प्रधानमन्त्री ओलीको धानकथा सुनेर नार्कका वैज्ञानिक ट्‌वाँ

A+ A A-

प्रधानमन्त्री केपी ओलीले १२ फागुनमा राजधानीमा आयोजित सोयल डिजिटल म्याप सार्वजनिक कार्यक्रममा वैज्ञानिकहरूलाई कृषिसम्बन्धी कथा सुनाए ।

कृषि अनुसन्धान परिषद् (नार्क)ले माटोको मापन परीक्षण गर्न सञ्चालनमा ल्याएको अनलाइन प्रणालीको उद्घाटन गर्न पुगेका प्रधानमन्त्री ओलीले कार्यक्रममा उपस्थित वैज्ञानिकतिर हेर्दै धानको कथा सुनाएका थिए । प्रधानमन्त्री ओलीले धानका कथा सुनाउँदा वैज्ञानिकहरू भने मुखामुख गरेर हाँसिरहे ।

प्रधानमन्त्री ओलीले उदघाटन कार्यक्रमपछि मन्तव्य राख्ने क्रममा नार्कका २ दर्जनभन्दा धेरै वैज्ञानिकलाई छोटो–लामो कथा सुनाए । प्रधानमन्त्रीले नार्कका वैज्ञानिकलाई चामलबारे धेरै समय लिएर चर्चा गरे ।

प्रधानमन्त्रीकाे धानको कथा

नेपाली समाजमा लामो चामलको भातको सिता मन पर्छ । नेपालीले मन पराउने चामलको सितामा अलिकति जिरा हालेर बनाएको टमाटरको अचारसँग भात खाँदा सान हुने प्रधानमन्त्रीले ठट्यौली पारामा चर्चा गरे ।

‘नेपालमा पाइने मसिनो चामलभित्र महत्त्वपूर्ण अर्थसँगै प्रविधिको प्रयोगबाट चामल बनाएको हुन्छ । मसिना बनाएका लामो चामल थोत्रो मात्र होइन, पुरानाे पनि हो’, प्रधानमन्त्रीले थपे, 'लामो र पातलो चामल पुरानो थोत्रो चामल हो । यसलाई नयाँ ढंगले बनाउनुपर्छ । नेपालमा पाइने विभिन्न प्रकारका चामलका बारेमा धर्म र शास्त्रमा समेत प्रस्ट खुलाइएको छ ।’

यसरी प्रधानमन्त्री ओलीले धान र चामलका बारेमा उदाहरणसहित कथा सुनाउँदा कार्यक्रमको मञ्च अगाडि बसेका कृषिविज्ञसँगै वैज्ञानिकहरू भने ट्वाँ परेर भाषण सुनिरहे । प्रधानमन्त्री ओलीले धानबाली बिहान सूर्य उदाउँदा कता फर्किन्छ र बेलुका घाम अस्ताउँदा कतातिर फर्किएको हुन्छ भनेर पनि उदाहरण दिए ।

प्रधानमन्त्री ओलीले वैज्ञानिक र कृषिविज्ञतिर हेर्दै भने, ‘चामल चाहिँ कसरी भयो एक इन्चको ? कुनै धानको चामल देख्नुभएको छ एक इन्च लामो ?’, फेरि उनले दोहोर्‍याए, ‘भरे घरमा गएर चामलको आकार र लम्बाइ हेर्नुहोस् । लामो चामलमा खाद्य पोषक तत्त्वसमेत हुँदै हुँदैन । भरे गएर घरमा परिवारसँग सल्लाह गर्नुस्, खान छाड्ने पक्षमा पुग्नुहुन्छ ।’

धेरै धर्मशास्त्रमा पहिलो वर्षको अन्न बिउ प्रयोग गर्न जोगाउनू भनेर प्रस्ट लेखेको प्रधानमन्त्रीले बताए । शास्त्रमा दोस्राे वर्ष उत्पादन भएको अन्न भने खानाका लागि प्रयोग गरिन्छ र त्यसमा धेरै पौष्टिक तत्त्व हुने ओलीले वैज्ञानिकअघि दाबी गरे । प्रधानमन्त्रीले भने, 'तेस्राे वर्ष उत्पादन भएको अन्न होम, यज्ञादिमा धेरै प्रयोग गरिन्छ । किनकि यो वर्ष उत्पादन भएको अन्नमा पौष्टिकता धेरै कम हुन्छ भनेर शास्त्रमा उल्लेख छ ।'

नेपालमा पञ्चम वर्षमा उत्पादन भएको चामल पेलेर लामो बनाएर धेरै खान्छौ भन्दै ओलीले याे स्वास्थ्यका लागि धोका भएको वैज्ञानिकका अघि बताए ।

प्रधानमन्त्री ओलीले वैज्ञानिकलाई यसरी कथा सुनाएको पहिलो पटक भने होइन । उनले गत महिना राजधानीमा भएको कृषिको एक कार्यक्रममा कृषिविज्ञ र वैज्ञानिकहरूलाई हलो, जुवा, कोदालो र अन्य कृषिमा प्रयोग गरिने औजार यसरी उत्पत्ति भएका हुन् भनेर कथा सुनाए ।

प्रधानमन्त्री ओली पछिल्लो समयमा कार्यक्रममा भाषण गर्दा उदाहरणका रूपमा शास्त्रलाई जोडेर उखानटुक्का सुनाउने गरेका छन् ।

प्रकाशित मिति: बिहीबार, फागुन १३, २०७७ १६:४४