आदिम कलेजले सुरु गर्‍यो १० लाखकाे आदिम इन्नोभेसन स्टार्टअप फण्ड

A+ A A-

त्रिभुवन विश्वविद्यालयबाट सम्बन्धनप्राप्त आदिम कलेजले ‘आदिम इन्नोभेसन स्टार्टअप फण्ड’ स्थापना गरेको छ । कलेजले ब्याचलर्स अफ कम्प्युटर एप्लिकेसन (बीसीए) पढ्ने विद्यार्थीलाई लक्षित गर्दै त्यस्ताे फण्ड स्थापना गरेको हो । १० लाख रुपैयाँसहित सुरु गरिएको फण्डबाट विद्यार्थीले गर्न चाहेको व्यवसाय सुरु गर्न सहयोग जुटाउन सक्नेछन् ।

हिमालय होटलमा एक कार्यक्रमका बीच उद्घाटन गरिएको इन्नोभेसन फण्डबाट विद्यार्थीलाई स्वदेशमै सम्भावना र अवसर सिर्जना गर्दै उद्यमशीलतातर्फ उन्मुख गराउने कलेजका प्रिन्सिपल शंकरप्रसाद शर्माले बताए । उनले यो फण्ड पूर्ण वा आंशिक रूपमा विद्यार्थीको उत्कृष्ट इन्नोभेटिभ प्राेडक्ट वा प्रोजेक्टलाई प्रदान गर्ने र व्यवसायका लागि आवश्यक डिभाइस, सफ्टवेयर र कार्यालय सेटअपमा फण्डबापतको सहयोग विद्यार्थीले खर्च गर्न सक्ने जानकारी दिए ।

इन्नोभेटिभ आइडिया तथा कन्सेप्टलाई वास्तविकतामा उतार्न फण्डले सहयोग गर्नेछ । फण्डलाई प्राेडक्टको ब्राण्डिङ र मार्केटिङमा समेत खर्च गर्न सकिनेछ । फण्डले उद्यमशीलताको यात्रा सुरू गर्न विद्यार्थीलाई प्रेरित गर्ने विश्वास लिइएको प्रिन्सिपल शर्माले बताए ।

फण्ड स्थापना कार्यक्रममा उपस्थित राष्ट्रिय आविष्कार केन्द्रका सञ्चालक महावीर पुनले विद्यार्थीको व्यावसायिक सुरुवातमा कलेज नै सहयोगी बनेको यो पहिलो पटक भएको बताए । कलेजबाटै विद्यार्थीले व्यावसायिक फण्ड पाउँदा इन्नोभेसन र उद्यमशीलताको संस्कृति विकासमा टेवा पुग्ने उनको कथन छ ।

उनले भने, '१० लाख रुपैयाँ सुरुवात भए पनि यसले अन्य सयौँलाई यस क्षेत्रमा क्रियाशील हुन प्रोत्साहन गर्नेछ ।'