महासंघ र नेपाल बैंकर्स संघबीच ऋण सहजीकरणमा सहकार्य गर्ने समझदारी

A+ A A-

नेपाल उद्योग वाणिज्य महासंघ र नेपाल बैंकर्स संघबीच लघु, घरेलु, साना तथा मझौला उद्यम (एसएमई) को प्रवर्द्धन एवं संरक्षणका लागि वित्तीय कर्जालगायतका सेवा प्रवाहमा सहजीकरण गर्न समझदारीपत्रमा हस्ताक्षर भएको छ । समझदारीपत्रमा महासंघका अध्यक्ष शेखर गोल्छा र बैंकर्स संघका अध्यक्ष भुवनकुमार दाहालले बिहीबार एक कार्यक्रमबीच महासंघको सचिवालयमा हस्ताक्षर गरेका हुन् ।

दुवै संस्थाबीच भएको समझदारीमा वाणिज्य बैंक र एसएमईजबीच कर्जालगायत वित्तीय सेवा प्रवाहमा संयुक्त पहलबाट नै उद्यमी, व्यवसायी एवं बैंकहरूका बीच हुने सेवा प्रवाहमा विश्वसनीय र जोखिमरहित व्यावसायिक वातावरण सिर्जना गर्ने उल्लेख छ ।

त्यस्तै, उद्यमी, व्यवसायी एवं बैंकहरूका हित प्रवर्द्धन गर्न, एसमएमईजको क्षेत्रमा हुने सेवालाई प्रभावकारी बनाउन एवं सेवा सहजीकरण गर्न केन्द्रीय तथा प्रादेशिक तहमा संयुक्त कार्यदल गठन गर्ने र कार्यदलले वित्तीय सेवा प्रवाहको सहजीकरणका निमित्त आवश्यक नीतिगत सुझाव तर्जुमा गरी सम्बन्धित निकायमा समन्वय गरी कार्यान्वयनका लागि अनुरोध गर्ने र आवश्यकताअनुसार संयुक्त रूपमा प्रदेशस्तरीय वित्तीय साक्षरता कार्यक्रमहरू संचालन गर्ने समझदारीपत्रमा उल्लेख छ ।

महासंघका अध्यक्ष गोल्छाले मुलुकभित्र एसमएमईजको प्रवर्द्धनमा दुवै संस्थाबीच भएको यो समझदारी कोसेढुंगा साबित हुने बताए । उनले सहकार्यको नयाँ पहलबाट एसएमईले विशेष गरी ऋणको सहज पहुँचमा भोग्दै आएको समस्यालाई सम्बोधन गर्ने बताए ।

महासंघका वरिष्ठ उपाध्यक्ष चन्द्रप्रसाद ढकालको पनि उपस्थिति रहेको सो अवसरमा बैकर्स संघका अध्यक्ष दाहालले एसएमईको सहयोगका लागि सहकार्य गर्न दुवै संस्थाबीच भएको समझदारीमाथि आफूलाई गर्व महसुस भएको बताउँदै अगाडि भने, 'हामी दुवै संस्था समृद्धिका असल साझेदार हौँ । हामी यसलाई केन्द्रदेखि प्रदेशसम्मै लैजान्छौँ ।'

महासंघको घरेलु तथा साना उद्योग समितिका सभापति डीबी बस्नेतले यो प्रयासबाट साना तथा मझौला उद्योग व्यवसायले ठूलो राहतको महसुस गर्ने भएकाले समझदारीअनुसार छिट्टै दुवै संस्था र आईएलओसमेत बसेर कार्ययोजना बनाइ कार्यान्वयनमा जाने प्रतिवद्धता जनाए ।

अन्तर्राष्ट्रिय श्रम संगठनका वरिष्ठ अधिकृत प्रकाश शर्माले एसएमईहरूको ८० प्रतिशत समस्या ऋणको सहज पहुँचको अभाव नै रहेको पाइएकाले एसएमईहरूलाई नै केन्द्रित गरि भएको यो समझदारीले अब त्यो समस्यालाई सम्बोधन गर्ने विश्वास प्रकट गरे । मुलुकभित्रको कुल रोजगारीमा करिब ९५ प्रतिशत योगदान एसएमईहरूकै भएकाले यो समझदारीले एसएमईहरू फस्टाउन विशेष सहयोग पुग्ने बताए । कार्यक्रममा दुवै संस्थाका पदाधिकारीरूको उपस्थिति थियो ।

प्रकाशित मिति: बिहीबार, फागुन १३, २०७७ १८:३४