प्रधानमन्त्री कृषि परियोजनाबाट किसान नै मारमा !

फाइल फाेटाे

A+ A A-

दक्ष प्राविधिकको अभावका कारण प्रधानमन्त्री कृषि आधुनिकीकरण परियोजना प्रभावहीन बन्दै गएको छ । व्यावसायिक कृषिजन्य उद्योग स्थापना गरी मुलुकलाई कृषिमा आत्मनिर्भर बनाउन यो परियोजना लागू गरिएको थियो ।

किसान हाइटक प्रविधितर्फ आकर्षित भए पनि अनुदानसहितको अत्याधुनिक प्रविधिमा विज्ञको अभावले किसान मर्कामा परेका छन् । नयाँ प्रविधिसँगै कृषि उत्पादनबाट अत्यधिक नाफा कमाउने उद्देश्य लिएका किसान अहिले घाटामा छन् ।

नोक्सानी भोग्न बाध्य किसान प्रधानमन्त्री कृषि आधुनिकीकरण परियोजनाप्रति नै आक्रोशित छन् । कास्कीको पोखरा महानगरपालिका वडा–१४ चाउथेस्थित खामघले कृषि फार्मका सञ्चालक केबलबहादुर गौतम व्यवसाय घाटा गराएको बताउँछन् । प्रविधिपछि प्राविधिक भित्र्याउने सरकारको गलत प्रवृत्तिका कारण आफूहरु समस्यामा परेको उनको भनाइ छ ।

उनले हाइटेक भनिए पनि हाइटेकमा हुनुपर्ने प्राविधिक पक्ष नभएको र सो प्रणालीमा उत्पादन गरिने तरकारी बालीबारे यथेष्ट जानकारी नहुँदा समस्या परेको बताए ।

पोखरा महानगरपालिका वडा–२५ हेम्जा पहरीखेतस्थित हेम्जा एग्रो फार्मका शालिकराम बाँस्तोलाको समस्या पनि त्यस्तै छ । उनले १२ वटा सहकारी संस्था र सरकारको ८५ प्रतिशत अनुदानमा सुरु गरेको हाइटेक ग्रिन हाउस परियोजनाबाट २ वर्षमा १३ लाख घाटा बेहोरेका छन् ।

उनले हाइटेक ग्रिन हाउसमा लगाउने बाली, रोगलगायतका प्राविधिक पक्षको जानकारी नहुँदा ठूलो समस्या भएको बताए ।

वरिष्ठ कृषि अधिकृत वसन्तकुमार श्रेष्ठले जानकारीबिना नै प्रविधि आएको भए पनि आफूहरुले सक्दो सहयोग गरेको दाबी गरे ।

उनले प्रविधिमा देखिएका समस्याबारे विभिन्न अनुसन्धान गरी समाधान गर्ने प्रयास भइरहेको बताए ।

नयाँ प्रविधिका कारण बालीमा फूल तथा फल नलाग्ने समस्या समाधानका लागि इन्टर्नका रूपमा कृषि तथा वन विज्ञान विश्वविद्यालबाट आएका विद्यार्थीले नै अनुसन्धान गरी बाली प्रवद्र्धनमा सघाउँदै आएका छन् ।

महत्त्वकांक्षी योजनाका रूपमा सरकारले २०७३/७४ बाट प्रधानमन्त्री कृषि आधुनिकीकरण परियोजना सञ्चालनमा ल्याएको थियो ।

कार्यक्रमअन्तर्गत कृषि विकास मन्त्रालयले साना व्यावसायिक कृषि उत्पादन केन्द्र पकेट, व्यावसायिक कृषि उत्पादन केन्द्र (ब्लक), व्यावसायिक कृषि उत्पादन तथा प्रशोधन केन्द्र (जोन) र कृषि औद्योगिक क्षेत्र(सुपर जोन) का रूपमा जिल्लाहरुलाई वर्गीकरण गरी कार्यक्रम सञ्चालन गरिएको छ ।

प्रकाशित मिति: सोमबार, वैशाख ३०, २०७६ ०२:४०