ओलीले म सच्चिन चाहन्छु भनेर पार्टी एकताको आह्वान गर्नुपर्छ : बामदेव गौतम (अन्तर्वार्ता)

ओलीले म सच्चिन चाहन्छु भनेर पार्टी एकताको आह्वान गर्नुपर्छ : बामदेव गौतम (अन्तर्वार्ता)

A+ A A-

सर्वोच्च अदालतले प्रतिनिधिसभा पुनर्स्थापनाको फैसला गरेसँगै नेकपाका उपाध्यक्ष बामदेव गौतमले प्रधानमन्त्री केपी शर्मा ओलीलाई आत्मालोचना गर्दै राजीनामा दिन सुझाव दिएका छन् ।

प्रधानमन्त्रीको हैसियतले गरिएको निर्णय अदालतले अवैधानिक ठहर गर्दै उल्ट्याएपछि नैतिकताका आधारमा राजीनामा दिएर सरकार छाड्नुपर्ने गौतमले बताएका हुन् । गौतमले पार्टी एकता र राष्ट्रिय राजनीतिमा देखिएको गाँठो फुकाउने पहल पुष्पकमल दाहाल 'प्रचण्ड' र माधवकुमार नेपालले लिनुपर्ने पनि बताए । बुधबार उपाध्यक्ष गौतमसँग न्यूज एजेन्सी नेपालले गरेको कुराकानी :

प्रतिनिधिसभा पुनर्स्थापना गर्ने सर्वोच्च अदालतको फैसलालाई कसरी लिनुभएको छ ?

सर्वोच्च अदालतको संवैधानिक इजलासले गरेको यो निर्णयले नेपालको संविधानको संरक्षण गरेको छ । यो निर्णयले नेपाली जनताको सार्वभौम अधिकारलाई पुनर्स्थापित गरेको छ । र, यसले स्वेच्छाचारी तरिकाले जे मनलाग्यो, त्यही गर्दै हिँड्न पाइँदैन भनेर अनुशासनबोध पनि गराएको छ । त्यसैले यो निर्णय नेपालको संविधानबमोजिम, नेपालको संविधानको मर्म र भावनाबमोजिम र हामीले निर्माण गरेको संविधानको अक्षरसँग पनि सम्बन्धित बनाएर निर्णय भएको छ ।

प्रतिनिधिसभा भङ्ग गर्ने काम असंवैधानिक हो र यससित सम्बन्धित भएर सरकारले जति पनि काम गरेको छ, त्यो सबै असंवैधानिक भएकाले प्रतिनिधिसभा मात्रै पुनर्स्थापित होइन, अरु धेरै काम पनि असंवैधानिक भएकाले खारेज हुन्छन् । ज्यादै ठूलो ऐतिहासिक महत्त्व राख्ने निर्णय भएको छ । मैले यसलाई ऐतिहासिक निर्णय भनेर भनेको छु ।

सरकारको एउटा निर्णयले राष्ट्रिय राजनीति, पार्टीभित्रको राजनीति सबै खलबलिएको थियो । अब कोर्स कताबाट सुरु गर्नुपर्छ र तपाईंले उठाउँदै आएको पार्टी एकताको कुरा अब कुन शिराबाट हुन्छ ?

पार्टी एकताका लागि सुरु गर्नुपर्ने दुई अध्यक्षले हो । दुवै अध्यक्षले पार्टी एकीकरण गर्ने विषय उठाउनु भएन । पार्टी त विभाजन भइसक्यो, अब मिल्न सक्दैन भन्ने प्रचण्डको भनाइ आयो र पार्टी फुटाएको हामीले होइन, फुटाएको केपी ओलीले हो भनेर भन्नुभएको छ ।

पार्टी फुटाउने काम प्रचण्ड–माधवले हो भनेर यतातिर भनेको छ, अनि साइडबाई साइड पार्टी फुटाउने बामदेव हो भनेर दुवैले आ–आफ्नो तरिकाले भन्नुभएको छ । नेपाली जनताले विश्वास गरेको त्यस्तो पार्टीलाई फुटाएर उहाँहरू हिँड्नुभएको छ ।

मैले औपचारिक र अनौपचारिक रूपमा एकताका निम्ति प्रयत्न गर्ने हो । पहिला म दुईवटा अध्यक्ष र महासचिवलाई पार्टी एकताका लागि पहल गर्नुहोस् भनेर भन्छु ।

यो पुनर्स्थापनाले योबीचमा भएका क्रियाकलापलाई पनि पुनर्स्थापित गर्नुपर्छ । यद्यपि सर्वोच्च अदालतले गरेको निर्णय हाम्रो पार्टीभित्र लागू हुँदैन । पार्टीभित्र पार्टीको विधान लागू हुन्छ । त्यसैले पार्टीका नेताहरूले त्यो गर्नुभएन भने हामी पार्टी एकता राष्ट्रिय अभियानमा सामेल भएकाहरूले एकताका लागि पहलकदमी गर्छौं र यो निरन्तर अगाडि बढ्छ ।

हिजो जसले निर्णय गरेको थियो, त्यो निर्णय अवैधानिक गरिसकेको छ भनिसकेको अवस्थामा प्रधानमन्त्री र प्रधानमन्त्रीलाई असंवैधानिक छ भनी हिजो पनि हट र आज पनि हट भनेर भन्ने अर्को पक्षबीच अब कसको पहिलो स्टेप हुनुपर्छ । कहाँबाट सुरु हुनुपर्छ ?

