सातौं प्रधानमन्त्री कप भलिबल : पुलिस र आर्मीको विजयी सुरुवात

A+ A A-

सातौं प्रधानमन्त्री कप महिला भलिबल प्रतियोगिता शुक्रबारदेखि नेपालगन्जमा सुरु भएको छ । प्रतियोगिताको पहिलो खेलमा नेपाल पुलिस क्लवले न्यू डायमण्ड क्लवलाई ३–२ को सेटमा हराएको छ ।

उद्घाटन खेलको पहिलो, तेस्रो र पाँचौ सेट क्रमश २५–१९, २५–१९ र १५–८ ले जित्दै पुलिस विजयी भयो । न्यू डाइमण्डले नेपाल पुलिस क्लवलाई दोस्रो र चौथो सेटमा क्रमशः २८–२६ र २५–१७ ले जिते पनि नतिजा आफ्नो पक्षमा निकाल्न सकेन । पुलिसको २ तथा न्यू डाइमन्डको १ अंक बनाएका छन् ।

त्यस्तै, दोस्रो खेलमा त्रिभुवन आर्मी क्लबले स्थानीय लुम्बिनी युनाइटेड टिमलाई २८–८, २५–८ र २५–७ को सोझो सेटमा हराएको छ । यो जितसँगै आर्मीको ३ अंक पुगेको छ । पराजित लुम्बिनीको अंक शून्य छ । आर्मीकी साफिया पुन प्लेयर अफ दि म्याच बनेकी छिन् ।

शनिबार दुई खेल हुनेछ । दिउँसो १ बजे त्रिभुवन आर्मी क्लब र नेपाल एपिएफ क्लब तथा दोस्रो खेलमा नेपाल पुलिस क्लब र लुम्बिनी युनाइटेड टिमबीच ३ बजे प्रतिस्पर्धा हुनेछ । अंक तालिकाको शीर्षस्थानमा रहने टोली लिग च्याम्पियन बन्नेछ ।

प्रतियोगितामा नेपाल पुलिस, एपीएफ, त्रिभुवन आर्मी, न्यू डायमन्ड र लुम्बिनी युनाइटेडको सहभागिता रहेको छ । प्रतियोगितामा विजेतालाई ५ लाख, दोस्रो हुनेलाई दुई लाख, तेस्रो हुनेलाई १ लाख र चौथो हुनेलाई ५० हजार रुपैयाँ पुरस्कार राशी रहेको छ । गत वर्ष प्रथम पुरस्कार दुई लाखको रहेको थियो । प्रतियोगिताको पहिलो संस्करणमा नेपाल पुलिस क्लव, दोस्रोमा एपिएफ, तेस्रो र चौथोमा भारतको रेलवे ईण्डिया, पाँचौमा एपिएफ र छैठौमा पुलिसले विजय हासिल गरेका थिए ।

जिल्ला भलिबल संघ बाँकेले आयोजना गरेको प्रतियोगिता संयोजक एवं प्रदेशसभा सदस्य कृष्णा केसी नमुना र मिस नेपाल नम्रता श्रेष्ठले संयुक्त रुपमा रेफ्री शान्ति गुरुङलाई बल हस्तान्तरण गरेर उद्घाटन गरेका छन् । प्रतियोगिता ‘महिला सुरक्षा, सम्मान र रोजगार, समृद्ध नेपालको आधार’ भन्ने मुल नाराका साथ फागुन २१–२५ सम्म नेपालगञ्ज रंगशालामा आयोजना हुनेछ ।

प्रकाशित मिति: शुक्रबार, फागुन २१, २०७७ २१:५१