एनसेल र धुलिखेल अस्पतालको सहकार्यमा टेलिमेडिसिन र स्वास्थ्य सूचना कार्यक्रम सुरु

एनसेल र धुलिखेल अस्पतालको सहकार्यमा टेलिमेडिसिन र स्वास्थ्य सूचना कार्यक्रम सुरु

A+ A A-

एनसेल आजियाटा लिमिटेडले काभ्रेकाे धुलिखेल अस्पतालसँगको सहकार्यमा टेलिमेडिसिन र स्वास्थ्य सूचना कार्यक्रम सुरु गरेको छ ।

एनसेलका प्रमुख कार्यकारी अधिकृत (सीईओ) एन्डी चोङ र धुलिखेल अस्पतालका प्रशासकीय निर्देशक डा. रमेश मकाजूले धुलिखेल अस्पतालमा स्थापित एनसेल–धुलिखेल अस्पताल टेलिमेडिसिन र स्वास्थ्य सेवा सूचना केन्द्रको उद्घाटन गरेका हुन् ।

एनसेलका सीईओ एन्डी चोङले साे अवसरमा अस्पतालअन्तर्गत सञ्चालनमा रहेका चारवटा स्वास्थ्य केन्द्रलाई टेलिमेडिसिन उपकरण हस्तान्तरण गरे ।

प्रविधि तथा तथ्याङ्कमा आधारित स्वास्थ्य सेवा प्रदान गर्ने विधि अपनाई ग्रामीण, दूरदराजका सेवाबाट वञ्चित समुदायलाई गुणस्तरीय स्वास्थ्य सेवा प्रदान गर्ने यस कार्यक्रमको उद्देश्य रहेकाे बताइएकाे छ ।

एनसेलले धुलिखेल अस्पतालद्वारा ग्रामीण भेगमा सञ्चालन गरिरहेका स्वास्थ्य केन्द्रहरूलाई टेलिमेडिसिन उपकरण र सेवा प्रवाहका लागि आवश्यक कनेक्टिभिटी पूर्वाधार निर्माण गरी हस्तान्तरण पनि गर्दै छ । धुलिखेल अस्पतालको तर्फबाट मानव संसाधनजस्तै चिकित्सक र परामर्शदातालगायत कार्यक्रम सञ्चालनका लागि आवश्यक अन्य सहयोगहरू प्रदान हुँदै छ । अस्पतालले कार्यक्रमलाई सफलतापूर्वक सञ्चालन गर्न आवधिक ट्रेनिङ र अनुगमनलगायतका कामहरू पनि गर्नेछ ।

एनसेलका अनुसार पहिलो चरणमा सिन्धुपाल्चोकको मानेखर्क, खोलुखुम्बुको डोर्पु, नुवाकोटको थाङसिन र काभ्रेपलाञ्चोकको बोल्डेमा रहेका सामुदायिक स्वास्थ्य केन्द्रमार्फत कार्यक्रम सञ्चालन हुनेछ । यी केन्द्रले कुल १५ हजारभन्दा बढी घरधुरीका जनसमुदायहरुलाई सेवा प्रवाह गर्दछ ।

कार्यक्रम सञ्चालनमा आएपछि स्थानीयहरूले दीर्घ रोग, नसर्ने रोग, सरुवा रोगलगायतका रोगको उपचार सेवा पाउनेछन् । अबको चार वर्षमा यो कार्यक्रम २० वा सोभन्दा बढी स्वास्थ्य केन्द्रमा लागू गर्ने एनसेलको योजना छ ।

कार्यक्रममा सीईओ चोङले भने, 'स्वास्थ्य क्षेत्र हाम्रो व्यावसायिक सामाजिक जिम्मेवारीमा प्रमुख प्राथमिकतामा छ । स्वास्थ्य सेवाबाट बञ्चित समुदायलाई गुणस्तरीय स्वास्थ्य सेवा प्रदान गर्ने मात्र नभई तत्काल जीवनरक्षा गर्न सक्ने यो कार्यक्रमका लागि धुलिखेल अस्पतालसँग सहकार्य गर्न पाएकोमा गौरवान्वित छौँ । स्वास्थ्य सेवा केन्द्रहरूले गुणस्तरीय सेवामा स्थानीय समुदायको पहुँच सहज बनाउँदै जीवनरक्षा गर्ने, साथै उनीहरूको स्रोत र समय बचत गर्न यस कार्यक्रमले योगदान गर्ने आशा लिएका छौँ ।'

अस्पतालका प्रशासकीय निर्देशक मकाजूले भने, 'प्रविधिको प्रयोगमार्फत दूरदराजमा गुणस्तरीय स्वास्थ्य सेवा प्रदान गर्नका लागि एनसेल–धुलिखेल अस्पताल टेलिमेडिसिन र स्वास्थ्य सेवा सूचना केन्द्रको उद्घाटन एउटा ठूलो उपलब्धि हो । यस परियोजनामा पर्सनलाइज्ड हेल्थ प्रोग्राम (पीएचपी) पनि समावेश गरिएकाले यो पहिलो र नयाँ कार्यक्रम हो । आफ्नो व्यावसायिक सामाजिक उत्तरदायित्वअन्तर्गत एनसेलले खुला हृदयका साथ सहकार्य गरेकोमा हामी धेरै खुसी छौँ । चाँडोभन्दा चाँडो हाम्रा स्वास्थ्य केन्द्रहरूमा टेलिमेडिसिन उपकरणहरू जडान गरी सेवा प्रदान गर्न हामी उत्साहित छौँ ।'

धुलिखेल अस्पतालका संस्थापक तथा कार्यकारी निर्देशक प्रा.डा. राम कण्ठ मकाजू श्रेष्ठले भने, 'यस नवीन कार्यक्रमले ज्ञानलाई पनि हेर्न सकिने बनाउन सकिन्छ भनेर सिद्ध गरेको छ । स्वास्थ्य सेवामा पहुँच नभएकाहरूसम्म पुग्न अनि हाम्रो २५ वर्षअघि देखिको परिकल्पनाअनुसार ग्रामीण र दुर्गम भेगका जनताका घरदैलोमा नै सेवा प्रदान गर्न सबल बनाउने यो सहयोग प्रदान गरेकोमा हामी एनसेलप्रति आभारी छौँ ।'

एनसेलले २०७६ साउनमा धुलिखेल अस्पतालसँग टेलिमेडिसिन र हेल्थ इन्फर्मेटिक्स कार्यक्रम सञ्चालनका लागि सम्झौता गरेको थियो । प्रविधि तथा तथ्याङ्कमा आधारित स्वास्थ्य सेवा प्रदान गर्ने विधि अपनाई ग्रामीण, दूरदराजका सेवाबाट वञ्चित समुदायलाई गुणस्तरीय स्वास्थ्य सेवा प्रदान गर्ने यस कार्यक्रमको मुख्य उद्देश्य हो ।

प्रकाशित मिति: आइतबार, फागुन २३, २०७७ १७:३९