जसले मैले जितेको छु भनेर भन्नुभएको छ, उहाँबाट सुरु हुनुपर्ने हो । हिजो प्रचण्डले विभिन्न मिडियामा बोल्नुभएको प्रतिक्रिया मैले सुनेँ । उहाँले चाल्नुभएको कदम सही सावित भएको छ, केपी ओलीले चाल्नुभएको कदम गलत सावित भएको छ र त्यो असंवैधानिक छ भनेर भन्ने छ । यस्तो अवस्थामा फेरि पुनः पार्टी एकीकरणका निम्ति प्रचण्डले भूमिका खेल्नुपर्ने हो । पराजित भएकाले भनेर त अरुले मान्दैनन् । त्यसैले जसले आफूलाई म विजयी भए भनेर भन्छ उसले भन्ने हो ।

तर, प्रचण्डले त्यस्तो भन्नुभएको मैले पाइनँ । पार्टी एकता हुन्छ, पार्टी एकता गर्नुपर्छ अब सबै साथीहरू एकजुट हुनुहुन्छ । म उहाँहरूलाई आह्वान गर्छु- एकता हुनका निम्ति भनेर भन्नुभन्दा अब सबै मैले बनाएको पार्टीमा आउनुहोस् भनेर भन्नुहुन्छ । त्यो भएर जिम्मेवारी कसैले पनि लिनुभएन । लिनुपर्ने जिम्मेवारी यसपटक प्रचण्ड र माधव नेपालले हो । पार्टी फुटिसक्यो, त्यो फुटेको पार्टी गइसक्यो । अब हामीसँग भएको पार्टीमा आउनुपर्छ भन्ने उहाँको अभिव्यक्ति पाइयो । त्यो अभिव्यक्ति उहाँहरूका लागि त सही होला तर मलाई राम्रो लागेन ।

अब तपाईं के गर्नुहुन्छ ?

मैले औपचारिक र अनौपचारिक रूपमा एकताका निम्ति प्रयत्न गर्ने हो । पहिला म दुवै अध्यक्ष र महासचिवलाई पार्टी एकताका लागि पहल गर्नुहोस् भनेर भन्छु । केपी ओलीले असंवैधानिक काम गर्नुभयो तर असंवैधानिक काम गरेपछि सर्वोच्च अदालतले त्यसलाई सुधार गरिसक्यो ।

सर्वोच्च अदालतको निर्णय बाहिर आउनेबित्तिकै राजीनामा गर्नुपर्थ्याे, अहिलेसम्म पनि उहाँले राजीनामा गर्नुभएको छैन । म फेरि भन्न चाहन्छु– तुरुन्तै राजीनामा गरेर पार्टी एकताको आह्वान गर्नुहोस् ।

उहाँको कदम असंवैधानिक छ भनिसकेपछि उहाँले पार्टीमा फर्केर आएर आत्मालोचना गर्नुपर्छ । मैले यस्तो गरेँ, त्यसको सजाय सर्वोच्च अदालतको संवैधानिक इजलासले दिइसकेको छ । अब म आत्मालोचना गर्दै एकीकृत पार्टीमा आउँछु र अरु पनि हामी एकीकृत पार्टीलाई अगाडि बढाउन लागौँ भनेर उहाँले भन्नुपर्ने हो ।

सर्वोच्च अदालतको हिजोको निर्णयबाट सरकार प्रमुख र राष्ट्रपतिमाथि नैतिकताको प्रश्न उठ्छ कि उठ्दैन ?

नैतिकताको प्रश्न नीति मान्नेहरूलाई उठ्दो रहेछ । जसले नैतिकता मान्दै मान्दैन, उसका निम्ति नैतिकताको प्रश्न पनि उठ्दो रहेनछ । तर, म के ठान्छु भने लामो समय कम्युनिस्ट आन्दोलनमा लागेकाले यो नैतिकता बुझ्नुहुन्छ । त्यो भएर प्रधानमन्त्री ओलीले चाल्नुभएको कदम असंवैधानिक भइसकेपछि, उहाँले गर्नुभएको काम गलत भइसकेपछि आफूलाई सच्याउन राजीनामा तुरुन्तै गर्नुपर्छ ।

सर्वोच्च अदालतको निर्णय बाहिर आउनेबित्तिकै राजीनामा गर्नुपर्थ्याे, अहिलेसम्म पनि उहाँले राजीनामा गर्नुभएको छैन । म फेरि भन्न चाहन्छु– तुरुन्तै राजीनामा गरेर पार्टी एकताको आह्वान गर्नुहोस् । मैले गल्ती गरेकाले आफूलाई सच्याउन चाहन्छु भनेर प्रधानमन्त्रीले राजीनामा दिएर अब नयाँ किसिमले एकतावद्ध भएर अगाडि बढौँ भनेर भन्नुपर्छ ।

प्रकाशित मिति: बुधबार, फागुन १२, २०७७ १५:१२