पूजारीले सपना देखेर पत्ता लगाएकाे धाम, शनिबार दर्शन गरे शनिबाट मुक्ति पाइने विश्वास

पूजारीले सपना देखेर पत्ता लगाएकाे धाम, शनिबार दर्शन गरे शनिबाट मुक्ति पाइने विश्वास

A+ A A-

सप्तरीकाे रुपनी बजारदेखि करिब तीन किलोमिटर पूर्व, वीरेन्द्र बजारदेखि तीन किलाेमिटर उत्तरमा पहाडको टाकुरामा छ धार्मिक पर्यटकीयस्थल शनिदेव ।

उत्तर दुधेला र धारा खोलाको बीचको टापुमा रहेको शनिधाम प्राकृतिक सौदर्यसँगै जनविश्वासका कारण महत्त्वपूर्ण मानिन्छ । शनिदेव क्षेत्रकाे हरियाली जंगलमा सुनिने चराचुरुङ्गीकाे चिरबिरचिरबिर आवाज अनि अदुभूत प्राकृतिको छटाले जो कोहीलाई लोभ्याउँछ ।

पूजारी सत्यनारायण साहका अनुसार याे क्षेत्रकाे पहिचान र संरक्षणकाे थालनी राेचक छ । उनले ५ चैत २०५६ राति सपनामा समीको रुख देखे । उनी यसकाे खोजीमा निस्किए । यही क्रममा समीको रुख भेटियाे र त्यस ठाउँलाई सफा गरी पूजाआजा गर्न थालिएको साह बताउँछन् । यहाँ पछि मन्दिर पनि बनाइयाे ।

समीको रुखसँगै बेल, खुर्सानी, अमरा, फूल, धाप, गजहर, सन्धानकाे रुख आपमा बेरिएका छन् । सात वृक्षको संगम स्थानमा पूजा गर्नाले शनि दशाबाट मुक्ति पाइने जनविश्वास छ ।

शनिदेव धामका अर्का पूजारी शिवजी यादवका अनुसार शनि ग्रहबाट मुक्ति पाउने विश्वासका साथ शनिदेव स्थलमा महायज्ञ, अष्टयामलगायतका धार्मिक अनुष्ठानहरूसमेत बेलाबेलामा हुँदै आएको छन् ।

पूजारी साहका भाइ रामनारायण साहकाे सहयोगमा श्रीकृष्ण दल गणका नेपाली सेनाको जनश्रमदानबाट १०८ वटा शिवलिङ्ग र कलात्मक मूर्ति २०७३ सालमा निर्माण गरिएको छ । सुरुमा एकदमै विकट स्थानमा सर्वसाधारणको आवजावत बढेपछि नेपाली सेनाको टोलीले त्यहीँ अस्थायी शिविर राखेर मूर्तिका साथै अन्य निर्माण कार्य सम्पन्न गरेको पुजारी भूपेन्द्रप्रसाद यादवले जानकारी दिए ।

मन्दिरमा पञ्चमुखी महादेव रुखको फेदमा शनिको प्रतीमालगायतका वरिपरि एक दर्जन मूर्तिसमेत छन् । खासगरी शनिबारका दिन सुनसरीकाे धरान, इटहरी, माेरङकाे विराटनगरलगायत भारतको पूर्णिया, अररिया, मधुवनी, सहरसालगायतका स्थानबाट पर्यटक आउने गरेका छन् ।

शनिबारबाहेक अनय दिनसमेत वनभोज तथा घुमघामका लागि पर्यटकहरू यहाँ आउने गर्छन् ।

मन्दिरको स्तराेन्नति र यसलाई धार्मिक पर्यटनको रूपमा विकास गर्न रुपनी गाउँपालिकाले गत वर्ष १० लाख बजेट विनियोजन गरेको थियाे । तर, विभिन्न कारणले यसमध्ये सात लाख मात्र खर्च गर्न सकेको रुपनी गाउँपालिका- ६ का अध्यक्ष गोविन्दसिंह थापाले मगरले बताए ।

मन्दिर घुमेर फर्केका रुपनी गाउँपालिका अध्यक्ष हरेराम यादवले शनिदेव स्थानलाई धनीधामका रूपमा विकास गर्ने प्रतिबद्धता जनाए ।

गाउँपालिकाको प्रमुख पर्यटकीय गन्तव्य रूपमा रहेको उक्त स्थानका लागि विशेष बजेटको व्यवस्था गरी सुविधा सम्पन्न बनाउने उनले बताए । मन्दिरसम्म पुग्ने बाटो अझै सहज छैन । सडक चाँडै सहज बनाउने उनले बताए ।

प्रकाशित मिति: शनिबार, फागुन १५, २०७७ ०८:४३