प्रधानमन्त्रीले तुरुन्त राजीनामा दिनुपर्छ, राष्ट्रपतिले प्रतिनिधिसभा बोलाउनुपर्छ : बामदेव गौतम

प्रधानमन्त्रीले तुरुन्त राजीनामा दिनुपर्छ, राष्ट्रपतिले प्रतिनिधिसभा बोलाउनुपर्छ : बामदेव गौतम

A+ A A-

नेकपाका उपाध्यक्ष बामदेव गौतमले सर्वाेच्च अदालतको संवैधानिक इजलासले गरेको निर्णयलाई स्वागत गर्दै राष्ट्रपतिले प्रतिनिधिसभाको अधिवेशन आह्वान गर्नुपर्ने बताएका छन् । त्यस्तै, प्रधानमन्त्री केपी ओलीले ढिला नगरी तुरुन्त प्रधानमन्त्रीबाट राजीनामा दिनुपर्ने गौतमको भनाइ छ ।

सर्वाेच्च अदालतले मंगलबार प्रधानमन्त्री ओलीले ५ पुसमा गरेको प्रतिनिधिसभा विघटन असंवैधानिक भएको ठहर गर्दै उक्त निर्णय बदर गरिदिएको थियो । यस विषयमा प्रतिक्रिया दिँदै गौतमले अध्यक्षद्वय केपी ओली र प्रचण्डलाई पार्टीको सचिवालय बैठक बोलाउन पनि आग्रह गरेका छन् ।

‘प्रधानमन्त्री केपी ओलीले गत ५ पुसमा गर्नुभएको प्रतिनिधिसभा विघटन असंवैधानिक ठहर भएको छ,’ गौतमले जारी गरेको प्रेस विज्ञप्तिमा भनिएको छ, ‘आजको दिन निरंकुशता स्वेच्छाचारिता, अराजकता र दुराचारीताको पराजय तथा संविधान, कानुन, लोकतन्त्र र जनताको सार्वभौमिकताले पुनर्विजय प्राप्त गरेको ऐतिहासिक दिन हो ।’

यस्तो छ गौतमको विज्ञप्ति :

प्रेस विज्ञप्ति

- - - - - - -

संघीय लोकतांत्रिक गणतन्त्र नेपालको संविधान जारी भए यता वि सं २०७७ साल फागुन ११गतेको दिन
ऐतिहासिक महत्वको रहेको छ ।

यो दिन हाम्रो सम्मानित सर्वोच्च अदालतले हजारौ सपुतहरुको वलिदान तथा लाखौ देशभक्त नेपालीको त्याग र समर्पणवाट प्राप्त नेपालको संविधानको संरक्षण गरेको दिन हो । प्रधानमंत्री केपी वलीले गत पुष ५ गते गर्नु भएको प्रतिनिधिसभा विघटन असंवैधानिक ठहर भएको छ। आजको दिन निरंकुशता स्वेच्छाचारीता, अराजकता र दुराचारीताको पराजय तथा संविधान क़ानून लोकतंत्र र जनताको सर्वभौमिकताले पुनर्विजय प्राप्त गरेको ऐतिहासिक दिन हो । यस अवसरमा म सर्वप्रथम प्रधान न्यायाधीश र संवैधानिक इजलासका न्यायाधीशहरुमा आभार प्रकट गर्दै वहाँहरुलाई हार्दिक धन्यवाद दिन्छु ।

यसअवसरमा म नेपालको नागरिकको हैसियतले निम्नलिखित माँग राख्दछु :-

१) सम्माननिय राष्ट्रपति महोदयले प्रेष विज्ञप्तिबाट संवैधानिक इजलासको निर्णयलाई हार्दिक स्वागत गर्दै प्रतिनिधिसभा अधिवेशन आह्वान गर्नु पर्छ ।

२) प्रधानमन्त्री केपी वलीले प्रधानमन्त्री पदबाट ढिलानगरी तुरुन्त राजिनामा दिनु पर्छ ।

३) नेपाल कम्युनिस्ट पार्टी नेकपाको उपाध्यक्षको हैसियतले म दुवै अध्यक्ष क. केपी वली र क. प्रचण्ड संग तुरुन्तै सचिवालय वैठक धुम्वाराही स्थित के. कार्यालयमा बोलाउन अनुरोध गर्छु ।

वामदेव गौतम

उपाध्यक्ष, नेकपा

१२।११।२०७७

प्रकाशित मिति: बुधबार, फागुन १२, २०७७ ०९:२३