विप्लव नेतृत्वको नेकपाले बनायो प्रकाण्डको संयोजकत्वमा वार्ता टोली

A+ A A-

नेत्रविक्रम चन्द विप्लव नेतृत्वको नेपाल कम्युनिस्ट पार्टी (नेकपा) ले सरकारसँग वार्ता गर्न दुई सदस्यीय वार्ता टोली गठन गरेको छ ।

सरकारले गृहमन्त्री रामबहादुर थापा 'बादल'को नेतृत्वमा दुई सदस्यीय वार्ता टोली गठन गरेलगत्तै विप्लव नेतृत्वको नेकपाले खड्गबहादुर विश्वकर्मा ‘प्रकाण्ड’को नेतृत्वमा दिपक चलाउने सदस्य रहेको वार्ता टोली गठन गरेको हो ।

यसअघि सरकारले विप्लव नेतृत्वको नेकपासँग वार्ता गर्न गृहमन्त्री बादल र प्रधानमन्त्री केपी शर्मा ओलीका विदेश मामिला सल्लाहकार डा. राजन भट्टराई रहेको दुई सदस्यीय वार्ता टोली गठन गरेको छ ।

यसअघि सरकारले विप्लव नेतृत्वको नेकपालाई शान्तिपूर्ण राजनीतिमा ल्याउने प्रयासस्वरुप छलफल सुरु गरेको थियो । खानेपानीमन्त्री मणिचन्द्र थापाले २० माघमा नख्खु जेल पुगेर विप्लव समूहका नेता हेमन्तप्रकाश वली सुदर्शनसँग छलफल गरेका थिए ।

८ फागुनमा विप्लवले विज्ञप्ति जारी गरी सहज गतिविधि र कार्यक्रम गर्ने वातावरण बन्ने अवस्थामा आफ्नो पार्टी सरकारसँगको संवाद र वार्ताका लागि सकारात्मक रहेको बताएका थिए ।

विप्लवको विज्ञप्ति आएलगत्तै सरकार विप्लव नेतृत्वको नेकपामाथि लगाएको प्रतिबन्ध फुकुवा गर्ने तयारीमा जुटेको थियो । तर, विघटित प्रतिनिधिसभा सर्वोच्च अदालतले पुनर्स्थापना गरिदिएपछि वार्ताका लागि केही अलमल भएको थियो ।

विप्लवसँग वार्ता हुने भएपछि सरकारले लगाएको राजनीतिक प्रतिबन्ध पनि हटाउने तयारी गरेको सरकारका प्रवक्ता एवं सञ्चार तथा सूचना प्रविधिमन्त्री पार्वत गुरुङले जानकारी दिए । 'प्रतिबन्ध फुकुवा भएपछि विप्लव समूह शान्ति प्रक्रियामा आउने आशा छ,' उनले भने, ' सरकारले प्रतिबन्ध हटाउने तयारी गरिरहेको छ ।'

प्रकाशित मिति: मंगलबार, फागुन १८, २०७७ १३:४३