व्यापारिक फर्मकाे बदमासी : उपभाेक्ता ठगीदेखि, अर्काकाे लोगो चाेरीसम्म, एक सय फर्म कारबाहीमा

व्यापारिक फर्मकाे बदमासी : उपभाेक्ता ठगीदेखि, अर्काकाे लोगो चाेरीसम्म, एक सय फर्म कारबाहीमा

A+ A A-

वाणिज्य, आपूर्ति तथा उपभोक्ता संरक्षण कार्यालय वीरगञ्जले बढी मूल्य राखेर सामान बिक्री गर्ने, अरुको ब्राण्ड चोरी गर्ने, पसलमा मूल्य सूची नराख्ने, खरिद बिल नदेखाउने, इजाजत नलिई पसल सञ्चालन गर्ने तथा अनुगमन कार्यमा सहयोग नगरेको भन्दै १ सय ५ वटा व्यापारिक फर्मलाई कारबाही गरी ३० लाख २३ हजार रुपैयाँ जरिवाना गरेको छ ।

सो कार्यालयले चालू आर्थिक वर्षको फागुन १७ गतेसम्ममा २ सय ५ व्यापारिक फर्ममा अनुगमन गरी त्यसमध्ये १ सय ५ लाई कारबाही गरेकाे हाे । एसआर रेडिमेड उद्योगलाई सबैभन्दा बढी ३ लाख रुपैयाँ जरिवाना गरिएको छ । उक्त उद्योगले बहुराष्ट्रिय कम्पनीको लोगो आफ्नो उत्पादनमा लगाउने गरेको पाइएकोले उक्त उद्योगलाई जरिवाना गरिएको कार्यालयले जनाएकाे छ ।

यसैगरी वीरगञ्जकै जय अम्बे ट्रेड एण्ड जेनेरल अर्डर सप्लायर्सलाई दुई लाख ५१ हजार, गगन ट्रेडिङ हाउसलाई दुई लाख रुपैयाँ जरिवाना गरिएको छ । हेटौँडा उपमहानगरपालिका–३ स्थित घर संसार पसललाई तीन लाख रुपैयाँ जरिवाना गरिएको छ ।

ती व्यापारिक फर्महरूले बढी मूल्य लिएर उपभोक्ता ठग्दै आएकाले उपभोक्ता संरक्षण ऐन २०७५ को दफा ३८ बमोजिमको कसुरमा सोही ऐनको दफा ३९ बमोजिम तत्काल जरिवाना गरिएको निमित्त कार्यालय प्रमुख जीतबहादुर भण्डारीले बताए ।

उक्त कार्यालयले सो अवधिमा सप्तरीमा ११, धनुषामा २०, महोत्तरीमा ६, सर्लाहीमा ३, रौतहटमा १७, बारामा ३, पर्सामा ७६, मकवानपुरमा १५ र चितवनमा २७ गरी जम्मा २ सय ५ फर्मको अनुगमन गरी त्यसमध्ये १ सय ५ फर्मलाई जरिवाना गरेको छ ।

नेपालभर रहेको वाणिज्य कार्यालयमध्ये सबैभन्दा बढी राजश्व वीरगञ्ज कार्यालयले सङ्कलन गरेको दाबी गर्दै सो कार्यालयका सूचना अधिकारी दिलीपखंग खत्वेले भने, 'जरिवाना गरिएका फर्मले सो मितिबाट सात दिनभित्र कार्यालयमा उपस्थित भई जरिवाना बुझाउनुपर्ने कानुनी प्रावधान रहेको छ ।'

प्रकाशित मिति: मंगलबार, फागुन १८, २०७७ १३:१४