कालंगा जलविद्युत् आयोजनाको निर्माण कार्य अन्तिम चरणमा, चैतदेखि उत्पादन

A+ A A-

निजीक्षेत्रको लगानीमा निर्माण भइरहेको सुदूरपश्चिम प्रदेशको सबैभन्दा ठूलो कालंगा जलविद्युत् आयोजनाको निर्माण कार्य अन्तिम चरणमा पुगेको छ । बझाङको बुङगल नगरपालिकामा निर्माणाधीन ६५ मेगावाट क्षमताको साे आयोजनाको ९० प्रतिशत निर्माण कार्य सकिएको छ ।

झण्डै १० अर्ब रुपैयाँकोे लागत अनुमान गरिएको आयोजनाको ३८ दशमलव ४६ मेगावाटको अपर कालंगाको जलविद्युत् आयोजनाको ८ दशमलव ७ किलोमिटर, १५ दशमलव ३३ मेगावाटको कालंगा जलविद्युत आयोजनाको ३ दशमलव ४ किलोमिटर र १० दशमलव ०७ मेगावाट क्षमताको सानीगाड जलविद्युत् आयोजनाको २ दशमलव ९ किलोमिटर सुरुङ निर्माणको काम सकिएको छ ।

१५ दशमलव ३३ मेगावाट क्षमताको आयोजनाको इन्टेक, सुरुङ, पेनस्टक, पाइप जडान र विद्युत्‌गृह निर्माणको काम सकिएको छ । ९० प्रतिशतभन्दा बढी पूर्वाधार निर्माणको काम सकेको उक्त आयोजनाले आगामी चैतमा विद्युत् उत्पादनको तयारी गरेको छ ।

सन् २०१७ देखि निर्माण सुरु भएको साे आयोजनाले २०२० भित्रै काम सम्पन्न गर्ने लक्ष्य लिएको थियो । भूगोलले साथ नदिँदा निर्माण कार्यमा ढिलाइ भएको आयोजनाले बताएको छ । आयोजनाको पावर हाउस निर्माण, बाँध, सुरुङ र पेनस्टक पाइप जडानको काम भइरहेकोे छ ।

टनेल निर्माणलाई अन्तिम रूप दिनुका साथै पावर हाउसमा विद्युतीय उपकरण जडानको काम भइरहेकाले समग्रमा ९० प्रतिशत आयोजनाको काम सकिएको आयोजनाका प्रमुख पुष्प चित्रकारले बताए । उनले भने, '३८ दशमलव ४६ मेगावाटको अपर कालंगामा टनेल फिनिसिङको काम भइरहेको छ । १५ दशमलव ३३ मेगावाटको कालंगा जलविद्युत् आयोजनाका सबै काम सकिएका छन् ।

अब यही चैतमा परिक्षणको तयारीमा छौँ । सन् २०२० भित्रै निर्माण कार्य सम्पन्न गर्ने लक्ष्य लिएको भए पनि कोरोना महामारीले पारेको प्रभाव, भौगोलिक विकटता र वनसम्बन्धी कानुन र झन्झटिलो प्रशासनिक प्रक्रियाले पनि आयोजना निर्माणमा ढिलाइ भएको हो । काममा ढिलाइ हुँदा लागत पनि बढेको उनको भनाइ छ ।

सुदूरपश्चिमलगायत देशमा हजारौँको संख्यामा रोजगारी सिर्जना हुने र निर्माण सम्पन्न भएपछि ३ सय ५० जनाभन्दा बढी स्थानीयले रोजगारीको अवसर प्राप्त गर्नेछन् । यो आयोजनाले नेपालमा भइरहेको लोडसेटिङको समस्या कम गर्न सहयोग गर्ने अपेक्षा आयोजनाले लिएको छ ।

यो आयोजना सुदूरपश्चिमको विकासका लागि कोसेढुङ्गा सावित हुने कालंगा हाइड्रो प्रालिका संस्थापक वीरेन्द्र मल्लको भनाइ छ । उनले भने, 'यस क्षेत्रमा विभिन्न उद्योगका लागि आवश्यक प्रशस्त कच्चा पदार्थ छन् । विद्युत् नहुँदा उद्योग स्थापना गर्न सकिएको छैन । यो आयोजना सम्पन्न भएसँगै विभिन्न कलकारखाना तथा उद्योग सञ्चालनमा पनि यस आयोजनाले सहयोग पुग्नेछ ।'

आयोजना निर्माण सुरु भएसँगै यस क्षेत्रका युवाले योग्यता र दक्षताअनुसारको रोजगार पाइरहेका छन् । हिजोका दिनमा रोजगारका लागि विदेशिने युवाहरू हाल यसै आयोजनामा काम गरिरहेको र यस आयोजनाले बझाङको मुहार फेरिने संस्थापक मल्लको भनाइ छ ।

जलविद्युत् आयोजना निर्माणका लागि बैंकहरूकाे ७५ प्रतिशत र १५ प्रतिशत प्रतिष्ठित व्यापारीहरूको लगानी छ । निजीक्षेत्रको लगानीमा निर्माण हुन लागेको यो प्रदेशकै सबैभन्दा ठूलो जलविद्युत् आयोजना भएको आयोजनाको दाबी छ । प्रक्रियामै समय लाग्ने भएकाले शेयर निष्कासनमा केही ढिलाइ हुने बताइएकाे छ ।

प्रकाशित मिति: आइतबार, फागुन १६, २०७७ १२:२४