ज्योति विकास बैंक र क्लक बीले आयाेजना गरेकाे 'इन्टरप्रेन्यु एचईआर' कार्यक्रम सम्पन्न

ज्योति विकास बैंक र क्लक बीले आयाेजना गरेकाे 'इन्टरप्रेन्यु एचईआर' कार्यक्रम सम्पन्न

A+ A A-

ज्योति विकास बैंक र क्लक बी बिजनेस इन्नोभेसनकाे संयुक्त आयाेजनामा एक महिनाअघिदेखि सञ्चालित महिला उद्यमशीलता विकाससम्बन्धी 'इन्टरप्रेन्यु एचईआर' नामक कार्यक्रम सम्पन्न भयाे ।

उक्त कार्यक्रमका उत्कृष्ट विजयी प्रतियोगीहरूलाई ५० हजारको बिउपुँजी र २ लाखको इक्विटी इन्भेस्टमेण्ट फण्ड प्रदान गरिएकाे छ ।

कार्यक्रमका प्रमुख अतिथि एवं ज्योति विकास बैंकका सञ्चालक समितिका अध्यक्ष हरि प्रसाद, बैंकका प्रमुख कार्यकारी अधिकृत श्रीचन्द्र भट्ट र क्लक बी बिजनेस इन्नोभेसनका प्रमुख कार्यकारी अधिकृत विनय देवकोटाले संयुक्त रूपमा बिउपुँजी र इक्विटी इन्भेस्टमेण्ट फण्ड प्रदान गरे ।

कार्यक्रममा सातै प्रदेशबाट २ सय १७ जना महिलाले आवेदन दिएकाेमा छनोट भएका ३५ जना आवेदकलाई सीप विकाससम्बन्धी वर्कसप सेसन, मेन्टरसिप सेसन, भर्चुअल इन्क्युबेसन प्राेग्राम र उद्यमशीलता क्षेत्रका विज्ञहरूबाट उनीहरूको उद्यमलाई अझ विस्तारित बनाउन तालिम प्रदान गरिएको थियो ।

तालिमको समाप्ति भएसँगै ३५ जना महिला उद्यमीले आफ्नो उद्यमसम्बन्धी विस्तृत बिजनेस प्लान प्रस्तुत गरेका थिए, जसमध्येबाट मूल्यांकन गरेर १० जना अन्तिम उम्मेदवारलाई छनोट गरिएकाे थियाे । उनीहरूले गत आइतबार आफ्नो उद्यमको खाका र विस्तृत बिजनेस प्लान प्रस्तुत गरेका थिए ।

सो प्रस्तुतिका आधारमा कार्यक्रमका निर्णायकमण्डलमा रहेका पारसराज कँडेल, रामहरि आचार्य, विनय देवकोटा, स्नेहा सिंह, ज्यास्मिन कर्माचार्य र नरोत्तम अर्यालले गरेकाे मूल्याङ्कनका आधारमा सृजना भुसाल (Learn Loksewa ) र शैलजा कसजू (Tekka Toys) लाई विजेता घोषणा गरिएको थियो ।

सृजना भुसालको लोकसेवा तयारी मोबाइल एप तथा शैलजा कसजूको कृषिजन्य वस्तुबाट महिलाहरूको सीपलाई प्रवर्द्धन गर्दै बनाइने म्याट, पर्दा, ब्याग, मास्कजस्ता वस्तुलाई बजार प्रदान गर्ने ई-कमर्स साइटको प्रस्तावलाई निर्णायकमण्डलले विजेता घोषित गरेको हो ।

कार्यक्रममा महिला उद्यमशीलतासम्बन्धी प्यानल डिस्कसन पनि भएकाे थियो । प्यानल डिस्कसन कार्यक्रममा ज्योति विकास बैंकका प्रमुख कार्यकारी अधिकृत श्रीचन्द्र भट्ट, बिजनेस ३६० की प्रमुख सम्पादक चारु चड्डा, यूराे स्कुलकी निर्देशक शैलजा अधिकारी र FWEAN की नीरु रायमाझी खत्रीले महिला उद्यमशीलतासम्बन्धी आ-आफ्नो विचार प्रस्तुत गरेका थिए ।

ज्योति विकास बैंकले विभिन्न क्षेत्रमा रहेका महिला उद्यमी र महिला उद्यमशीलतालाई प्राथमिकतामा
राखी कर्जा प्रवाह गरी उद्यमशीलतालाई विभिन्न माध्यमबाट प्रवर्द्धन पनि गर्दै आइरहेको छ ।

हाल ज्योति विकास बैंकले १०५ शाखा कार्यालय, १ एक्सटेन्सन काउन्टर तथा ६१ वटा एटीएममार्फत सेवा उपलव्ध गराउँदै आइरहेको छ ।

प्रकाशित मिति: मंगलबार, फागुन १८, २०७७ १८:३९