मुख्यमन्त्रीले रोक्नुस् भन्दाभन्दै सभामुखले सुरु गरे बैठक, अनि टेबुल भयो अविश्वास प्रस्ताव

मुख्यमन्त्रीले रोक्नुस् भन्दाभन्दै सभामुखले सुरु गरे बैठक, अनि टेबुल भयो अविश्वास प्रस्ताव

A+ A A-

लामाे रस्साकस्सीपछि आज प्रदेश १ का मुख्यमन्त्री शेरधन राईविरुद्ध अविश्वास प्रस्ताव टेबुल भएको छ । नेकपा ओली समूहका मुख्यमन्त्री राईविरुद्ध नेकपा प्रचण्ड-माधव समूहले अविश्वास प्रस्ताव पेस गरेकाे हाे । केही साताअघि मुख्यमन्त्री राईले अर्थमन्त्रीबाट हटाएका इन्द्र आङ्बोले बैठकमा अविश्वास प्रस्तावको पत्र पढेर सुनाएका थिए ।

नेकपा विभाजनपछि नेकपाको प्रचण्ड–नेपाल समूहका भीम आचार्य पक्षले मुख्यमन्त्री राईविरुद्ध गत १२ पुसमा ३७ जना सांसदको हस्ताक्षरसहित प्रदेशसभा सचिवालयमा अविश्वास प्रस्ताव दर्ता गराएको थियो । यद्यपि, तीमध्ये पाँच जना सांसदले हस्ताक्षर फिर्ता लिइसकेका छन् ।

मुख्यमन्त्री राई पक्षले १६ जना सांसदलाई गरेको कारबाही र दल विभाजनको टुंगो नलागेसम्म प्रदेशसभा बैठकमा अविश्वासको प्रस्ताव अघि बढ्न नसक्ने अडान राख्दै आएको थियो । आइतबार लामो रस्साकस्सीपछि सभामुख भण्डारीले मुख्यमन्त्री राईविरुद्धको अविश्वास प्रस्ताव बैठकमा पेस गर्न अनुमति दिए । २ बजे बस्ने भनिए पनि झण्डै २ घण्टा ढिलो गरी बैठक सुरु भएको थियो ।

प्रदेशसभा बैठकमा राष्ट्रिय गान सकिएपछि सभामुख भण्डारीले प्रदेश १ को प्रदेशसभा नियमावली २०७४ को नियम १२९ को उपनियम १ बमोजिम मुख्यमन्त्री राईविरुद्ध प्रस्तावक सांसद इन्द्रबहादुर आङ्बो र समर्थक सांसद लछुमण तिवारीले अविश्वास प्रस्ताव दर्ता गरेको बताउँदै पेस गर्न अनुमति दिएका थिए ।

सभामुख भण्डारीले अविश्वासको प्रस्तावबाट सांसदहरू जसमाया गजमेर, गोपालचन्द्र बुढाथोकी, श्रीप्रसाद मैनाली, बसन्तीदेवी यादव, कला घलेले हस्ताक्षर फिर्ता लिएको सदनलाई जानकारी गराएंका थिए ।

त्यसपछि प्रदेशसभा बैठकमा सांसद आङ्बोले मुख्यमन्त्री राईविरुद्धको अविश्वास प्रस्ताव पेस गरे । गत ५ पुसमा प्रधानमन्त्री केपी ओलीले प्रतिनिधिसभा विघटन गरी गलत कदम चालेको र मुख्यमन्त्री राई पनि सोही पक्षमा लागेकाले अविश्वास प्रस्ताव दर्ता गराउनुपरेको प्रस्टीकरण आङ्बोले दिए । ‘पुस ५ गते प्रधानमन्त्रीले संविधान, लोकतान्त्रिक प्रणाली, सिंगो व्यवस्थामाथि गम्भीर प्रहार गरी प्रतिनिधिसभा विघटन गर्ने निर्णय गर्नुभयो । त्यसपछि सिंगोदेश प्रधानमन्त्रीको कमदविरुद्ध आन्दोलित छ’, अविश्वास प्रस्ताव पेस गर्दै उनले भने, ‘हामीले प्रधानमन्त्रीको कदमलाई प्रतिगामी भनिरहेका बेला मुख्यमन्त्रीले अग्रगामी कदम भन्दै त्यसलाई स्वीकार गनुभयो, यसमा हामी सहमत हुन सकेनौँ । त्यसैले अविश्वास प्रस्ताव दर्ता गराएका हौँ ।’

सांसद आङ्बोले अविश्वास प्रस्ताव पेस गरिसकेपछि सभामुख भण्डारीले सभाको बैठक आगामी २० फागुनसम्मका लागि स्थगित गरे । मुख्यमन्त्रीले १६ जना संसदलाई गरिएको कारबाही र दल विभाजनको टुंगो नलागी अविश्वासको प्रस्ताव अघि बढ्न नसक्ने अडान राख्दै आएका थिए । तर, सभामुख भण्डारीले प्रदेशसभा बैठक सञ्चालन गर्ने भएपछि मुख्यमन्त्री राई पक्षले संसद बैठक बहिस्कार गर्ने निर्णय गरेको थियो. । पूर्ववत् निर्णयअनुसार मुख्यमन्त्री राई पक्षका सांसदहरू बैठकमा उपस्थित भएनन् । सभमुख भण्डारीले पनि प्रदेशसभा बैठक सुरु गरी अविश्वास प्रस्ताव टेबुल गराए ।

७ माघमा प्रदेशसभाको हिउँदे अधिवेशन सुरु भएको थियो । तर, विवादकै कारण सो बैठक तीन मिनेट बसेर स्थगित गरियो । त्यसपछि २५ माघमा सभामुख भण्डारीले अर्को बैठक डाकेका थिए । सो बैठकमा सत्तापक्षकै अवरोधले ९ फागुनसम्मका लागि स्थगित गरिएको थियो ।

आजको बैठक पनि सूचना टाँस गरी स्थगित गर्न मुख्यमन्त्री राईले सभामुख भण्डारीलाई दबाब दिएका थिए । बैठकअघि राईले सभामुखलाई पत्र पठाएर अविश्वास प्रस्तावलाई कार्यसूचीमा नराख्न र बैठक स्थगित गर्न भनेका थिए ।
अब मुख्यमन्त्रीविरुद्धको अविश्वास प्रस्तावमाथि २० फागुनपछि प्रदेशसभा बैठकमा छलफल हुने बताइएको छ ।

प्रकाशित मिति: आइतबार, फागुन ९, २०७७ १८:०३