'कमेडी च्याम्पियन २' का प्रतियोगी: स्वास्थ्यकर्मी, सुरक्षाकर्मीदेखि विदेशबाट आउनेसम्म

'कमेडी च्याम्पियन २' का प्रतियोगी: स्वास्थ्यकर्मी, सुरक्षाकर्मीदेखि विदेशबाट आउनेसम्म

A+ A A-

कमेडी रियालिटी शो 'कमेडी च्याम्पियन' पहिलो सिजनबाट नै चर्चामा रह्यो । सुस्त सुरुवात गरेको कमेडी च्याम्पियनले विस्तारै गति लिएको थियो । सुरुवाती दिनमा आर्थिक संकट खेपेको कमेडी च्याम्पियन टिमलाई फाइनलसम्म आइपुग्दा विज्ञापन राख्ने ठाउँ पुगेन ।

सोही चर्चा देखेपछि कान्तिपुर टीभीले कमेडी च्याम्पियन पाँच वर्षका लागि किन्यो । त्यो पनि निकै महँगो रकममा ।

गत शुक्रबारदेखि 'कमेडी च्याम्पियन सिजन- २' को प्रसारण सुरु भएको छ । गत वर्ष प्रतियोगी नपाउने कुराले डराएको च्याम्पियन टिम यस वर्ष डराउनुपर्ने अवस्था थिएन । पहिलो वर्षबाट नै विश्वास जितेकाले यस वर्ष राम्रा प्रतियोगी भेटिने कुरामा उनीहरू ढुक्क थिए ।

कमेडी च्याम्पियनका निर्देशक विशाल भण्डारीका अनुसार सिजन- २ का लागि ६ हजारभन्दा बढी डिजिटल अडिसन प्राप्त भएको थियो । जसबाट १ सय ८० जनालाई काठमाडौं फिजिकल अडिसनका लागि बोलाइयो । तीमध्येबाट प्रतियोगिताका लागि २४ जना छनोट भए ।

छनोट भएका २४ जना हास्यक्षेत्रमा पहिचान बनाइसकेका व्यक्तिदेखि स्वास्थ्यकर्मी, सुरक्षाकर्मीसम्म छन् । विदेशी भूमिबाट सहभागी हुनेदेखि रोजगारीका लागि विदेश पुगेका नेपाली पनि यसै शोका लागि नेपाल फर्किएका पनि छन् ।

अर्घखाँचीका वीरेन्द्र खड्का रोजगारीका लागि दुबईमा थिए । वीरेन्द्रले दुबईबाट नै डिजिटल अडिसनका लागि भिडियो पठाए । उनमा कमेडी गर्न सक्ने क्षमता देखेपछि च्याम्पियन टिमले उनलाई फिजिकल अडिसनका लागि नेपाल बोलायो ।

वीरेन्द्रलाई पनि विदेशको रोजगारीभन्दा आफ्नो कला प्यारो लाग्यो । कमेडी च्याम्पियनकै लागि उनी नेपाल फर्किए । फिजिकल अडिसनबाट वीरेन्द्र उत्कृष्ट २४ मा परेका छन् ।

भारतको आसाममा चर्चित छन्, पवन भट्टराई । त्यहाँ उनले लामो समयदेखि स्ट्याण्डअप कमेडी गरिरहेका छन् । उनी पनि कमेडी च्याम्पियनको प्रतिस्पर्धाका लागि नेपाल आएका छन् । उनले फिजिकल अडिसनमा 'गोल्डेन कि' हात परेर सिधै उत्कृष्ट २४ मा पुगेका छन् ।

भारतको सिक्किमबाट प्रतियोगिताका लागि विक्की अग्रवाल कमेडी च्याम्पियनमा आइपुगेका छन् । सिक्किममा धेरै स्टेज शो गरिसेकका उनको क्रेज सिक्किममा गज्जबको छ । उनले भिडियोहरू बनाएर युट्युबमा पनि अपलोड गर्ने गर्छन् ।

विक्कीले पनि गोल्डेन कि नै हात पारे । प्रस्तुतिपछि निर्णायकहरूले विक्कीलाई आसलाग्दो प्रतियोगीका रूपमा हेरेको बताए । विक्कीले पनि शो जित्ने आशा व्यक्त गरे ।

कमेडी च्याम्पियनको पहिलो सिजनमा पनि सहभागी भएका मोहनराज क्षत्री भारतको सिक्किमका हुन् । उनी सिक्किममा निकै व्यस्त कलाकार बनिसकेका छन् ।

पहिलो सिजनमा भएका कमजोरीहरू सुधार्दै उनी दोस्रो सिजनमा सहभागी भएका छन् । फिजिकल अडिसनबाट उनले टप २४ मा आफ्नो स्थान सुरक्षित गर्न सफल रहे । पहिलो सिजनबाट फालिएर दोस्रो सिजनमा आउने मोहन मात्र होइनन्, अन्य केही प्रतियोगी पनि छन् ।

