वरिष्ठ अधिवक्ता शम्भु थापा भन्छन्- प्रधानमन्त्री ओलीले तत्काल राजीनामा दिनुपर्छ

वरिष्ठ अधिवक्ता शम्भु थापा भन्छन्- प्रधानमन्त्री ओलीले तत्काल राजीनामा दिनुपर्छ

A+ A A-

वरिष्ठ अधिवक्ता शम्भु थापाले प्रधानमन्त्री केपी शर्मा ओलीसँग नैतिकता भए तत्काल राजीनामा दिनुपर्ने बताएका छन् ।

बुधबार काठमाडौंमा आयोजित साक्षात्कारमा उनले नैतिकता बाँकी भए प्रधानमन्त्री ओलीले तत्काल राजीनामा दिनु पर्ने बताएका हुन् । उनले संसद् पुनर्स्थापना गर्ने अदालतको फैसलाले संवैधानिक निकास दिएको बताए । सर्वोच्च अदालतले संसद् र संविधान मार्न सक्दैनौं है भनेर भनेको पनि उनले बताए ।

‘असीमित अधिकार त संविधानवादमा मात्रै छ । कार्यकारिणी कार्यपालिकाको अधिकार शासन गर्ने यहीँ छ । तपाईँले संसदलाई मार्न सक्नुहुन्न । खान सक्नुहुन्न भनेर सर्वोच्च अदालतले प्रष्ट रुपमा भनेको छ,’ उनले भने, ‘ अबको जवाफदेहिता सांसदहरूमाथि जान्छ । उहाँहरूको परिपक्वतामाथि जान्छ । नेताहरूको परिपक्वतामाथि जान्छ ।’

थापाले अब मुलुकमा राजनीतिक स्थायित्व हुनुपर्नेमा जोड दिए । थापाले भने,‘नागरिक समाजले आवाज उठाइराखेको छ, अब त्यो आवाजलाई सम्बोधन गर्छ कि गर्दैन ? सम्बोधन गरिएन भने नागरिक समाज चुप लागेर बस्दैन । नेपाली जनतालाई सुशासन दिनुपर्छ । सुशासनको प्रत्याभुति दिने मानिसहरू लिएर जानुपर्छ ।’

थापाले राष्ट्रपति विद्यादेवी भण्डारीले आफ्नो पदको ओझ नराखेको बताए । ‘मैले मनको कुरा गर्दा उहाँ (राष्ट्रपति) ले संविधानको ओझ राख्न सक्नुभएन । प्रधानमन्त्रीले सिफारिस गर्नेबित्तिकै उहाँले संविधानमा छ कि छैन ? भनेर उहाँले छलफलका लागि पनि बोलाउनुभएन । राजाले त गिरिजाले विघटनको सिफारिस गर्दा ४–५ दिन त छलफलमा बोलाएका थिए । संविधान र संसद् भनेको राष्ट्रको सम्पत्ति हो । राष्ट्रपतिले संविधानको ओझ, सम्मान राख्नुसक्नुभएन ,’ उनले भने ।