पाँचतारे होटल र्‍याडिसनले शुल्क उठायो, सेवा दिएन

A+ A A-

पाँचतारे होटल र्‍याडिसनले भीआईपी सम्मानसहितको सुविधा दिने भन्दै शुल्क उठाएर सुविधा नदिएको देखिएको छ ।

सन् २०१९ को अन्त्य तथा २०२० को सुरूवातमा प्रिभिलेज क्लब निर्माण गरिएको र जन्मोत्सव, एनिभर्सरी लगायतका दर्जन बढी काममा नि:शुल्क तथा केही कार्यक्रममा दिने भनिए पनि त्यस्तो छुट नपाएको र होटल जवाफदेही नरहेको गुनासो प्रिभिलेज क्ल्वका सदस्यहरूले गरेका छन् ।

‘प्रिभिलेज क्लबका नाममा समाजका प्रतिष्ठित व्यक्ति र कर्पोरेट स्तरमा क्लबको सदस्य बनाउन ताकेता गरियो’ प्रिभिलेज क्लको सदस्यता लिएका एक सदस्यले भने, ‘जन्मोत्सव ,एनिभर्सरी, लगायत दर्जनौं प्याकेज सुविधा रहेको र भीआईपी सम्मानका साथ बेड एण्ड ब्रेकफास्ट लगायतका लागि वार्षिक शुल्क लिएर पैसा उठाइए पनि सुविधा भने केही पनि दिइएन ।’

प्रिभिलेज सदस्य भएपछि पाएको कुपन प्रयोग गर्न नपाएको भन्दै होटलमा सोधपुछ गर्दा होटलबाट सम्बोधन नभएको गुनासो अर्का एक सदस्य गरेका छन् । ‘होटलकै नम्बरबाट फोन आइरहेको थियो, निरन्तर ताकेता आएपछि सदस्य बन्‍न तयार भएर पैसा बुझाएपछि होटलकै काउन्टरबाट कुपन दिइएको हो । तर, अहिले सुविधा चाहियो भन्दा होटलले सम्बोधन नै गरेन,’ ती सदस्यले भने । कतिपयले भने सेवा लिन फोन गर्दा होटलका कर्मचारीले ‘के गर्न सक्छस्’ भन्ने खालको धम्की दिएको गुनासो गरेका छन् ।

तर, सम्बोधन नगरेको र धम्की दिएको भन्ने विषयलाई भने होटलका उच्च कर्मचारीहरूले अस्वीकार गरेका छन् । ‘हामी कसैलाई पनि धम्की दिन सक्दैनौँ । आफ्नै ग्राहकलाई त्यसो गर्ने कुरा आउँदैन’ होटलका वित्तीय नियन्त्रक लोकराज ढुंगानाले भने । उनले प्रिभिलेज क्लब होटलको आउट सोर्सिङ कार्यक्रम भएपनि होटल आफैँले यस विषयमा सम्बोधन गर्न तयार रहेका बताए ।

उनले प्रिभिलेज क्लब बनाएर त्यसका सदस्यहरूलाई सेवा दिँदै आएपनि गत वर्षको अन्तिम चार महिना कोरोनाका कारण सेवा दिन नपाएको भने स्वीकारे । हेज अफ हस्पिटालिटीले होटलसँग सम्झौता गरी प्रिभिलेज सदस्य बनाएको उनको भनाइ छ । ‘हामीले पछिल्लो दुई वर्षदेखि यस्तो सेवा दिँदै आएका हौँ । राम्रै भएको थियो तर गत वर्ष भने अन्तिममा कतिपय सदस्यले आफ्नो कार्ड देखाएर सुविधा लिन नसकेको कुरा साँचो हुनसक्छ । हामीसँग गुनासो भने आएको छैन,’ धामीले भने ।

२०१९ डिसेम्बरदेखि २०२० डिसेम्बरसम्म म्याद राखेर नै सदस्यता दिए पनि कसैले गुनासो गरे सम्बोधन गर्न तयार रहेको प्रतिवद्धता उनले जनाए । यद्यपी सदस्यहरूले भने होटलले आउट सोर्सिङ कार्यक्रम भएको भन्दै सम्बोधन नगरेको दाबी गरेका छन् ।

सदस्यहरूका अनुसार तीन किसिमका १५ हजार, २० हजार र ३० हजारको प्याकेज तयार गरेर शुल्क उठाइएकाे छ । त्यस्ता सदस्यको संख्या करिब एक हजार छ । त्यसअनुसार २० हजार औसतमा २ करोड रूपैयाँ उठाएको दाबी सदस्यहरूको छ । तर, होटलले राखेको रेकर्डअनुसार भने त्यस्ता सदस्यको संख्या २ सय ९० देखिएको छ भने १२ हजार र २४ हजारका गरी दुई वटा प्याकेज बनाइएको छ ।

प्रकाशित मिति: मंगलबार, फागुन १८, २०७७ १७:३१