जागिर छाड्दा पाएकाे पैसाले कुखुरापालन, वार्षिक ५० लाख रुपैयाँ आम्दानी

A+ A A-

प्युठानकाे झिमरुक गाउँपालिका–६, चिसाबाङका ईश्वरीप्रसाद पोखरेलले जिल्लामै ठूलो लगानीमा व्यावसायिक रूपमा लेयर्स जातको कुखुरापालन गर्दै आएका छन् । भारतीय सेनाको जागिरका क्रममा खुट्टामा गोली लागेपछि सात वर्षकै अवधिमा २०६१ सालमा एकमुस्ट रकम लिई जागिरबाट अवकाश लिएर उनी व्यवसायमा लागेका थिए ।

नेपालमै केही गर्ने मनसायले व्यवसायमा जोडिएको उनको भनाइ छ । प्रिसा पशुपक्षी तथा कृषि फार्ममार्फत १४ मंसिर २०७५ देखि लेयर्स कुखुरापालन सुरु गरेको उनले बताए । फार्ममा अहिले सात हजार लेयर्स जातका कुखुरा छन् ।

पालेको साढे पाँच महिनामा लेयर्स जातको कुखुराले अण्डा दिन सुरु गर्छ । सोहीअनुसार फार्ममा दैनिक २८ पेटी (५ हजार ८ सय ८० गोटा) अण्डा उत्पादन हुने गरेको फार्मका व्यवस्थापक वियजकुमार गुप्ताले बताए । यहाँ उत्पादन भएको अण्डा जिल्लासँगै छिमेकी जिल्ला अर्घाखाँची, गुल्मी तथा भैरहवा, नेपालगञ्ज र काठमाडौँमा पनि खपत हुने गरेको उनकाे भनाइ छ ।

लकडाउनको समयमा बजारका लागि केही समस्या भए पनि हाल धेरै ठाउँबाट माग हुने हुँदा अण्डा पुर्‍याउन धौधौ भएको उनकाे भनाइ छ । साढे ४ करोड रुपैयाँ लगानीमा लेयर्स कुखुरा फार्मसँगै तरकारी खेतीसमेत गरेको व्यवस्थापक गुप्ताले बताए । 'सुरुमा १० हजार कुखुरा फार्ममा हालेका थियौँ', गुप्ताले भने, 'हाल सात हजार छन् ।'

अबको केही समयमा कुखुरा थप्ने योजना रहेको उनले बताए । कुखुरा थप्नका लागि छ करोड रुपैयाँ लगानीमा संरचना निर्माण हुँदै गरेको उनले जानकारी दिए । नयाँ संरचना निर्माणपश्चात् दुई लाख कुखुरा अट्नेछन् । बाइस रोपनी क्षेत्रफल जग्गामा फार्म सञ्चालन गरिएको छ । सात रोपनी जग्गा वार्षिक ६० हजार रुपैयाँ तिर्ने गरी लिजमा लिएकोसमेत व्यवस्थापक गुप्ताले बताए ।

फार्म सञ्चालनका लागि आफ्नै लगानीमा लिफ्टमार्फत खानेपानी, बिजुलीको ट्रान्समिटर, ७ सय मिटर सडक निर्माणसमेत गरिएको छ । त्यस्तै ढुवानीका लागि एउटा पिकअप, एउटा कार र एक ट्रयाक्टरसमेत रहेको उनले बताए ।

उनका अनुसार कुखुरालाई दाना भैरहवाबाट खरिद गर्ने गरिएको छ । फार्म सञ्चालनका लागि १८ कर्मचारीसमेत राखेको उनकाे भनाइ छ । फार्मबाटै विभिन्न क्षेत्रको खर्च कटाएर वार्षिक ५० लाख रुपैयाँ आम्दानीसमेत हुँदै आएको व्यवस्थापक गुप्ताले बताए ।

२ साउन २०७६ मा अविरल वर्षापछिको पहिरोले कुखुरा राखेको टहरा पुर्दा फार्ममा रहेका १ हजार २ सय कुखुरा नष्ट हुनुका साथै टहरा क्षतिग्रस्त हुँदा करिब ५० लाख रुपैयाँबराबरको क्षति भएको फार्म सञ्चालक पोखरेलले बताए । हालसम्म कुनै पनि निकायबाट फार्म सञ्चालनका लागि सहयोग नपाएको र जिल्लास्थित स्थानीय निकाय, सरकारी तथा गैरसरकारी संस्थाबाट सेवा सुविधा नपाएको उनले गुनासाे गरे ।

पोखरेलले तरकारी खेती पनि गर्दै आएका छन् । गत वर्षको मंसिरदेखि नौ वटा टनेलमा टमाटर, भाण्टा, करेला, काउलीसँगै मौसमी तथा बेमौसमी तरकारी उत्पादन हुँदै आएको छ । यहाँ उत्पादित तरकारी जिल्लामै बिक्री हुन्छ ।

अहिलेसम्म १० लाख रुपैयाँको तरकारी बिक्रीसमेत गरेको व्यवस्थापक गुप्ताले बताए । त्यस्तै, नर्सरीका लागि हरितगृहसमेत निर्माण हुँदै गरेको गुप्ताले बताए । ४० वर्षीय पोखरेलले २०६३ सालदेखि विभिन्न क्षेत्रमा व्यवसाय गर्दै आएका छन् । मकवानपुरको चित्लाङमा बाख्रापालन, चितवनमा गाईफार्म र कपिलवस्तुमा ४० हजार लेयर्स कुखुरापालन गर्दै आएको उनले बताए ।

विभिन्न क्षेत्रमा गरेर ३ सय ५० व्यक्तिलाई रोजगारीसमेत दिएको पोखरेलले बताए । लेयर्स (कुखुरा) फार्म र प्राङ्गारिक मल उत्पादन गर्ने उद्देश्यले पोखरेलले १३ करोड रुपैयाँ लगानीमा अत्याधुनिक फार्म स्तरोन्नति गर्दै हुनुहुन्छ । ८ करोड रुपैयाँको भवन निर्माण र ५ करोड रुपैयाँको स्वचालित केज गरी जम्मा १३ करोड रुपैयाँको अत्याधुनिक प्रविधिजन्य भवन निर्माणका लागि शिलान्यास गरिएको छ । भवन दुई वर्षभित्र निर्माण हुनेछ । भवन निर्माणपश्चात् एकैैपटकमा ३ लाख लेयर्स पालेर दैनिक ३ लाख अण्डा उत्पादन गर्ने लक्ष्य राखिएको उनले बताए ।

प्रकाशित मिति: बिहीबार, फागुन १३, २०७७ १०:५५