पहिलो सिजनमा उत्कृष्ट १५ मा परेका कैलाश कार्की यस वर्ष पुन: कमेडी च्याम्पियनको मञ्चमा आएका छन् । फिजिकल अडिसनमा नेपालको राजनीतिमा नेताहरूको गलत कामदेखि भ्रष्टाचारसम्मको मुद्दा उठाए । फिजिकल अडिसनमा वाहा-वाही पाएका उनले पनि टप २४ मा आफूलाई सुरक्षित गरेका छन् ।

उत्कृष्ट २४ प्रतियोगीहरू

यता केही टेलिभिजनदेखि युट्युब तथा रेडियोमा समेत कार्यक्रम चलाइसकेका प्रभात लामा पनि यस शोमा भाग लिन पुगेका छन् । पेसाले पत्रकार प्रभातले पनि आफूलाई उत्कृष्ट २४ मा अड्याउन सके ।

प्रभातसँगै सुन्दर खनाल पनि टीभीदेखि रेडियोसम्म सुनिएका आवाज हुन् । उनी पनि यस वर्ष कमेडी च्याम्पियनको रेसमा सामेल भएका छन् ।

हास्य टेलिशृंखला भद्रगोलका केही एपिसोडमा काम गरेका भरतमणि पौडेल पनि कमेडी च्याम्पियनमा प्रतिस्पर्धी बनेका छन् । क्यारिकेचरमा खप्पिस मानिएका पौडेल पनि उत्कृष्ट २४ मा परेका छन् ।

कमेडी विधामा रहेर नै धेरै समयदेखि काम गरिरहेका विकास अर्याल, एकजल पुजारी, विदुर खनाल, श्रेया सुवेदी, सुशान्त बस्याल, सुजन दाहाल, सुदर्शन सुवेदी, दर्पण शर्मालगायतले कमेडी च्याम्पियनको उत्कृष्ट २४ मा आफ्नो स्थान बनाएका छन् ।

धनकुटाका पुष्पराज ओझा पेसाले स्वास्थ्यकर्मी हुन् । उनी धनकुटामा रहेको सरकारी स्वास्थ्यचौकीमा कार्यरत छन् । उनी पनि कमेडी च्याम्पियन जित्ने दौडमा सहभागी भएका छन् ।

राम्रो क्यारिकेचर गर्न सक्ने पुष्पराजले पनि 'गोल्डेन कि' हात पारे । उनलाई पनि कमेडी च्याम्पियनमा लामो रेसको घोडा मान्न सकिन्छ । पुष्पराज पनि स्थानीयस्तरमा चर्चामा रहेका कमेडियन हुन् ।

जनपद प्रहरी सेवामा रहेका सन्तोष थापा पनि कमेडी च्याम्पियनमा भाग लिन आइपुगेका छन् । गोर्खाका उनी पनि उत्कृष्ट २४ मा पर्न सफल भएका हुन् ।

कमेडी च्याम्पियनमा सहभागी हुन १२ वर्षदेखि ५२ वर्षसम्मका व्यक्तिको उपस्थिति देखियो । फिजिकल अडिसनका लागि ५२ वर्षीय लीला स्टेजमा पुगे । उनले यो उमेरमा आएर पनि आफ्नो कला प्रस्तुत गर्न पाएकोमा धन्यवाद व्यक्त गरे ।

तर, लीलाले उत्कृष्ट २४ मा भने आफूलाई पार्न सकेनन् ।

त्यस्तै, १२ वर्षीय विप्लब कोइराला पनि फिजिकल अडिसनमा आइपुगेका थिए । सायद, उनको प्रस्तुतिले जज र निर्देशक टिमको मन छुन सकेन होला, त्यसैले सुमनले पनि आफूलाई उत्कृष्ट २४ मा पार्न सकेनन् ।

०००

कमेडी च्याम्पियनका निर्देशक विशाल भण्डारी सबै क्षेत्रको यो सहभागिता उत्साहजनक भएको बताउँछन् । उनी भन्छन्, 'हामीलाई विश्वास गरेर विदेशी भूमिबाट नेपाल आउनुभएको छ । कोही सरकारी सेवामा हुने व्यक्तिहरू हुनुहुन्छ । यो हाम्रा लागि खुसीको कुरा हो नि ।'

यस वर्षका प्रतियोगीहरू धेरै आसलाग्दा भएको विशालले बताए । 'धेरै जना प्रतियोगी राम्रा हुनुहुन्छ । हाम्रोतर्फबाट पनि निकै मिहिनेत गराइरहेका छौँ', विशाल भन्छन्, 'पक्कै यस वर्ष झन् धमका हुनेछ ।'

शोमा यस वर्ष पनि सन्तोष पन्त, मनोज गजुरेल, प्रदीप भट्टराई र ऋचा शर्मा जज छन् । 'थ्री प्रोडक्सन'को ब्यानरमा निर्मित यस शोका कार्यकारी निर्माता केकी अधिकारी, रीमा विश्वकर्मा, विशाल भण्डारी र राज घिमिरे हुन् ।

प्रकाशित मिति: आइतबार, फागुन २३, २०७७ १८:३९