राष्ट्र बैंकको डेपुटी गभर्नर पद रिक्त, प्रतिस्पर्धामा ८ कार्यकारी निर्देशक

राष्ट्र बैंकको डेपुटी गभर्नर पद रिक्त, प्रतिस्पर्धामा ८ कार्यकारी निर्देशक

A+ A A-

नेपाल राष्ट्र बैंकका दुई डेपुटी गभर्नर पद रिक्त भएका छन् । डेपुटी गभर्नरद्वय चिन्तामणि सिवाकोटी र शिवराज श्रेष्ठको पाँचवर्षे कार्यकाल मंगलबारबाट सकिएसँगै दुई पद रिक्त भएका हुन् ।

केपी शर्मा ओलीको प्रधानमन्त्रीको पहिलो कार्यकालमा १९ फागुन २०७२ मा तत्कालीन एमालेको कोटाबाट सिवाकोटीर कांग्रेस कोटाबाट श्रेष्ठ डेपुटी गभर्नरमा नियुक्त भएका थिए ।

अघिल्लो पटक ढिला गरी नियुक्ति गरिए पनि अहिले भने राजनीतिक उतारचढावका कारण यही साता नै नियुक्ति हुन सक्ने राष्ट्र बैंक स्रोतले बताएको छ । त्यसो त अहिलेसम्म राष्ट्र बैंकले डेपुटी गभर्नरका लागि सिफारिससमेत गरेको छैन ।

नेपाल राष्ट्र बैंक ऐन २०५८ को दफा १६ अनुसार राष्ट्र बैंकका गभर्नरको सिफारिसमा डेपुटी गभर्नर मन्त्रिपरिषद्‍ बैठकले नियुक्ति गर्नुपर्ने हुन्छ ।

गभर्नरले सिफारिस गर्दा बैंकका विशिष्ट श्रेणीका अधिकृत (कार्यकारी निर्देशक) मध्ये आवश्यक परेको दोब्बर संख्यामा सिफारिस गर्नुपर्ने हुन्छ । यस आधारमा राष्ट्र बैंकका गभर्नरले कम्तीमा चार जनाको नाम सिफारिस गर्नुपर्ने हुन्छ ।

राष्ट्र बैंकमा अहिले १७ जना कार्यकारी निर्देशक छन् । १७ मध्येबाट कम्तीमा चार जनाको नाम गभर्नरले सिफारिस गर्नुपर्ने हुन्छ । सामान्यत: डेपुटी गभर्नर सत्ता पक्ष र प्रतिपक्ष दलले भागवण्डाका आधारमा नियुक्ति गरिएको हुन्छ ।

तत्कालीन गभर्नर डा. युवराज खतिवडाको सिफारिसमा अधिकारी तत्कालीन एमाले र काफ्ले कांग्रेसको कोटाबाट डेपुटी गभर्नरमा नियुक्त भएका थिए ।

निवर्तमान गभर्नर चिरञ्जीवी नेपालकाे सिफारिसमा नियुक्त भएका डेपुटी गभर्नरमध्ये श्रेष्ठ कांग्रेस र सिवाकोटी एमालेको कोटाबाट परेका थिए । अहिले पनि कांग्रेस र नेकपा कोटाबाट नै नियुक्ति गरिने सम्भावना छ ।

सर्वोच्च अदालतले संसद् पुनर्स्थापना गरेपछि प्रधानमन्त्री पद धरापमा परेकाले प्रधानमन्त्री ओलीले कांग्रेसलाई रिझाउन एक जना कांग्रेसकै सिफारिसमा डेपुटी गभर्नर नियुक्तिको तयारी गरेको स्रोतले जनाएको छ ।

राष्ट्र बैंक स्रोतका अनुसार अहिले राष्ट्र बैंकका आठ जना कार्यकारी निर्देशक डेपुटी गभर्नर बन्न दाैडधुपमा लागेका छन् । राष्ट्र बैंकका अधिकारीका अनुसार डेपुटी गभर्नरका प्रमुख दाबेदारमध्ये अर्थ मन्त्रालयका सल्लाहरका रूपमा काजमा ल्याइएका प्रकाशकुमार श्रेष्ठ हुन् ।

यसअघि उनी वर्तमान सरकारकै पालामा लुम्बिनी प्रदेश योजना आयोगका उपाध्यक्षसमेत भएका थिए । राष्ट्र बैंकमा कार्यकारी निर्देशक भएपछि अर्थमन्त्री विष्णु पौडलले आर्थिक सल्लाहकारका रूपमा अर्थमा भित्र्याएका हुन् ।

त्यस्तै, कार्यकारी निर्देशकहरू भुवन कँडेल, गुणाकर भट्ट, बमबहादुर मिश्र, सुमन अधिकारी, देवकुमार ढकाल, पिताम्बर भण्डारी र निलम ढुंगाना पनि डेपुटी गभर्नरको दौडमा छन् ।

प्रकाशित मिति: मंगलबार, फागुन १८, २०७७ ११:५६