जनप्रतिनिधिको क्रसरबाटै अवैध उत्खनन, आमजुङ्गीका स्थानीय आन्दोलित

A+ A A-

क्रसर उद्योगले अनधिकृत रूपमा उत्खनन गरेपछि मोरङको केराबारी गाउँपालिका- ८, आमजुङ्गी बस्ती जोखिममा परेको छ । बस्तीनजिकैको खदम खोलामा नदीजन्य पदार्थको निरन्तर उत्खननका कारण सिंगो बस्ती नै जोखिममा परेको स्थानीयले बताएका हुन् ।

खदम खोलासँग जोडिएको आमजुङ्गी बस्ती सिरानमा महादेव मिनरल इन्ड्रस्ट्रिज र शिवम् क्रसर उद्योग छन् । ती उद्योगले खोलाको प्राकृतिक बाँधको रूपमा रहेको ढुङ्गा-गिट्टी अनधिकृत उत्खनन गरी बस्ती नै जोखिममा पारेको भन्दै स्थानीय आन्दोलित बनेका हुन् ।

उद्योग सञ्चालकले खोलामा भएको गिट्टी-बालुवा उत्खनन गरिसकेका छन् । खोला धारमा करिब १५ फिटभन्दा गहिरो खाल्डो बनेको छ । खोलाबाहिरको निजी जग्गामा १० फिटभन्दा गहिरो खाल्डो खनेर नदीजन्य पदार्थ उत्खनन गरेपछि आफूहरू आन्दोलित बनेको स्थानीयले बताएका छन् ।

बस्ती बगाउनेगरी खोलामा उत्खनन भएपछि स्थानीयले पटकपटक उद्योग सञ्चालकलाई आग्रह गर्दा नमानेका कारण उनीहरू शनिबारयता निरन्तर प्रदर्शन गरिरहेका छन् । आइतबार उद्योगअगाडि प्रदर्शन गरेका स्थानीयले केराबारी गाउँपालिकाको कार्यालय पनि घेराउ गरेका थिए । गाउँपालिका अध्यक्ष रोहित कार्कीले भेट्न नमानेपछि उनीहरूले पालिकाको कार्यालयमा नाराबाजी गर्दै तोडफोडको प्रयाससमेत गरेका थिए ।

स्थानीय जीतबहादुर बस्नेतले खदम खोलामा दुई उद्योगले वातावरणीय परीक्षण प्रतिवेदनले स्वीकृति दिएको स्थानभन्दा बाहिर जथाभावी उत्खनन गर्ने गरेको, प्रतिवेदन तयार गर्दा स्वीकृति गर्दासमेत मिलेमतो हुने गरेको आरोप लगाए । उनले खोला उत्खननबाट बस्ती जोखिममा परेको र प्रकृतिमा पनि गम्भीर असर पुगिरहेको गुनासो गरे ।

उता ढुङ्गा-गिट्टी व्यावसायी भीम पौडेलले खोलाबाट ढुङ्गा-गिट्टी चोरी गर्न नपाएकाको अगुवाइमा आफूविरुद्ध प्रदर्शन भएको आरोप लगाए । निजी जग्गा खरिद गरेर आफूले उद्योग सञ्चालन गरेको बताउँदै उनले खोलाबाट ढुङ्गा-गिट्टी निकाल्न नपाएपछि उनीहरूकै अगुवाइमा आन्दोलन गरेको बताए ।

केराबारी गाउँपालिका अध्यक्ष कार्की र इटहरी उद्योग वाणिज्य संघका अध्यक्षसमेत रहेका व्यवसायी पौडेलको क्रसर उद्योगले वर्षौंदेखि सो क्षेत्रमा अवैध उत्खनन गर्दै आएको छ । प्रत्येक वर्ष अवैध उत्खनन आरोप लाग्दै आए पनि उनीहरूले स्थानीयमाथि दमन गर्ने र गुण्डा लगाएर तर्साउँदै प्राकृतिक स्रोतको दोहन गरिरहेको स्थानीयले बताएका छन् ।

प्रकाशित मिति: सोमबार, फागुन १७, २०७७ १७:५०