कालीकाेट, बाजुरा छिचोल्दै कोल्टीमा पुग्यो पहिलो पटक बस, हुम्लाकाे कवाडीसम्म चल्ने

कालीकाेट, बाजुरा छिचोल्दै कोल्टीमा पुग्यो पहिलो पटक बस, हुम्लाकाे कवाडीसम्म चल्ने

बाजुरा जिल्लाको बुढीनन्दा नगरपालिकाका– १, कोल्टी बजारबाट हुम्लाको कवाडीसम्म बस सेवा सञ्चालनका लागि पहिलो पटक पुर्‍याइएको बस । तस्वीर : निमेन्द्र शाही/शिलापत्र

A+ A A-

बाजुरा जिल्लाको पूर्वी क्षेत्रमा रहेका चारवटा स्थानीय तह र हुम्ला, मुगु जिल्लाका मुख्य व्यापारिक केन्द्र कोल्टीमा सडक बन्न थालेकाे २० वर्षपछि पहिलो पटक बस पुगेकाे छ । बस पुगेपछि यहाँका स्थानीयहरू बस हेर्न कोल्टी बजार आएका छन् ।

सदरमुकाम मार्तडीदेखि ४४ किलोमिटर टाढा रहेको उक्त क्षेत्रमा अहिलेसम्म साना जीप मात्र सञ्चालनमा थिए । बस आइतबार मात्र पुगेको हो । बस त्यहाँ पुर्‍याइसकेपछि स्थानीय सडकमा मात्र सञ्चालन गर्ने तयारीमा बस सञ्चालक छन् ।

नेपाली सेनाले निर्माण गरिरहेको कर्णाली काेरिडोरको कोल्टीदेखि हुम्लासम्मको ५२ किलोमिटर सडकमा बस सञ्चालन गर्ने तयारी रहेको बस सञ्चालक गणेश शाहीले बताए । त्यहाँबाट सदरमुकामसम्म र जितेको सडक अझै बस सञ्चालनका लागि उपयुक्त नभएका कारण बस हुम्लाको कवाडी र बाजुराको कोल्टीबजारसम्म सञ्चालन गर्ने तयारी भएको उनकाे भनाइ छ ।

कर्णालीको भाग्य कोर्ने र भविष्य फेर्ने आशाका साथ निर्माण थालिएको कर्णाली काेरिडोरप्रति आमकर्णालीवासी आशावादी छन् । प्राकृतिक र भौगोलिक सबै पक्षमा सम्पन्नशाली भए पनि सडक सुविधा र विकासको पछिल्लो प्रविधिको अभावमा कर्णालीक्षेत्रले लामो समय देशभित्रै अलग व्यवहार भोग्नुपरेको थियो ।

एक समय कर्णाली अञ्चलभित्र समेटिएका पाँच जिल्लालाई सम्बोधन गरेर कर्णालीवासी भन्ने गरिए पनि अहिले यो नाम प्रदेश नम्बर ६ को नै नाम बन्न पुगेको छ ।

यद्यपि कर्णालीवासी भनेर अझै पनि त्यही पाँच जिल्लाका व्यक्तिलाई हेर्ने चलन अझै विद्यमान छ । तर, अब कर्णाली कोरिडाेरले कर्णालीका पुराना पाँच जिल्ला मात्र नभई समग्र कर्णाली प्रदेशको रूप नै नयाँ बनाउने विश्वास गरिएको छ । यस सडकले सुदूरपश्चिम प्रदेशको बाजुरा र कर्णाली प्रदेशको हुम्ला, मुगु र कालीकाेट जिल्लाका जनतालाई सेवा दिने देखिन्छ ।

