साह दम्पती हत्याको दुई वर्ष : अझै पत्ता लागेनन् हत्यारा

A+ A A-

सप्तरीको खडक नगरपालिका–५ खरचुहिया बजारमै घरमा सुतिरहेका ७५ वर्षीय सबुरी साह र उनकी ६५ वर्षीया पत्नी बेचनी देवी साहको १४ फागुन ०७५ मा जलाएर हत्या भयो । वृद्ध दम्पतीलाई आफ्नै घरमा जलाएर भएको हत्या घटनाको आज दुई वर्ष पूरा भएको छ । तर, घटना भने अझै रहस्यमै छ ।

इलाका प्रहरी कार्यालय कल्याणपुर, कडरबोना र जिल्ला प्रहरी कार्यालय सप्तरीका प्रहरी टोलीले घटनाको प्रारम्भिक चरणको अनुसन्धान गरेका थिए । घरभित्र र आँगनमा देखिएको रगतका आधारमा वृद्ध दम्पतीको हत्या नै भएको पुष्टि प्रहरीले प्रारम्भिक अनुसन्धानका क्रममा गरेको थियो ।

ब्याजमा ऋण रकम लगाउँदै आएका साह दम्पतीलाई डकैती गर्ने नियतले आएका लुटेराले हत्या गरेको हुनसक्ने प्रहरीको प्रारम्भिक अनुसन्धान थियो । हत्यारालाई कानुनी दायरामा ल्याउनका लागि प्रदेश प्रहरी कार्यालयको विशेष अनुसन्धान टोली र बीपी कोइराला स्वास्थ्य विज्ञान प्रतिष्ठान धरानका फोरेनसिक टिमले अनुसन्धान थाले ।

हत्यारालाई छिटो पत्ता लगाउन तालिमप्राप्त कुकुरको सहायताले पनि सूक्ष्म अनुसन्धान सुरु गरियो । वृद्ध दम्पतीको डीनए परीक्षण गर्न पनि पठाइयो । सोही क्रममा अनुसन्धान टोलीबाट ५, सप्तरी प्रहरीबाट ५ र थप २० सुरक्षाकर्मीको विशेष टोली केही सातासम्म घटनास्थलमै बस्यो ।

शंकास्पद व्यक्तिलाई सोधपुछ, कतिपय स्थानमा खानतलासी, कल डिटेल परीक्षणलगायत अनुसन्धानका धेरै पाटोमा प्रहरीले कार्य गर्‍यो । तर, हत्या भएको दुई वर्ष बितिसक्दा पनि प्रहरीले हत्यारा पत्ता लगाउन सकेको छैन ।

पीडित परिवारले दुई वर्षसम्म न्याय नपाउनु दुःखद रहेको भन्दै नागरिक अगुवाले प्रहरीमाथि प्रश्‍न उठाउन थालेका छन् । ‘पीडित परिवारले वर्षौसम्म न्याय नपाएका घटनाहरू धेरै छन् र यो ज्यादै दुःखद हो’ नागरिक अगुवा सुखराम यादवले भने, ‘समाजमा शान्ति सुरक्षा कायम राख्नमा प्रहरीले तत्परता देखाउनुपर्ने थियो, तर यसरी वर्षौंसम्म पीडित परिवारले न्याय नपाएको सुन्दा मन दुखेको छ ।’

पछिल्ला केही वर्षयता अपराधका घटनामा अनुसन्धान गर्न प्रहरी असफल देखिएको भन्दै मानव अधिकारकर्मीले पनि प्रश्‍न उठाउन थालेका छन् । ‘जघन्य अपराधमा पनि प्रहरीले अनुसन्धानमै वर्षौं बिताउँछन्’ मानवअधिकारकर्मी जंगबहादुर सिंहले भने, ‘घटनालगत्तै प्रहरीको थालेको अनुसन्धान देखेर हत्यारा पत्ता लाग्छ भने विश्वास थियो, तर पछिल्लो समयमा प्रहरीले अनुसन्धानमा तदारुकता देखाएको देखिँदैन ।’ उनले अपराधीलाई कानुनी दायरामा ल्याएर प्रहरीले समाजप्रति बोकेको जिम्मेवारी पूरा गर्न अग्रसर हुनुपर्नेमा जोड दिए ।

