कोरोना महामारीमा नेपाली वैज्ञानिकले गरेको योगदान भुल्‍न सकिन्‍न : मन्त्री श्रेष्ठ

कोरोना महामारीमा नेपाली वैज्ञानिकले गरेको योगदान भुल्‍न सकिन्‍न : मन्त्री श्रेष्ठ

A+ A A-

शिक्षा, विज्ञान तथा प्रविधिमन्त्री कृष्ण गोपाल श्रेष्ठले विज्ञानसम्बन्धी चेतना बढाउन र प्रविधिको सही उपयोग गर्न सके कोभिड-१९ र त्यस्ता ठूला महामारीविरुद्धको लडाइँ लड्न सफल हुने बताए ।

उनले कोभिड-१९ महामारीमा नेपाली वैज्ञानिकले गरेको योगदानलाई सरकारले कहिल्यै भुल्न नसक्ने बताएका हुन् । मन्त्रालयले नाष्टका १८ वैज्ञानिकको प्रस्ताव छनोट गरी प्रविधि विकास गर्न दिएको अनुदान र ती प्रस्तावअनुसार प्रविधि विकास गरी सोही प्रविधिको माध्यमबाट कोभिड–१९ नियन्त्रण गर्न महत्त्वपूर्ण भूमिका खेलेको बताए ।

विज्ञान प्रविधि तथा नवप्रवर्तन नीति–२०७६ को कार्ययोजना तयारी गोष्ठीको उद्घाटन गर्दै मन्त्री श्रेष्ठले अहिलेको २१औँ शताब्दीमा विज्ञान र प्रविधिको विकास अपरिहार्य रहेको उल्लेख गरे । ‘नेपालको आर्थिक सामाजिक विकासमा सहयोगी हुने सबै प्राथमिक क्षेत्रमा अध्ययन, अनुसन्धान र प्रविधि विकासलाई महत्त्व दिने योजना आवश्यक छ’ उनले भने ।

विकसित राष्ट्रले विज्ञान प्रविधि र नवप्रवर्तनबाटै मुलुकलाई आमुल परिवर्तन गरेको चर्चा गर्दै उनले नेपालले सो क्षेत्रमा प्रगति गर्न आवश्यक रहेको बताए । उनले स्याटेलाइट र रकेट बनाउने युवा वैज्ञानिकको प्रशंसा गर्दै त्यस्ता वैज्ञानिकलाई सरकारले सम्मान र सहयोग गर्नुपर्ने बताए ।

गोष्ठीमा बोल्दै शिक्षा सचिव रमप्रसाद थपलियाले हजारभन्दा बढी सरोकारवाला निकाय, वैज्ञानिक लगायतसँग छलफल गरी तयार भएको कार्यान्वयन योजनालाई लागू गर्न सबैको सहयोग अपरिहार्य रहेको उल्लेख गरे । 'विज्ञान, प्रविधि नवप्रवर्तक नीति २०७६ लाई कार्यान्वयन गर्न मन्त्रालय प्रतिबद्ध रहेको छ' उनले भने । उनले मस्यौदामा उल्लेख भएका विषयलाई तीनै तहका सरकारले लागू गर्ने महत्त्वपूर्ण भूमिका रहने चर्चा गरे ।

विज्ञान सचिव डा. सञ्जय शर्माले वर्तमान समयमा विकासको परिभाषा विज्ञानबाहेक अरु हुन नसक्ने बताए । उनले भने '२०६१ सालमा नीति थियो, कार्यान्वयन हुन सकेन । २०७६ सालमा नीति आयो तर कार्यान्वयन गर्ने विषयमा जटिलता देखिएको छ ।' उनले मस्यौदामा अनुसन्धान र प्रवर्द्धनलाई केन्द्रित गरिएको र नाष्टलगायत निकायको विभागीय परिकल्पना गरेको जानकारी गराए ।

प्रकाशित मिति: बिहीबार, फागुन १३, २०७७ १९:१४