा मन्त्री पदको कुरा भएन । मन्त्री र सांसद पदको लोभ पनि छैन । हामीले लिने राजनीतिक निर्णय नै महत्वपूर्ण हुन्छ । राजनीतिक निर्णयका अघि पदीय जिम्मेवारी भन्ने कुरा गौण हुन्छ । प्रचण्डजीले कारबाही गरे पनि केही फरक पर्दैन ।

० भनेपछि अब कसैगरी पनि प्रचण्ड नेतृत्वको माओवादी केन्द्रमा नफर्केने, ओली नेतृत्वको एमालेमै प्रवेश गर्ने ?

जब एमाले र माओवादी केन्द्र मिलेर नेकपा भन्यौ, त्यो बेला यताका सबै परिघटनालाई विश्लेषण गर्न आवश्यक छ । नेकपा बनिसकेपछि भएको दुई लाइन संघर्ष, संसद विघटन, त्यसको पुनर्स्थापना र हिजोको अदालतको फैसलासम्म आइपुग्दा केपी ओलीले लिएको लाइन ठीक छ भन्ने पुष्टि भयो । ओली ठीक ठाउँमा छन् भन्ने हाम्रो निष्कर्ष हो । त्यो निष्कर्षपछि माओवादी केन्द्रमा फर्किने नफर्किने भन्ने कुरै भएन ।

० तपाईं र दावा लामालाई त फरक नपर्ला, तर अरु सांसद रहेका नेताहरूलाई फरक पर्ला नि ?

सांसद हुने साथीहरूको सांसद पद नरहला भन्ने कुरा हो । त्यो रहेन भने पनि ठीकै छ । टोपबहादुर रायमाझी, बादलजीहरूको कुरा गर्नुभएको होला, त्यसमा माधव नेपाल, झलनाथ खनालहरूको कुरा पनि त हुन्छ नि !

० अब प्रधानमन्त्री केपी ओलीको लाइन के हो त ?

सरकार अहिलेसम्म त बहुमतमै छ । माओवादी केन्द्रले समर्थन फिर्ता लिइसकेको छैन । माओवादी केन्द्रले समर्थन फिर्ता लिएको अवस्थामा मात्रै प्रधानमन्त्रीले विश्वासको मत लिने हो । त्यो कुरा माओवादीले निर्णय गरेपछि सोचौंला नि ।

० तपाईंहरू एमालेमै रहने कुराले ‘अर्ली इलेक्सन’को सम्भावनाकाे संकेत गरेकाे हाे ?

पत्रकारहरूले त्यो कुरा गर्नु अस्वभाविक भएन । अर्ली इलेक्सन हुने भयो भनेर हामी एमालेमा रहने भनेको होइन । राजनीतिक निर्णयका अगाडि ती सबै गौण हुन्छ ।

प्रकाशित मिति: सोमबार, फागुन २४, २०७७ १७:५४