कुखुरा पालेरै मालामाल चितवनका विनाेद, ५० लाखबाट सुरु कम्पनी अढाइ करोडको बन्यो

कुखुरा पालेरै मालामाल चितवनका विनाेद, ५० लाखबाट सुरु कम्पनी अढाइ करोडको बन्यो

A+ A A-

निरन्तर मेहनत गर्‍याे भने सफलतामा पुगिन्छ भन्ने उदाहरणका लागि पूर्वी चितवनको रत्ननगरका व्यवसायी विनोद पोखरेललाई हेरे पुग्छ । उनलाई २६ वर्षको कठोर परिश्रमले आज देशकै अग्रणी पोल्ट्री व्यवसायी बनाएको छ ।

कुखुरापालन व्यवसायमा दानादेखि चल्ला हुँदै अण्डा र मलसम्मको उत्पादन र बजारीकरणमा उनकाे नेतृत्वको दाउन्ने कर्पाेरेट सफल भएको छ । यसअन्तर्गत किसान दाना उद्योग, दाउन्ने भेट फर्मा, दाउन्ने एग्रो, किसान एग्रो, एड्भान्स पोल्ट्री छन् । कर्पाेरेटको कार्यकारी निर्देशक पोखरेल छन् ।

२०५१ सालमा आफ्नै काकासँग मिलेर काठमाडौँमा पोल्ट्री फार्म सुरु गरेका पोखरेलले त्यसको पाँच वर्षपछि फार्मसँगै ट्रेडिङको व्यापार थालेका थिए । दाउन्ने ट्रेडर्स नामक कम्पनीबाट उनले व्यवसाय सुरु गरे । त्यसको केही वर्षपछि २०६३ सालमा चितवनमा उनकाे व्यवसाय विस्तार भयो ।

साझेदार थिए राजकुमार गुरुङ । पोखरेलले सम्भिए, 'सुरुमा बुबाले काकासँगको साझेदारमा केही रकम शेयर राखिदिएको भए पनि त्यसपछिका दिनमा त्यही रकमले व्यवसाय विस्तार हुँदै गएको हो ।'

बुबा सुरेन्द्र र काका डा. टीका पोखरेलको लगानीको साझेदारी पोल्ट्री फार्मलाई पोखरेल आफ्नो व्यवसायको सुरुवाती मान्छन् । गुरुङसँग साझेदारी हुँदा उनीहरूले ५० लाख रुपैयाँ लगानी गरे । आजसम्म आइपुग्दा उनकाे नेतृत्वको कम्पनीमा लगानी २ अर्ब ६० करोड रुपैयाँभन्दा बढी पुगेको छ ।

उक्त रकममा बैंकको लगानी पनि छ । ती कम्पनीमा १ सय २० भन्दा बढी साझेदार छन् । यद्यपि, पोखरेल परिवारको लगानी आधाभन्दा बढी पुगेको छ । त्यसैले निर्णायक भूमिकामा रहेर पोखरेलले काम गर्ने अवसर पाएका छन् । विगतलाई सम्झँदै उनी भन्छन्, 'चितवनमा दाउन्ने ट्रेडर्स सुरु हुँदा तीन दिनमा एक बण्डल क्रेट मात्रै बिक्री भएको थियो ।'

उनीहरूको कम्पनीले दाना र चल्ला किसानलाई दिने र किसानबाट अण्डा उठाउने काम गर्थ्यो। यसै दौरानमा काठमाडौँमा अण्डा बिक्री गर्नेलाई पनि पोखरेलले साझेदार बनाउँदै ल्याए । झण्डै १० जना साझेदार पुगेपछि आफैँले दाना उद्योग खोल्ने र किसानलाई पनि साझेदार बनाउने उनकाे योजना बन्यो ।

यसैअन्तर्गत २०६८ सालमा किसान दाना उद्योग सञ्चालनमा आयो । यससँगै उद्योगले सुरुमा दैनिक आठ टन दाना उत्पादन गर्ने गरेकाेमा अहिले यस कम्पनीले दैनिक ४० टन मास दाना उत्पादन गर्दछ । पोखरेलका अनुसार नेपालको सबैभन्दा ठूलो मास दाना फ्याक्ट्री उनीहरूकै हो ।

त्यसो त किसान दानासँगै २०७० सालबाट उनीहरूकै अगुवाइमा दाउन्ने भेट पनि सुरु भयो, जसले कुखुराको औषधि बिक्री व्यवसाय गर्दै आएको छ । यसबाट सस्तो मूल्यमा आफ्ना किसानले औषधि पाएको पोखरेल बताउँछन् ।

