कांग्रेसले नेकपा विभाजनको टुंगो नलागेसम्म सत्ता गठबन्धनबारे निर्णय नगर्ने

कांग्रेसले नेकपा विभाजनको टुंगो नलागेसम्म सत्ता गठबन्धनबारे निर्णय नगर्ने

A+ A A-

प्रमुख प्रतिपक्षी नेपाली कांग्रेसले गठबन्धन सरकार निर्माणको परिस्थिति आइनसकेको प्रारम्भिक निष्कर्ष निकालेको छ ।

नेकपा कानुनी रुपमा विभाजित नभएको र एकीकरणको सम्भावना जिवितै रहेको ठम्याइ कांग्रेसको छ ।

वरिष्‍ठ नेता रामचन्द्र पौडेलले नेकपा विभाजनको स्थिति प्रष्ट नभएकाले पार्टीले कुनै निर्णय नगर्ने बताए । ‘पहिले नेकपा विभाजनको विषय संसद्‍मा प्रवेश गर्‍यो भने हामीले हाम्रो पोजिसन प्रष्ट पार्ने हो,’ उनले भने, ‘विभाजनको टुंगो नलाग्दै हामीले निर्णय गर्दैनौं । ’

पौडेलले छोरो नपाई कन्दी बाट्ने कुरा नहुने बताए । ‘नेकपाको कुरा के हो ? उनीहरू विभाजन भएका हुन् कि होइनन् यसबारेमा प्रष्ट हुनुपर्छ । भोलि संसद्‍मा विषय आयो भने हामीले निर्णय गर्ने हो,’ उनले भने, ‘छोरो नपाई कन्दी बाट्ने कुरा हुँदैन ।’

सहमहामन्त्री डा‍ प्रकाशशरण महतले नेकपा विभाजनको टुंगो नलागेसम्म कांग्रेसले सरकारबारेमा निर्णय गर्नु अपरिपक्व हुने ठहर बैठकले गरेको बताए ।

सरकार राख्ने कि हटाउने भन्ने कुरा कांग्रेस भन्दा नेकपा नै निर्णायक हो । नेकपा विभाजन भएको हो कि होइन भन्नेक कुरा पहिले प्रष्ट हुनुपर्छ, महतले भने,’हामीले बैठकमा राजनीतिक घटनाक्रमको समीक्षा गरेका छौं तर सरकारबारे अहिले हाम्रो कुनै धारणाा हुन्न ।’

संसद्मा अविश्वासको प्रस्ताव आएमा संसदमै छलफल हुनै उनको भनाइ छ । कानुनी रुपमा नेकपा विभाजित नभएकाले कांग्रेसले थप निर्णय गर्न आवश्यक नरहेको उनले बताए ।

यस्तै नेता अर्जुनरसिंह केसीले नेकपा विभाजित भएर सरकार शून्यताको हुने स्थितिमा मात्रै कांग्रेस सत्ता निर्माणमा संलग्न हुने बताए ।