नाफा बुक गर्ने लगानीकर्ताको चापले निफ्राको शेयर मूल्य ६६ रुपैयाँ घट्यो

A+ A A-

दोस्रो बजारमा कारोबार सुरु भएसँगै लगातार शेयर मूल्य बढाउँदै सकारात्मक सर्किट लगाएको नेपाल इन्फ्रास्ट्रक्चर बैंक (निफ्रा) को सोमबार नकारात्मक सर्किट लागेको छ ।

कारोबार सुरु भएको आधा घण्टा नबित्दै निफ्राको शेयर मूल्य १० प्रतिशत अर्थात् ६६ रुपैयाँले ओरालो लागेको हो ।

शेयर डिमान्ड बढिरहेको अवस्थामा मंगलबार भने निफ्राको शेयरमूल्य घटेको हो । ठूला लगानीकर्ता धमाधम शेयर बेच्दै निस्कन थालेको हल्लाको असर आजको कारोबारमा देखिएको हो । केही लगानीकर्ता सर्टटर्म प्रोफिट बुक गर्नतर्फ लाग्दा शेयर मूल्यमा नकारात्मक सर्किट लागेको छ ।

५ सय ९४ रुपैयाँ पुगेको शेयर मूल्य ६६ रुपैयाँले घटेर ५ सय २८ रुपैयाँ प्रतिकित्ता पुगेको छ ।

हिजोसम्म डिमान्ड ११ लाखको हाराहारीमा हुँदा आपूर्ति भने न्यून थियो तर आज लगानीकर्ता नाफा बुक गरेर बाहिरन खोज्दा डिमान्ड घटेर १ सय ७० कित्तामा पुगेको छ ।

बेच्ने लगानीकर्ताको उपस्थिति भने आज बाक्लिएको छ । आज लगानीकर्ताले ६ लाख ३८ हजार ७ सय ७९ कित्ता शेयर बिक्रीमा राखेका छन् । तर, किन्न खोज्ने लगानीकर्ताको संख्या भने न्यून छ ।

निफ्राले गत २ फागुनमा प्रतिकित्ता ३ सय ४० रुपैयाँमा दोस्रो बजारमा कारोबार सुरु गरेको थियो । कुल ८ करोड कित्ता आईपीओ खुला गरेको निफ्राको दोस्रो बजारमा प्रवेशसँगै नाै दिनमा नै शेयरमूल्य बढेर ६६६ रुपैयाँ प्रतिकित्तासम्म पुगेको थियो ।

नाै दिनमा नै ६० कित्ता पर्ने लगानीकर्ताले आफ्नो ६ हजार लगानीको ३९ हजार ९ सय ६० रुपैयाँ नाफा बुक गरेका थिए । शेयरमूल्य बढेपछि आज सबै लगानीकर्ता नाफा बुक गर्दै बाहिरिने मुडमा पुग्दा त्यसको असर बजारमा देखिएको हो ।