राताम्मे बजारमा जलविद्युत् र अन्य समूहको रजाइँ

A+ A A-

सोमबार शेयर राताम्मे बनेर बन्द भएको छ । बुललाई पछि पार्दै वियर हाबी हुँदा शेयरमा ३२ अंकले ओरालो लागेका हो । सोमबार नेप्से परिसूचक ३२ दशमलव ६७ अंकले घटेर २६०७ अंकमा बन्द हुँदा कारोबारमा आएका २ सय ७ कम्पनीको २ करोड १६ लाख १४ हजार ४ सय ५२ कित्ता शेयर ८ अर्ब ४० करोड ६३ लाख १० हजार ६ सय ७१ रुपैयाँमा कारोबार भयो ।

पाँच दिनसम्म लगातार हरियो बनेको बजार आज भने करेक्सन माेडमा पुगेको छ । बजार करेक्सन हुँदा पनि जलविद्युत् र अन्य समूहका कम्पनीको शेयरमूल्यमा उछाल आउँदा नेपाल इन्फ्रास्ट्रक्चर बैंक र आँखुखोला जलविद्युत्‌को शेयरमूल्य बढेर सकारात्मक सर्किट लाग्न पुग्यो भने छवटा कम्पनी सर्किट लेबलमा पुगे ।

आज जलविद्युत् समूहकाे सूचक २ दशमलव २६ र अन्य समूहकाे सूचक १ दशमलव २९ प्रतिशतले बढ्दा बाँकी सबै समूहको सूचक घटेर राताम्मे बनेकाे हाे ।

घटेका समूहमा बैंकिङको २ दशमलव ७२, ब्यापारको ३ दशमलव ०२, होटलको १ दशमलव ०२, विकास बैंकको २ दशमलव ३५, फाइनान्सको १ दशमलव १४, निर्जीवन बीमा ० दशमलव ८३, उत्पादन तथा प्रशोधन ० दशमलव ९८, माइक्रोफाइनान्स १ दशमलव २८ र जीवन बीमा १ दशमलव ९४, म्युचुअल फन्ड ० दशमलव २३ प्रतिशतले घटेका छन् ।

कारोबारमा आएका कम्पनीमध्ये ३१ कम्पनीको शेयरमूल्य बढेको छ भने १ सय ३९ कम्पनीको शेयर मूल्य घटेको छ । पाँचवटा कम्पनीको शेयर मूल्य यथावत् नै छ ।

नेप्से नकारात्मक बन्दा पनि पोजिटिभ सर्किट लगाउन सफल निफ्राको कारोबारमा आज पनि लगानीकर्ताको चाप देखियो । आइतबार निफ्राको ६० रुपैयाँले बढेर प्रतिकित्ता ६६० पुगेको छ भने कारोबार पनि ३२ करोड १२ लाख रुपैयाँबराबरको भयो ।

त्यस्तै, दोस्रो सर्किट लगाउने कम्पनी तामाकोसी जलविद्युत्‌ले ५३ रुपैयाँले शेयरमूल्य बढाउँदै प्रतिकित्ता ५९२ रुपैयाँ पुर्‍याएको छ ।

प्रकाशित मिति: सोमबार, फागुन १०, २०७७ १७:०६