ग्वार्काे तरकारी बजारमा कुमारी बैंकको क्यूआर भुक्तानी सेवा

A+ A A-

कुमारी बैंकले ललितपुरस्थित ग्वार्को तरकारी तथा फलफूल बजारमा मोबाइल फोनबाट सहज र सुरक्षित तरिकाले गर्न सकिने क्यूआर कोड भुक्तानी सेवा बिस्तार गरेको छ ।

ललितपुर महानगरपालिकाका मेयर चिरीबाबु महर्जन, कुमारी बैंकका प्रमुख कार्यकारी अधिकृत सुरेन्द्र भण्डारीले संयुक्त रूपमा सो क्यूआर स्ट्याण्ड तरकारी व्यवसायीहरूलाई हस्तान्तरण गरेका हुन् ।

बैंकका प्रमुख कार्यकारी अधिकृत भण्डारीले भने, 'यस क्यूआर प्रणालीअन्तर्गतको भुक्तानीमा नगद बोक्नु नपर्ने, नगद हराउने/चोरी हुने सम्भावना नरहने, आफ्नो बैंक खाताबाट सिधै भुक्तानी गर्न मिल्नेजस्ता फाइदाहरू छन् । त्यसैगरी, याे सेवा बिस्तार भएसँगै व्यवसायीहरू हरेक दिन बिक्री गरिएको रकम जम्मा गर्न बैंक धाई राख्नुपर्ने तथा खुद्रा पैसा बोक्नुपर्ने झन्झटबाट पनि मुक्त हुनेछन् । उक्त सेवाको प्रयोग गर्दा अतिरिक्त शुल्क पनि लाग्ने छैन ।'

कुमारी बैंकले नगद कारोबारकोे विकल्पमा आफ्नो मोबाइल एपमार्फत क्यूआर भुक्तानी गर्न सकिने डिजिटल प्रविधिलाई प्रवर्द्धन गर्दै आइरहेको छ ।

क्यूआर कोड भुक्तानीमा मर्चेन्टको संख्या र पहुँच दिनानुदिन बढ्दै गइरहेको हुनाले सो प्रणाली नगदरहित कारोबारको एक उत्कृष्ट र भरपर्दो माध्यम बन्न जानेमा बैंक विश्वस्त रहेकाे प्रमुख कार्यकारी अधिकृत भण्डारीले बताए ।

डिजिटल भुक्तानीमा विश्वसनीयता बढाउन र नगदरहित कारोबारलाई थप प्रोत्साहन गर्न बैंकले समयसमयमा डिजिटल कारोबारसम्बन्धी सचेतना कार्यक्रमहरू समेत गर्दै आइरहेको छ । हालसम्म यस बैंकले ७ हजार ३ सयभन्दा बढी व्यापारी (FonepayQR) डिजिटल भुक्तानी प्रक्रियामा आवद्ध गराइसकेको छ ।

यस बैंकले देशभर रहेका १९२ शाखा, १६२ एटीएम, २५ शाखारहित बैंकिङ इकाई तथा १३ एक्सटेन्सन काउन्टरमार्फत बैंकिङ सेवा प्रदान गरिरहेकाे छ ।

प्रकाशित मिति: बिहीबार, फागुन १३, २०७७ १८:००