व्यवसाय विस्तारकै क्रममा पोखरेल नेतृत्वको समूहले नवलपरासीको दुम्कीबासस्थित विनयी त्रिवेणी गाउँपालिकामा ३६ बिघा जग्गा किनेर अत्याधुनिक प्रविधिको कुखुरा फार्म सुरु गरेको छ । जर्मनी र मलेसियाको उपकरण जडित अत्याधुनिक उक्त फार्ममा हाल २ लाख कुखुरा छन् । एक वर्षभित्रमा २ लाख थप गरी ४ लाख कुखुरा पुर्‍याउने उनकाे लक्ष्य छ ।

त्यसो त तीन वर्षभित्र यो संख्या आठ लाख पुर्‍याउने पोखरेल बताउँछन् । त्यतिबेला उनीहरूको लगानी ४ अर्ब ५० करोड रुपैयाँ पुग्नेछ । पोखरेलले भने, 'विश्वकै आधुनिक प्रविधिलाई पछ्याएर कम लगानीमा धेरै उत्पादन गर्ने गरी हामी काम गर्दै छौँ ।'

त्यहीँ प्राङ्गारिक मल उद्योग पनि उनकै कम्पनीले स्थापना गरेको छ । बजारमा मल लैजाने चरणमा कम्पनी पुगेको छ । पोखरेलका सबै कम्पनीमा १ सय २० हाराहारीमा साझेदार छन् । उनीहरू सबै कुनै न कुनै हिसाबले कम्पनीसँग व्यवसाय र रोजगारीमा जोडिएका छन् । १ सय ८० जनालाई रोजगारी दिएको कम्पनीको महत्त्वपूर्ण भूमिकामा काम गर्ने कर्मचारी अधिकांशको धेरथोर शेयर छ ।

पोखरेल भन्छन्, 'काम गर्ने साथीहरूलाई आफूसँग रकम नभए बिनाब्याजमा कम्पनीले नै सापटी दिएर साझेदार बनाइएकाे छ ।'

५ लाखदेखि माथि आफूले सकेसम्म कर्मचारीको शेयर राख्न पाउने व्यवस्था उनकाे कम्पनीमा छ । अण्डा उत्पादन गरेसँगै पाेखरेलले बजारीकरणमा पनि विशेष ध्यान पुर्‍याएका छन् । उनकाे भनाइमा अबकाे डेढ वर्षभित्र देशका ३० जिल्लामा आफ्नै बिक्री केन्द्र पुर्‍याइँदै छ । हालसम्म काठमाडौँ, भक्तपुर, ललितपुर र सुर्खेतमा बिक्री केन्द्र खुलिसकेका छन् ।

आफैँ उत्पादन गरेर उपभोक्ताको घरनजिकै पसलसम्म अण्डा पुर्‍याउने लक्ष्य छ । हाल पोखरेलको कम्पनीमा दैनिक ३ लाख ६८ हजार ५ सय अण्डा सङ्कलन हुन्छ । सोमध्ये १ लाख ६८ हजार अण्डा आफ्नै फार्मको हो । उनले नेतृत्व गरेको कम्पनी किसानको अण्डा सङ्कलन गर्ने र आफ्नै फार्मको उत्पादन गर्ने नेपालको सबैभन्दा ठूलो संस्था हो । त्यसो त, मास दानामा पनि उनकाे कम्पनी सबैभन्दा ठूलो हो ।

आफूलाई चाहिने लेयर्स चल्ला यस कम्पनीको लगानी रहेको ब्राउण्ड वर्ड ह्याचरीबाट ल्याउने गरिन्छ । क्रेट आफ्नै लगानीको चितवन ट्रे को प्रयोग हुन्छ भने औषधि आफ्नै पसल (दाउन्ने भेट) बाट प्रयोग गरिन्छ । त्यसैले उत्पादन लागत कम र मुनाफा बढी हुने गरेको पोखरेल बताउँछन् । कुखुरा व्यवसायमा सफल पोखरेल पोल्ट्रीसँग सम्बन्धित सबैजसो सङ्घ संस्थामा निर्णायक भूमिकामा छन् । निरन्तरको संघर्षबाट उनले ४५ वर्षको उमेरमा पाएकाे यो सफलता धेरैका लागि पाठ हुन सक्छ ।

प्रकाशित मिति: बिहीबार, फागुन २०, २०७७ ०९:२८