यता, जिल्ला प्रहरी कार्यालय सप्तरीका प्रहरी नायव उपरीक्षक भूवनेश्वरप्रसाद साहले घटनामा अनुसन्धान भइरहेको बताए । ‘जबसम्म अनुसन्धान पूरा हुँदैन, तबसम्म घटनाको प्रगति शून्य नै हुन्छ’ उनले शिलापत्रलाई भने, ‘केही समय लाग्छ प्रगति सय प्रतिशतमा पुर्‍याउन ।’

को थिए साह दम्पती ?

लामो समयदेखि खरचुहियामा बसोबास गर्दै आएका साह दम्पतीको मुख्य घर तत्कालीन बनरझुला गाविस वडा नं. ३ हो । स्थानीयका अनुसार बनरझुलामा उनको मिलको व्यवसाय थियो ।

छोराहरू सत्यनारायण र तेजनारायण सरकारी जागिरे भएपछि उनीहरू मिल बेचेर खरचुहिया सरेका थिए । जेठो छोरा सत्यारायण बीपी कोइराला स्वास्थ्य विज्ञान प्रतिष्ठान धरान र कान्छा छोरा तेजनारायण खानेपानी तथा सरसफाइ डिभिजन कार्यालय उदयपुरमा कार्यरत रहेका छन् ।

घटनाको करिब ५/७ वर्षअघि प्यारालाइसिसका कारण सबुरी थला परेपछि पत्नी बेचनीले ऋणको कारोबार गर्दै आएकी थिइन् । उनीहरूको करिब ३० देखि ४० लाख रुपैयाँ गाउँमा लगानी रहेको स्थानीयको अनुमान छ ।

४१ महिना ३७६ जनाको हत्या

प्रदेश-२ को प्रदेश प्रहरी कार्यालयको तथ्यांकअनुसार पछिल्लो ४१ महिना (आव ०७४/७५ देखि मंसिर मसान्तसम्म) मा यस प्रदेशका आठ जिल्लामा ३७६ जनाको हत्या भएको छ । चालू आवको मंसिरसम्म (आठ महिनामा) मात्र यस प्रदेशमा ४१ जनाको हत्या भएको प्रहरीको तथ्यांक छ ।

जसमा सबैभन्दा बढी रौतहटमा ११, पर्सामा ७, सिरहामा ६, महोत्तरीमा ५, सर्लाहीमा ४, सप्तरीमा ४, बारामा २ र धनुषामा २ जनाको हत्या भएको छ । प्रदेश–२ प्रहरी प्रमुख डीआइजी धीरजप्रताप सिंहका अनुसार अपराधका घटना नियन्त्रणका लागि प्रदेश प्रहरी कार्यालयले रणनीतिक योजना बनाइ जनशक्ति परिचालन गरेको छ ।

डीआइजी सिंह भन्छन्, ‘आपराधिक घटनाको वस्तुनिष्ठ तरिकाले छानबिन गरेर दोषीलाई कानुनको दायरामा ल्याउन अपराधको घटना बढी भएका जिल्लामा विशेष प्रहरी टोली परिचालन गरिएको छ ।’ उनका अनुसार क्विक रेस्पोन्स टिमदेखि निगरानी र नियन्त्रणकारी विशेष टिम रौतहट, पर्सा, सिरहालगायत बढी अपराधका घटना भएका जिल्लामा परिचालन गरिएको छ ।

प्रकाशित मिति: शुक्रबार, फागुन १४, २०७७ १७:४६