१० वर्षभित्र निजी विद्यालय हुन्नन्

A+ A A-

इन्सेक र चाँगुनारायण निगरानी समूहको आयोजनामा भएको शिक्षा अधिकार सम्बन्धमा सरोकारवालाबीच भएको अन्तरक्रिया कार्याक्रममा उनीहरुले व्यवस्थापन समितिका अध्यक्षको लक्ष्य भनेको नै आफ्नो पालामा भवन निर्माण गराउनमा मात्र सीमित हुँदा विद्यालयको सुधार हुन नसकेको बताए ।

चाँगुनारायण नगरपालिका प्रमुख सोमप्रसाद मिश्रले विद्यालय व्यवस्थापन समितिलाई शिक्षा सुधारको काममा लागिपर्न आग्रह गरे । उनले भने, ‘विद्यालयको भौतिक संरचनाको कामको जिम्मा हाम्रो भयो । व्यवस्थापन समितिले केवल शिक्षामा सुधार गर्न ध्यान देओस् ।’

उनले दश वर्षमा नगरपालिकामा निजी विद्यालय नहुने नीतिसाथ काम गर्दै आएको बताए । उनले शिक्षामा सुधारका लागि नगरपालिकाले कक्षा १ देखि १० सम्म नै नगरपालिकाले नै परीक्षा लिने प्रणाली विकास गर्न लागेको जानकारी दिए ।

त्यस्तै, शिक्षा सुधारका लागि शिक्षाको रकम स्थानीय निकायले रकमान्तरण गरेर नहुने देवी माध्यमिक विद्यालयका प्रअ राजाराम छुँकाले बताए ।

उनले सामुदायिक विद्यालयमा सरकारी कर्मचारीले सन्तान पढाउन थाले सामुदायिक विद्यालयको शिक्षामा सुधार आउने बताए । त्यस्तै, राज्यको कमजोर नीतिका कारण सामुदायिक विद्यालयको शिक्षाको गुणस्तरमा कमी आएको चाँगुनारायण माविका प्रअ ददिराम गेलालले बताए । उनले सरकारी शिक्षक र सामुदायिक विद्यालय निरुत्साहित गर्ने कार्यक्रम सरकारले तत्काल बन्द गर्नुपर्ने बताए ।

कार्यक्रममा इन्सेक प्रदेश ३ कार्यालयका कार्यक्रम संयोजक कृष्ण गौतमले चाँगुनारायण नगरपालिकाको शिक्षा स्वास्थ्य र खाद्य अधिकारका लागि आफूहरु सधैं लागिपर्ने बताए ।

कार्यक्रममा चाँगुनारायण नगरपालिकाभित्रका ३९ वटा सामुदायिक विद्यालय शिक्षासँग सम्बन्धित विभिन्न निकाय तथा संघ संस्थाहरु, सरोकारवालाहरु, स्थानीय निकायका प्रतिनिधिको उपस्थिति थियो ।

प्रकाशित मिति: शनिबार, वैशाख २८, २०७६ ०४:४४