कसैले राजीनामा दे भन्दैमा प्रधानमन्त्रीले राजीनामा दिनुहुन्न : शिक्षामन्त्री श्रेष्ठ

कसैले राजीनामा दे भन्दैमा प्रधानमन्त्रीले राजीनामा दिनुहुन्न : शिक्षामन्त्री श्रेष्ठ

A+ A A-

शिक्षा, विज्ञान तथा प्रविधिमन्त्री कृष्णगोपाल श्रेष्ठले कसैले राजीनामा दे भन्दैमा प्रधानमन्त्रीले राजीनामा नदिने स्पष्ट पारेका छन् । पछिल्लो राजनीतिक घटनाक्रमको विश्लेषण गर्दै मन्त्री श्रेष्ठले यो अवस्थामा प्रधानमन्त्री ओलीले कुनै पनि हालतमा राजीनामा नदिने दोहोर्‍याए ।

भक्तपुरमा आयाेजित सीटीईभीटीको ३३औँ वार्षिक उत्सव समारोहलाई सम्बोधन गर्दै उनले भने, 'राजीनामा दिने हामी कायर हो ? कुनै पनि हालतमा राजीनामा आउँदैन । प्रधानमन्त्रीले अविश्वासको प्रस्ताव फेस गर्नुहुन्छ ।'

संसद् सञ्चालन भएपछि प्रक्रियामा जाने र सोही आधारमा प्रधानमन्त्री एवं नेकपाका अध्यक्ष केपी ओलीले फेस गर्ने मन्त्री श्रेष्ठकाे भनाइ थियाे ।

मन्त्री श्रेष्ठले भने, ‘अदालतले गरेको निर्णयलाई हामीले सम्मान गर्छौं तर यो निर्णयले झन् विवाद बढाएको छ । हामी जनताबाट आएका हौँ, जनताले नै अहिलेको संकटकालीन अवस्थाको मूल्यांकन गर्नेछन् ।'

संसद पुनर्स्थापना भएलगत्तै केही नेताले केहीलाई प्रधानमन्त्रीको सपना बाँडेको उल्लेख गर्दै सपना बाँड्दैमा कोही पनि प्रधानमन्त्री हुन नसक्ने मन्त्री श्रेष्ठले स्पष्ट पारे । उनले भने, 'अबको प्रधानमन्त्री पनि केपी ओली नै हो, उहाँले नै निर्वाचन गराउनुहन्छ । हामीले १३ गते फैसला आउने अपेक्षा गरेका थियौँ, प्रधानमन्त्रीले जन्मदिन मनाइरहेको बेला एकाएक फैसला सुनाउँदा गलत भएको छ ।'

मन्त्री श्रेष्ठले थपे, 'अब सबै खेलमैदानबाट छिनोफानो हुनेछ । अदालतको फैसलाबाट राजनीतिक मैदान खुला भएको छ । हामी राजनीतिक मैदानमा उत्रिएका छौँ, खेल खेल्ने तयारीमा छौँ, हामीले गोल गरेरै देखाउँछौँ । हामीसँग मैदानमा पेले छन्, रोनाल्डो छन्, म्यारोडोना र मेसी हामीसँगै छन् । त्यसैले हामीलाई कुनै समस्या छैन, जस्तोसुकै परिस्थिति आए पनि राजनीतिक मैदान छाड्नेवाला छैनौँ, हाम्रै जित सुनिश्चित हुनेछ ।'

'जनता हाम्रो साथमा छन्, जनताको फैसला स्वीकार गर्नेछौँ, नैतिकता आधारमा प्रधानमन्त्रीले राजीनामा दिनुपर्छ' भन्दै फेसबुकमा स्टाटस लेख्ने र सडकमा कुर्लिनेहरूलाई सरकारको तर्फबाट उनकाे जवाफ छ, 'सक्छौ भने अविश्वासको प्रस्ताव ल्याएर हटाएर देखाऊ । सुन हो कि पित्तल, हीरा हो कि सिसा भनी नक्कली र सक्कली भनी छुट्याउन सक्ने क्षमता जनतामा छ ।'

मन्त्री श्रेष्ठले अहिले आन्दोलन गरेर हिँड्ने गुट नक्कली भएको टिप्पणी गर्दै भने, 'काग भएर मयुरको प्वाँख टाँसेर कराउँदै हिँडेका छन् । जनताले असली मयुर चिनेर प्वाँख हाल्ने मयुररूपी कागलाई धिक्कार्नेछन् ।'

प्रकाशित मिति: बुधबार, फागुन १२, २०७७ १२:३८