नेपाली सेनाले निर्माण गरीरहेको राष्ट्रिय गौरवको आयोजना कर्णाली कोरिडोरको निर्माण कार्यले कर्णाली र बाजुरा जिल्लाका पूर्वी क्षेत्रका स्थानीयलाई विकासमा जोडिने आशाले खुसी ल्याएको छ । आर्थिक वर्ष २०६५/०६६ देखि ठेक्का प्रक्रियाबाट निर्माण आसलाग्दो तरिकाले नभएपछि ५ चैत २०७१ देखि नेपाली सेनालाई जिम्मा दिएसँगै निर्माण कार्यले कालीकाेट र बाजुराका विभिन्न भूभाग छिचोल्दै हुम्ला पुगेको छ ।

हुम्लाको ताँजाकोट गाउँपालिकाका अध्यक्ष बागदल मल्लले भने, ‘यो सडक भारतको रुपैडिया नाकाबाट सुरु भएर कालीकोट जिल्लाको खुलालु, लैफु, बाजुराको जगन्नाथर हिमाली गाउँपालिका, हुम्ला जिल्लाको ताँजाकोट गाउँपालिका, हुम्लाकै सिमीकोटहुँदै छिमेकी राष्ट्र चीनको तिब्बतसँग सिमानासम्म जोडिने भएकाले यो सडक कर्णालीको विकासका लागि मेरुदण्ड नै मानिएकाे छ ।'

कर्णाली कोरिडाेर सडक निर्माण कार्यदलले निर्माण गरिरहेको यो सडको लम्बाइ १ सय ९६ किलोमिटर छ जसमा ४० किलोमिटर कालीकोट खण्ड, ४४ किललोमिटर बाजुरा खण्ड र १ सय १३ किलोमिटर हुम्ला खण्ड छ । तर, सेनाले हुम्ला खण्डमा ६१ किलो मिटर मात्र जिम्मा पाएको छ, जो पडिसल्लासम्म मात्र हुन्छ ।

‘सडक सञ्जाल जोडिएसँगै यहाँका स्थानीयले बिरामी हुँदा अब अकालमा ज्यान गुमाउनु पर्दैन कि भन्ने आशा गरेका छन् । वर्षाैंदेखि भेडा, खच्चड र पिठ्युँमा भारी नबोकी खान पाइँदैन थियो । अब पैसा भएको बेला गाडीले ल्याएको खाद्यान्न र वस्तुहरू किन्न र बेच्न पाइएको छ’, बाजुराको हिमाली गाउँपालिका– ५, रुगिनका प्रदीप थापाले बताए ।

उनले थपे, ‘हामीले सडक नुहँदा १४/१५ दिन लाएर खच्चडमा सामान ल्याउनुपर्थ्यो । कति त बाटोमै टुटफुट हुन्थ्यो । सडक नुहुँदा मान्छेले बिरामी हुँदा अकालमा मर्नुपर्ने अवस्था थियो । अहिले बिरामी पर्दा उपचारका लागि गाडीमा जान सजिलाे भएकाे छ ।’

जयपृथ्वी नगरपालिका बझाङबाट बाजुराको कवाडी खोलामा व्यापार गरिरहेका कुवेर सिंहले भने, 'सामान ल्याउन र लैजानका लागि सजिलो छ । तलबाट नुन तेल आउँछ, यहाँबाट आलु, सिमी, मास तराई जान्छ ।’

बाजुराको हिमाली गाउँपालिका- २, कवाडीका मानबहादुर थापाले भने, 'पहिले पिठ्युँमा भारी बोक्नुपर्दा एकदमै दु:ख थियो । बिरामी पर्दा पनि बोकेरै अस्पताल लैजानुपर्ने अवस्था थियाे । अहिले गाडी आउँदा धेरै सजिलो भएको छ ।’

हुम्ला ताँजकोट– २ की अनुधरा रावलले भनिन्, 'सडक नबन्दा सुत्केरी ब्यथा लागेकाे बेला एकदमै गाह्राे थियाे । अब त घरको दैलोमा गाडी आएको छ । सुत्केरी ब्यथा लागे पनि उपचारका लागि अस्पताल जान सजिलाे भएकाे छ । बस सञ्चालनमा आएकाेमा हामीलाई खुसी लागेको छ ।'

प्रकाशित मिति: आइतबार, फागुन १६, २०७७ १३:४४