गण्डकीका सांसद भन्छन्- तानाशाह टिक्दैनन् भन्ने पुष्टि भयो

A+ A A-

प्रतिनिधिसभा विघटन गर्ने प्रधानमन्त्री केपी ओलीको कदमलाई सर्वोच्च अदालतले उल्ट्याइदिएको छ । सर्वाेच्चको यो निर्णयसँगै प्रधानमन्त्री ओली र राष्ट्रपति विद्यादेवी भण्डारीमाथि नैतिक संकट आइपरेको छ ।

राजनीतिक वृत्त र नागरिक समाजले राष्ट्रपति र प्रधानमन्त्री दुवैले नैतिकताका आधारमा पद छोड्नुपर्ने बताएका छन् ।

संसद् पुनर्स्थापना भएको सन्दर्भमा प्रतिक्रिया दिँदै गण्डकी प्रदेशका सांसदहरूले तानाशाह टिक्दैनन् भन्ने पुष्टि भएको प्रतिक्रिया दिएका छन् । गण्डकी प्रदेशसभामा नेपाल कम्युनिस्ट पार्टी, नेपाली कांग्रेस, राष्ट्रिय जनमोर्चा र जनता समाजवादी पार्टी छन् ।

गण्डकी प्रदेशका केही सांसदको प्रतिक्रिया यस्तो छ :

नैतिकता भए पद छोड्नुपर्छ : दीपक कोइराला, नेकपा (प्रचण्ड–माधव समूह)

प्रतिनिधिसभा विघटनविरुद्ध हामी पहिल्यैबाट थियौँ । यस्तो गर्न हुँदैन भन्दै आएको हौँ । प्रतिनिधिसभा पुनर्स्थापना गर्ने सर्वोच्चको निर्णय स्वागतयोग्य छ । यो निर्णय आजका लागि मात्रै होइन, प्रतिनिधिसभा विघटनलाई सदर गरेको भए भोलि अस्थिरता निम्तिने खतरा थियो । अदालतले संविधानको रक्षा गरेको छ ।

प्रधानमन्त्रीको राजीनामा माग्नुपर्ने विषय होइन, नैतिकताका आधारमा दिनैपर्छ । प्रधानमन्त्री मात्रै होइन, राष्ट्रपतिमाथि पनि नैतिकताको प्रश्न आएको छ । नैतिकता छ भने तुरुन्तै पदबाट राजीनामा दिनुपर्छ ।

सर्वोच्चले १३ दिनभित्र प्रतिनिधिसभा बैठक बोलाउन भनेको छ । नैतिकताका आधारमा नछोडे पनि प्रतिनिधिसभाले हटाउँछ, प्रक्रियाबाटै जानुहुन्छ ।

तानाशाह टिक्दैनन् भन्ने पुष्टि भयो : हरिशरण आचार्य, जनता समाजवादी पार्टी

प्रधानमन्त्री केपी ओलीले ५ पुसमा गरेको ‘कु’लाई सर्वोच्च अदालतले खारेज गरेर संसद् पुनर्स्थापना गर्नु स्वागतयोग्य छ ।

सर्वोच्चको यो फैसलाले न्यायालय न्यायको प्रतिमूर्ति हो भन्ने चरितार्थ भएको छ । यो आदेश नेपाली जनता, राष्ट्र, हिजोको बलिदानका लागि हर्षको विषय हो ।

सर्वोच्चको आदेशले न्याय सत्यको पक्षमा छ भन्ने चरितार्थ गरेको छ । नेपालमा सत्य कहिल्यै मर्दैन र कुनै पनि तानाशाह न हिजो टिके, न भोलि टिक्छन् भन्ने यो फैसलाले पुष्टि गरेको छ ।

अब अग्रगामीले परिवर्तनको नयाँ बाटो कसरी संस्थागत गर्ने र प्रतिगामी शक्तिलाई कसरी पाखा लगाउँदै नेपाललाई फेरि कसरी बढाउने भन्ने चुनौती सामना गर्नुपर्छ ।

प्रधानमन्त्री र राष्ट्रपतिको कदम प्रतिगामी र गैरसंवैधानिक थियो भन्ने कुरा आज पुष्टि भयो । उहाँहरू कानुन र सत्यलाई मान्न तयार हुनुहुन्छ भने नैतिकताको धरातलमा हुनुहुन्छ भने तुरुन्त राजीनामा दिनुपर्छ । ‘कु’ गर्नेलाई १ मिनेट पनि कुर्सीमा बस्ने नैतिक धरातल बाँकी छैन ।

संवैधानिक निकास खोजौँ : कृष्ण थापा, राष्ट्रिय जनमोर्चा

लामो समयसम्म देशमा अस्थिरता थियो । बहुमत र कम्युनिस्टको सरकार बनेकाले जनतामा ठूलो भरोसा थियो ।

नेकपामा स्वार्थका कारण अहिले अस्थिरता आयो । स्वार्थपूर्ति गर्न पार्टी फुट्ने, संसद् विघटन गर्ने काम नेपाली जनताका लागि सैह्य थिएन ।

अहिले अदालतले यसलाई पुनर्स्थापना गर्‍यो, यो स्वागतयोग्य छ । आगामी दिनमा कसैले विघटन गर्नु हुँदैन । नेपाली राजनीतिमा नैतिकता कति पो हुन्छ होला र ! पद छोड्नुभन्दा अरु संवैधानिक निकास निकाल्नुपर्छ ।

एउटा घटनाले विचलित हुँदैनौँ : कृष्णबहादुर थापा, नेकपा (ओली समूह)

विगतदेखि नै नेपालमा एक खालको राष्ट्रिय तथा अन्तर्राष्ट्रिय शक्ति केन्द्रहरू हावी हुँदै आएका छन् । पछिल्ला घटनाक्रमले समेत नेपालको आन्तरिक ममलामा अन्तर्राष्ट्रिय शक्तिकेन्द्र हावी भएको छ ।

नेपालको राजनीतिमा वैदेशिक हस्तक्षेप बढ्नु स्वाभिमानी नेपालीका लागि स्वीकार्य हुँदैन । त्यसको सबै राष्ट्रवादी नेपालीले खबरदारी र विरोध गर्नुपर्छ ।

प्रधानमन्त्री ओलीले नेतृत्व गरेको सरकारले आर्थिक समृद्धि र दिगो विकासका लागि उल्लेखनीय काम गरेको छ । पार्टीले राष्ट्रघाती जनविरोधी क्रियाकलापलाई पर्दाफास गर्नेछ । सबै पार्टी कमिटीलाई चुस्त, दुरुस्त र व्यवस्थित गर्नेछौँ ।

पार्टीको एजेण्डा तथा नेपाल सरकारले गरेका जनपक्षीय कामलाई जनतामा लिएर जानेछौँ । सर्वोच्च अदालतले प्रतिनिधिसभा विघटनलाई बदर गरेको छ । हामी कुनै एक घटनाक्रमबाट विचलित हुँदैनौँ । हामी गतिविधिलाई बढाएर जनतालाई गोलबन्द गरी पार्टीको पक्षमा जनमत तयार पार्छौं ।

प्रकाशित मिति: बुधबार, फागुन १२, २०७७ ०६:५२