निजी क्षेत्रका संस्थाले बजेट सुझाव संयुक्त बुझाउने

A+ A A-

निजी क्षेत्रका प्रतिनिधिमूलक संघ संस्थाले आगामी आवको बजेटका लागि संयुक्त सुझाव दिने भएका छन् । यसअघि बेग्ला बेग्लै सुझाव दिँदै आएका नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले आगामी आर्थिक वर्षका लागि एउटै सुझाव दिन लागेका हुन् ।

आफूहरूका समस्या र सम्भावना साझा भएकाले सबै संस्थाले एउटै सुझाव दिन लागिएको नेपाल उद्योग वाणिज्य महासंघका उपाध्यक्ष उमेशलाल श्रेष्ठले जानकारी दिए । बेग्लाबेग्लै सुझाव दिँदा कतिपय अवस्थामा आशय बाझिने भएकाले एउटै सुझाव दिन लागिएको उपाध्यक्ष श्रेष्ठको भनाइ छ ।

‘निजी क्षेत्रका समस्या साझा नै हुन्छन्, बेग्लाबेग्लै सुझाव दिँदा कतिपय अवस्थामा आशय बाझिने गरेको पनि छ । त्यसैले यसपटक सबै मिलेर एउटै सुझाव दिऊ भन्ने भएको हो,’ उपाध्यक्ष श्रेष्ठले शिलापत्रसँग भने ।

महासंघ, परिसंघ र चेम्बरले बजेटका लागि एउटै सुझाव दिएको उदाहरण एकदमै कम छन् । दुई वर्षअगाडि पनि यसैगरी संयुक्त सुझाव दिइएको थियो । तर, त्यसपछि संयुक्त सुझाव दिने कार्यले निरन्तरता पाएन ।

अर्थमन्त्री डा. युवराज खतिवडाले औपचारिक कार्यक्रममा पनि व्यावसायिक वृत्तबाट एउटै आवाज आए आफूलाई नीति निर्माण गर्न सहज हुने बताउँदै आएका छन् । निजी क्षेत्रका प्रतिनिधिमूलक संस्थाले एउटै विषयमा एउटाले एकथरी र अर्काेले अर्काेथरी कुरा गर्दा नीति निर्माणमा अन्योल सिर्जना भएको अर्थमन्त्री खतिवडाको भनाइ छ ।

आगामी आवका लागि दिइने सुझावको मस्यौदा तयार भएको परिसंघका महानिर्देशक मेघनाथ न्यौपानेले जानकारी दिए । सुझाव तयार भइसकेकाले यही साताभित्रमा अर्थमन्त्रीलाई बुझाइसकिने न्यौपानेको भनाइ छ ।

‘संयुक्त सुझाव तयार भइसकेको छ । अर्थमन्त्रीज्यूको समय मिलाउँदै छौं । सम्भवतः यो साता नै अर्थमन्त्रीलाई सुझाव दिइसकिन्छ होला,’ महानिर्देशक न्यौपानेले भने । महासंघका निमित्त महानिर्देशक गोपाल तिवारीले पनि अर्थमन्त्रीलाई बुझाइने सुझावको तयारी पूरा भइसकेको जानकारी दिए ।

सरकारले आगामी आवका लागि १५ जेठमा बजेट ल्याउँदै छ । सो बजेटका लागि सरोकारवाला निकाय, संघ संस्था, विज्ञ तथा नागरिकस्तरमा पनि सुझाव लिने गरिन्छ । अर्थ मन्त्रालयले अहिले यस्तै सुझाव संकलन गरिरहेको छ ।

प्रकाशित मिति: सोमबार, वैशाख ३०, २०७६ ०३:२४